Conto ro ibara mab̄oha bendahara ma wati rombo
16:1-13
16
Isa nggahi walina d̄i anamori^doho-Na, <<Waraku sab̄ua dou mantau ro wara. Sia nantau sab̄ua dou bendahara ma taki kab̄ua wea ntau ro warana. Dou mantau ro wara ede ringana haba b̄a one bendahara ede balanja paki-pakina piti ntau dou ma ntau ro wara ede. 2 Ndad̄i sia ouna bendaharana ede ro nggahina, <Nahu wa'ura ringaku au ra karawi b̄a nggomi. B̄ara ndedena, nahu ^dimakalosa nggomi! Sawatipu b̄a ede nggomi pab̄uapu d̄onggo wa'umu au ra wa'u karawi b̄a nggomi salama ake.> 3 Edempara kananu b̄a bendahara ede, <Auku d̄ikarawi b̄a nahu ake? Ruma nahu nane'eku kalosa nahu ra d̄i karawikaiku. Maco dana nahu wati tenggoku; raho sadeka rero, nahu kamaja. 4 Nahu wara akaku; nggara nakalosasi b̄a ruma nahu ade karawikaiku, nahu pab̄uaku wara lenga^dohoku ma ngawa weha ao nahu, ngge'e d̄i umana!> 5 Ndad̄i bendahara ede ouna sanikina dou ma nconggo d̄i rumana. D̄i dou ma sarambakaina, nggahi sia, <Sab̄une nconggomu d̄i ruma nahu?> 6 Cambe b̄a dou ede, <100 roa mina zaitun.> Nggahi dou ma na'ekai uma ro salaja ede d̄i sia, <Ake sura nconggomu. Dohopu ro tunti rocipu: lima mpuru roa.> 7 Edempara nggahi sia d̄i dou ma ka^duakaina, <Ro nggomi cina, sab̄une nconggo nggomi?> Cambe b̄a dou ede, <1.000 karu gandum.> Nggahi bendahara ede d̄i sia, <Ake sura nconggomu. Tuntipu: 800 karu.>8 Wakatu ringa b̄a dou ma ntau ro wara mab̄oha ruku ro rawi bendahara ma wati rombo ede, sia roina bendahara ede b̄ara mboto akana; b̄a one dou-dou dunia ake nancewi mboto akana ntewikaisi lab̄o dou-dou anggota Karaja'an Saroga.>>
9 Edempara Isa nuntu ro nggahi walina, nggahi-Na, <<Ringapu! Kanipu ntau ro wara dunia ake d̄i rakakaimu lenga, loakud̄u nggara watisi ntauna co'i ntau ro wara dunia ake wali, nggomid̄oho ^ditarima aka hid̄i ma ede ro hi^di. 10 Dou ma loa d̄i'imbikai d̄i ade lampa rawi ma to'i, loa ^di'imbi raukai d̄i ade lampa rawi ma na'e. Pala dou ma wati loa d̄i'imbikai d̄i ade lampa rawi ma to'i, wati loa ^di'imbi raukai ade lampa rawi ma na'e. 11 Ndad̄i, nggara mab̄oha ntau ro wara dunia ake nggomid̄oho wati loa ^di'imbikai, couku ma ngawana imbikai d̄i nggomid̄oho mab̄oha ntau ro wara ma raso? 12 Ro mab̄oha barang ntau dou makalai, nggomid̄oho wa'ura wara bukutina wati loa ^di'imbikai, couku ma ngawa mbei d̄i nggomid̄oho au d̄imandad̄i ntaumu?
13 Wati wara kone sab̄ua dou rau ma loa karawi d̄i ru'u b̄a d̄ua dou ruma; b̄a one sia nancewi meci ro ca'uku ma sa^buana ntewikaisi lab̄o ma kalaina, atao sia nancewi to'aku d̄i rumana ma sab̄ua ntewikaisi lab̄o ma kalaina. Ndede rau nggomid̄oho.Nggomid̄oho wati loamu karawi d̄i ru'u b̄a Allah Ta'ala ro karawi d̄i ru'u b̄a ntau ro wara raumu.>>
Mab̄oha Dou Farisi
16:14-18
14 Dou-dou Farisi naringa sara'aku nggahi ro eli Isa. Edempara siad̄oho hari kasungge-sunggena Sia, b̄ara siad̄oho naca'u podaku piti. 15 Pala nggahi Isa d̄i siad̄oho, <<Nggomi^dohoku dou ma ca'u kancihi weki d̄i tando dou makalai, pala Allah Ta'ala nab̄adeku isi ademu. B̄ara au ra kaco'i b̄a manusia, wati ntauna co'i d̄i tando Allah Ta'ala.
16 Hukum ra mbei b̄a la Musa ro au ra ngoa ro tei b̄a nabi-nabi, ngge'e mpa kani sampe jaman la Yahya Mataki kandeu raso dou. Ratampu'u wakatu ede Haba Mataho mab̄oha Karaja'an Allah d̄ingoa ro kahaba ncau. Ro dou na'usaha kapodaku d̄imandad̄i anggota Karaja'an Allah. 17 Nancewi mo^dapu mbora langi ro dana ntewikaisi mbora sab̄ua titik ade Hukum Taurat.
18 Cou ma wi'i weina edempara nika walina lab̄o dou siwe makalai, dou ede najina. Ro dou ma nika lab̄o dou siwe ra wi'i b̄a rahina ede, najina rauku.>>
Dou mantau ro wara ro la Lazarus
16:19-31
19 Sawa'u b̄a ede, Isa ngoa ro tei walina. Nggahi Sia, <<Waraku sab̄ua dou mantau ro wara. Kani ro lombona na'ipiku nggalina. Sanikina ainaina sia katu'u ncauna ngaha ndiha. 20 Ro wara sab̄ua dou ma taki raho sadeka ngarana la Lazarus, sarumbuna b̄ini b̄a mba'a. Ra nginakai, dou namai wi'iku sia d̄i tando lawa uma dou mantau ro wara ede. 21 Sia nane'eku isi lokona kai ngaha ro nono ma rama^bu ra d̄i meja dou mantau ro wara ede. Pala lako nanaha mai nelaku mba'a la Lazarus.
22 Pila-pila nai sawa'u b̄a ede, dou mancoki mori ede madena, edempara wa'a b̄a mala'eka aka hid̄i ma taho d̄i kompe la Ibrahim d̄i saroga. Dou mantau ro wara ede made rauna ro umbu b̄a dou. 23 D̄i dunia dou mamade sia na'ipiku susa ro ncoki iuna. Ro wakatu ntanda ca'ese b̄a sia, sia edana la Ibrahim d̄i hid̄i ma d̄o'o ro la Lazarus wara d̄i kompe la Ibrahim. 24 Dou mantau ro wara ede ou nggaona, <Ama Ibrahim! Mada wancuku ncoki iuku d̄i ade afi ake. Kasi to'ipu adeta d̄i mada, Ama! Takau to'ipu la Lazarus ^deta kangge rimana d̄i oi sawa'u b̄a ede mai ^detana d̄i lera mada kai oi ede!>
25 Pala cambe b̄a la Ibrahim, <Kawarapu anaku: santoi morimu, nggomi wa'ura raka sara'amu ma taho-taho, pala la Lazarus rakana ma iha ncau. Ake sia nasana iuna ta ake, ro nggomi susa ro ncoki iumu. 26 Ari mai b̄a ede, d̄i hela nggomi lab̄o nami wara rengge ma paja ma wati wa'u ^disapa, loakud̄u dou ta ake wati loana lao ta aka ro dou ta aka wati loana mai ta ake!> 27 Nggahi dou mantau ro wara ede, <Nggara ndedesi Ama, mada maraho poda-poda d̄i Ita takau to'ipu la Lazarus lao aka uma ama mada. 28 Wara lima dou sa'e ro ari mada ta aka. Takau to'ipu la Lazarus ngoa ro kawara siad̄oho, loakud̄u siad̄oho ai rauna mab̄u d̄i hid̄i susa ro ncoki ake.>
29 Cambe b̄a la Ibrahim, <Siad̄oho nawa'ura ntau buku-buku la Musa ro buku nabi-nabi! Co'opu siad̄oho b̄atuna au ra tunti d̄i ade buku-buku ede!> 30 Pala cambe b̄a dou mantau ro wara ede, <Ede watipu ncihina, Ama Ibrahim. Pala nggara warasi dou ma made ma mori mbali ro lao rakana siad̄oho, tantu siad̄oho ^dimatoba ra d̄i dosa-dosa sia^doho.> 31 Pala nggahi la Ibrahim, <Nggara siad̄oho watisi kade'ena au ra kaukai b̄a la Musa ro nabi-nabi, tantu siad̄oho wati ^dima'imbi rau, konena wara dou mamade ma mori mbali.> >>