Ngoa ro kawara d̄i ru'u b̄a dou-dou ma munafik
12:1-12
(Mat. 10:26-27)
12
D̄i wakatu ede riwu-riwu dou makahumbu d̄i hid̄i ede, ndad̄ina siad̄oho nacici menaku angina. Edempara Isa tampu'ura ngoa ro teina, saramba-rambakaina Sia ngoa ro teina d̄i anamori^doho-Na, nggahi Sia, <<Aina kabaremu d̄i b̄uha dou Farisi eded̄u tabe'ana ma munafik.>> 2  Wati wara ma cili weki ^didaloa eda, ro wati wara ra'ili ro pita ^didahengga. 3 Au ra nggahi b̄a nggomid̄oho d̄i wakatu aimanga^di, ^diringa wakatu aimarai; ro au ra ngoa nari b̄a nggomid̄oho d̄i fiko dou d̄i ade ^bili ra kempa, d̄ingoa kana'e rero.>>
4 <<Nahu manggahi d̄i nggomid̄oho oe lenga^doho-Ku! Aina dahu d̄i siad̄oho ma loa hade sarumbu pala wati loana karawi au-au ari mai b̄a ede. 5 Taho, Nahu ^dimateina d̄i nggomid̄oho couku ma pab̄ua ^didahukai b̄a nggomid̄oho.Dahupu d̄i Allah Ta'ala! B̄a one sawa'u b̄a hadena, Sia nantau kuasa rau ^dimapaki d̄i ade anaraka! Imbipu, Siaku ma pab̄ua ^didahukai b̄a nggomid̄oho.
6 Lima mbua nasi kari'i ^dilanda kai co'i d̄ua mbua piti ma ipi to'i co'ina. Kone ade ndedekaina wati kone sab̄ua rau ^dinefa b̄a Allah Ta'ala 7 kone honggo ma wara d̄i tutamu wa'ura reke sara'ana. B̄ara ndedena aina dahu, b̄ara nggomid̄oho nancewipu ntauna co'i ntewikaisi lab̄o nasi-nasi kari'i ede!>>
8 Nahu manggahi d̄i nggomid̄oho, <<Sanikina dou ma mangaku Nahu d̄i tando manusia, Nahu, Ana Manusia rau ^dimamangaku dou ede d̄i tando mala'eka-mala'eka Allah. 9 Pala cou-cou ma wati mangaku Nahu d̄i tando manusia, dou ede rau wati mangaku b̄a Ana Manusia d̄i tando mala'eka-mala'eka Allah.
10  Sanikina dou ma nggahi au-au ^di'aokaina Nahu, Ana Manusia, dou ede loa ^dikangampu wea; pala nggara dou ede nakatuna ro ka^bawasi Roh Allah, sia wati loa ^dikangampu wea.
11  Nggara nggomid̄oho nawa'asi b̄a dou aka uma-uma sambea ro ibadakai ^diparesakai ncihi ro ncaramu d̄i tando pamarenta atao dou mana'ekaina, aina daruramu mab̄oha b̄uneku carana nggomid̄oho horukaimu weki atao auku d̄i nggahi b̄a nggomid̄oho. 12 B̄ara d̄i wakatu ede wa'u, Roh Allah ^dimangoa ro tei nggomid̄oho auku d̄ipab̄ua nggahi b̄a nggomid̄oho.>>
Conto ro ibara mab̄oha dou mantau ro wara ma sampula
12:13-21
13 Sab̄ua dou d̄i ade weki dou mamboto ede nggahina d̄i Isa, <<Guru, takau to'ipu sa'e mada cengga pasaka ra wi'i b̄a ama madad̄oho ma wa'ura made.>>
14 Cambe b̄a Isa, <<Cina, cou ma rahanta Nahu ndad̄i hakim atao dou ^dimacengga pasaka d̄i ade weki nggomid̄oho ^dua?>> 15 Edempara nggahi Isa d̄i sara'a dou ma wara ta ede, <<Jaga-jagapu ro ai to'ina nggomid̄oho na'e ade, b̄a one kone dou ma ntau ro wara ma remba, dou ede wati loana wi'i weki d̄i ntau ro warana ede.>>
16 Edempara Isa mbeina conto ro ibara ake, <<Waraku sab̄ua dou mantau ro wara. Sia nantau dana ma mboto hasi. 17 Dou mantau ro wara ede tampu'ura kananuna d̄ei adena, <Wati^du wara walina hid̄i d̄iwi'ikai hasi danaku. Auku d̄ipab̄ua karawi b̄a nahu ake?> 18 Edempara kananu wali b̄a sia ro nggahina d̄i weki ndaina, <Io, nahu wara akaku; nahu ^dimakau dou rungka kana'e jompa-jompaku. Ta edeku d̄iwi'ikai b̄a nahu sara'a gandum ro barang-barang ma kalaina. 19 Sawa'u b̄a ede ampoku nggahi d̄i weki ndaiku: Nggomi malabara! Sara'a ma taho wa'ura kantau b̄a nggomi ro wati ^dimampoi sampe pila-pila mba'a ntoina. Ake, sanawara! Ngaha ro nonora ro iupu caru morimu!> 20 Pala nggahi Allah Ta'ala d̄i sia, <Oe, sampula! D̄i aimangad̄i ake wa'u, nggomi ^dimamade, edempara couku ^dimarakana sara'a ntau ro wara ra kab̄oro b̄a nggomi d̄i ru'u b̄a ndaimu ede?>
21 Ndedeku ndad̄ina d̄i sanikina dou mane'e ntau ro wara d̄i ru'u b̄a weki ndai kesena, pala wati ne'ena usaha ndad̄i ntau ro wara d̄i tando Allah Ta'ala.>>
Imbipu d̄i Allah Ta'ala
12:22-34
(Mat. 6:25-34)
22 Edempara nggahi Isa d̄i anamori^doho-Na, <<B̄ara ndedena, Nahu manggahi d̄i nggomid̄oho, <Aina daruramu mab̄oha morimu, eded̄u auku ^dingaha ro nono b̄a nggomid̄oho, ro aina daruramu mab̄oha sarumbumu eded̄u auku ^dikani ro lombo b̄a nggomi^doho.> 23 B̄a one mori nancewi penti ntewikaisi ngaha ro nono, ro sarumbu nancewi penti ntewikaisi lab̄o kani ro lombo. 24 Tio kab̄aepu nasi-nasi garaha! Nasi-nasi ede wati nggud̄a ro conggena, wati pakona, wati ntauna jompa ro lengge rau. Pala Allah Ta'ala nantadi katahoku nasi-nasi ede! Nggomid̄oho nancewipu ntauna co'i ntewikaisi lab̄o nasi-nasi ede! 25 Cousi d̄i ade weki nggomid̄oho b̄ara darura adena naloa ka^dondo umuna kone sato'i rau?s 26 Ndad̄i, nggara nggomid̄oho watisi loamu ndawi au-au kone ma ipi to'i rau, b̄ab̄auku nggomid̄oho darurakaimu d̄i lampa rawi-lampa rawi makalaina? 27  Tio kab̄aepu b̄uneku ^bunga-^bunga bakung wokona; ^bunga-^bunga ede wati muna ro medina, pala Nahu manggahi d̄i nggomi^doho: kone Sangaji Sulaiman ma ndede ntau ro wara wati kanina, kani ro lombo ma ndede ntika b̄une ^bunga-^bunga ede! 28 Mpori d̄i so ro serana ma woko d̄i ainaina ake ro naisi ^dika'a kampoi. Pala Allah Ta'ala naka^daha ro nakantikaku mpori ede kai ma wancu ntika. Au walipu nggomi^doho! Pala nggomid̄oho kura imbimu! 29 Ndad̄i, aina darura ro dahu ademu mab̄oha auku ^dingaha ro nono b̄a nggomid̄oho. 30 Lampa rawi-lampa rawi b̄une ede ^dimpou b̄a dou-dou ma wati pata Allah Ta'ala. Sapodakaina Amamu nab̄adeku b̄a one nggomid̄oho maparalu sara'ana ede. 31 Pala nggomid̄oho pab̄uapu karawi ncau-ncau au ra kane'ekai b̄a Allah Ta'ala, ndad̄i Allah Ta'ala d̄imambeina au d̄iparalu b̄a nggomid̄oho.
Isa Al-Masih Mengajar tentang Doa dan Iman
32 Nggomid̄oho sato'i mpa wekimu, aina dahu! B̄a one Amamu naca'u mbei d̄i ru'u b̄a nggomid̄oho bareka ra d̄i Karaja'an-Na.>> 33 Landa sara'apu ntau ro waramu ro mbeipu piti co'i ntau ro waramu ede d̄i ru'u b̄a dou-dou mancoki mori. Ndawipu dompe ma wati loa mpasa d̄i ru'u b̄a ndaimu eded̄u ntau ro wara ra wi'i d̄i saroga. Ntau ro wara ede wati loana mbora b̄ara dou mampanga wati loana mai mpanga ro mosu wati loana ka'iha. 34 B̄ara ta b̄e rawarakai ntau ro waramu, ta ede rauku ademu!>>
Aina kabare
12:35-48
(Mat. 24:43-51)
35  Isa nggahi walina, <<Nggomid̄oho pab̄uapu ka'ambi ncaupu wekimu d̄ikarawi weakaimu d̄i ru'u b̄a Allah Ta'ala d̄i sanikina wakatu. 36  Nggomid̄oho pab̄uapu sama b̄une ada-ada dou ma wunga ngena rumana ma dula d̄i ndiha nikakai. Nggara dulasi rumana ede ro tokena ta^da, siad̄oho d̄imahengga roci ta^da. 37 Taho ro sanara ada-ada dou ra raka eda b̄a rumana ma wunga ngena wakatu maikai rumana ede. Nahu manggahi d̄i nggomi^doho: Rumana ede ^dimaka'ambi ncau weki ro nakauku ada^dohona ede doho, edempara ndai sia ma karawi wea au-au d̄iparalu b̄a ada^dohona. 38 Taho ro sanara ada-ada dou ma wakatu mai rumana wakatu b̄oha ai atao d̄i aimasubu, sia rakana eda ada^dohona ma ka'ambi ncau weki. 39 Kawarapu ake! Pai nab̄adesi b̄a dou mantau uma ^boe pila maina dou mampanga, sia najagaku loakud̄u dou mampanga wati loana lu'u ade umana. 40 B̄ara ndedena nggomid̄oho rau pab̄uaku sadia ncau weki, b̄a one Nahu, Ana Manusia ^dimamai, wakatuna wati raka b̄ade b̄a nggomid̄oho.>>
41 La Petrus sod̄ina d̄i Isa, <<Ruma, sab̄ua ngoa ro tei ede d̄i ru'u b̄a madad̄oho atao d̄i ru'u b̄a sara'a dou rau?>>
42 Cambe b̄a Ruma, <<Couku ada dou ma to'a ro loa timba ro lemba ndad̄ina hanta b̄a rumana ndad̄i dou mana'ekaina d̄i ade weki ada-ada makalai loakud̄u sia mbeina ngaha siad̄oho rakasi ra wakatuna? 43 Taho ro sanara ada dou ede, ra raka eda b̄a rumana ma wunga kalampa taki ro putana wakatu wontu rumana! 44 Imbipu: Rumana ede na'imbikaiku sara'a ntau ro warana d̄i adana ede. 45 Pala nggara ada dou ede nanggahisi d̄ei adena, <Ruma nahu na'ahopu dulana,> edempara sia nduku sara'ana ada ma kalai ro ngaha ro nonona sampe mawukaina, 46 ndad̄i wakatu dula rumana d̄i ainaina ro wakatu ra wati sanaukai b̄a sia. Ada dou ede kancoki podat b̄a rumana ro kandad̄ina sama b̄une dou-dou ma wati to'a d̄i Allah Ta'ala.
47 Ada ma b̄ade au d̄ine'e b̄a rumana, pala wati sadiana ro wati karawina au ra kane'ekai b̄a rumana ede, sia ede ^dicambo ka'ipi. 48 Pala ada dou ma wati b̄ade au ra kane'ekai b̄a rumana, edempara karawina ma ncara ndad̄ina pab̄uaku ^dicambo, pala ^dicambo kanari mpa. B̄ara dou ra wa'u mbei kamboto, d̄i sia pab̄uaku d̄iraho ma mboto rau. Ro dou ra imbikai ma mboto, d̄i sia d̄iraho kamboto rau.>>
^Buneku sapodakaina b̄atu Isa Al Masih
12:49-53
(Mat. 10:34-36)
49 Nggahi Isa, <<Nahu maiku d̄i dunia ake d̄imawa'a afi ngango ro ngora. Nahu kane'e poda b̄a one afi ngango ro ngora ede wa'ura tampu'u kaleana! 50  Mbuipu wara susa ro ncoki ma ipi d̄i iu b̄a Nahu. Darura poda ade-Ku sawatipu lampa rawi ede nda^dina. 51 Sab̄ua kacai b̄a nggomid̄oho, Nahu maiku d̄i dunia ake mamai wa'a d̄i damekai? Wati, laina d̄i damekai, malaisi ^dicua musukai angi. 52 Tampu'u ake, iwa ro weki ma wara lima dou ^dimacua musu angi, tolu dou ao d̄ua dou, atao d̄ua dou ao tolu douna. 53  Ama ^dima'ao ana monena ro ana mone ^dima'ao amana. Ina ^dima'ao ana siwena ro ana siwe ^dima'ao inana. Riana siwena ^dima'ao rido siwena ro rido siwe ^dima'ao riana siwena.>>
D̄i ^badekai tanda jaman
12:54-59
(Mat. 16:2-3)
54 Isa nggahi rauna d̄i dou mamboto, <<Nggara edasi b̄a nggomid̄oho apu mateka d̄i sa^bae ^di-na, nggomid̄oho manggahi laloku, <<^Dimalondo ura.> Ro poda-poda londo ura. 55 Nggara iusi b̄a nggomid̄oho angi ma ramai ta wela ^do-na, nggomid̄oho manggahiku, <Ai ro liro ^dimapana.> Ro poda-poda pana. 56 Nggomid̄oho dou ma munafik! Nggomid̄oho maloaku takasi ka'ada'an ai ro liro kai tiomu ka'ada'an langi ro dunia. ^Ba^bauku tanda-tanda jaman ake wati loakaimu ta^bi b̄a nggomid̄oho?
57 ^Ba^bauku nggomid̄oho wati loakaimu kad̄ale b̄a ndaimu au ma taho? 58 Nggara warasi dou ma lao da'awa nggomid̄oho aka kanto pangadilan, usahapu sawa'u-wa'umu ^dikanggorikaimu parakara ede lab̄o sia wakatu nggomid̄oho mbuipu d̄i woha ncai. Nggara watisi, pea sia naranda wa'aku nggomid̄oho d̄i tando hakim ro hakim ede na^donggoku nggomid̄oho d̄i palisi, ro palisi nakalu'uku nggomid̄oho d̄i ade uma bui. 59 Imbipu! Nggomid̄oho wati ^dimalosa d̄i ade uma bui sawatipu b̄a cola kanggori dendamu.>>