Conto ro ibara mab̄oha Jimba ma moda
15:1-7
(Mat. 18:12-14)
15
D̄i sab̄ua ainaina, mboto dou ma taki tagi bea ro dou-dou ra wi'ikai wati taho b̄a ela ro dou ma mai kade'e nuntu ro nggahi Isa. 2 Dou-dou Farisi ro ahli-ahli Taurat tampu'ura badare^dena, <<Sia natarimaku dou-dou ma dosa ro nangaha sama lab̄o sia^doho!>> 3 B̄ara ndedena Isa caritana d̄i siad̄oho kai conto ro ibara ake,4 <<Misampara sab̄ua dou d̄i ade weki nggomid̄oho ma ntau 100 mbua jimba, edempara modara sab̄ua -- auku d̄ikarawi b̄a dou ede? Tantu dou ede natu'u wi'iku jimba ma ciwi mpuru ciwi mbua ede d̄i so mpori, ro nalao ngupaku ma moda ede sampe rakana. 5 Ro nggara nawa'usira raka mbali b̄a sia jimbana ede, sia naneo poda adena ndad̄i sia tunduna jimbana ede, 6 edempara wa'a kadulana. Sawa'u b̄a ede sia ouna lenga^dohona ro dou-dou d̄i kompe ro peina, ro nggahina, <Mai ndai taka^dihiku ade. Jimbaku ma moda wa'ura eda mbaliku!> 7 Ndede rauku d̄i saroga wara kad̄ihi ade ma ncewi na'e b̄ara sab̄ua dou madosa ma toba ntewikaisi lab̄o ciwi mpuru ciwi dou ma wa'ura taho ro wati paraluna toba.>>
Conto ro ibara mab̄oha piti ma moda
15:8-10
8 <<Atao misampara sab̄ua dou siwe mantau sampuru mbua piti salaka, edempara moda sab̄ua -- auku d̄ikarawi b̄a sia? Sia naka'aku ilo ro nacafiku umana ro nangupaku ta b̄e-b̄e sampe rakakaina pitina ede. 9 Wakatu eda mbali b̄a sia pitina ede, sia ouna lenga^dohona ro dou-dou d̄i kompe ro peina, edempara nggahina, <Nahu neo poda adeku b̄ara wa'ura eda mbaliku pitiku ma ramoda. Mai ndai taka^dihiku ade!> 10 Nahu manggahi d̄i nggomi^doho! Ndede rau mala'eka Allah neo adena nggara warasi sab̄ua dou madab̄ae matoba ra d̄i dosa-dosana!>>
Conto ro ibara mab̄oha Ana ma moda
15:11-32
11 Isa nggahi walina, <<Waraku sab̄ua dou ama ma ntau d̄ua dou ana mone. 12 Nggahi ana ma cumpukaina, <Ama, tambei to'ipu d̄i mada ake-ake wa'u ru'uku d̄i ade ntau ro wara ndaita.> Edempara amana ede cenggana ntau ro warana d̄i ru'u b̄a d̄ua dou anana ede. 13 Pila-pila nai sawa'u b̄a ede anana macumpukai ede landana pasaka ru'una ede, edempara laona aka dana ro rasa ma ^do'o. Ta aka sia balanja ka'ihana pitina ede kai mori b̄e ra ca'u ndaina. 14 Wakatu cumpura sara'a pitina, nda^dira d̄i dana ro rasa ede bala hi^do, ndad̄ina sia tampu'ura ncoki morina. 15 Edempara sia lao karawina d̄i sab̄ua dou d̄i rasa ede, dou ede kauna sia lao aka omana d̄imajaga ro sandaka wawi-wawina. 16 Sia na'ipi podaku hi^dona, ndad̄ina sia nane'eku ngaha au ra ngaha b̄a wawi-wawi ede. Konena sia nawancuku hi^dona, wati kone sab̄ua dou rau ma mbeina ngaha ro nono. 17 Edempara sia kawarana weki ro nggahina, <Dou-dou ma karawi d̄i amaku naremba b̄a ngaha ro nono, pala nahu ta ake ne'empara made sarahi^do! 18 Nahu d̄imalao raka amaku, ro ^dimanggahi d̄i amaku ede: Ama, mada wa'ura dosa d̄i Allah Ta'ala ro d̄i Ita. 19 Mada watid̄u patuna ^dipehekai ana Ita. Wi'ikaipu mada ake dou makarawi ngaha gaji d̄i Ita.> 20 Edempara sia lao dulana aka uma amana.
Mbuipu d̄o'o lab̄o umana, sia wa'ura eda ao b̄a amana. Kai kasi poda adena, amana ede rai weha aona sia, edempara pohu ro ngiluna. 21 <Ama,> nggahi anana ede,<mada wa'ura dosa d̄i Allah Ta'ala ro d̄i Ita. Mada watid̄u patuna ^dipehekai ana Ita.> 22 Pala amana ede ouna ada^dohona ro nggahina, <Roci! Wehapu kani ro lombo ma ncewi ntika, ro kakanikaipu sia. Kakani weapu sinci d̄i kangge rimana, ro sadopa d̄i e^dina. 23 Sawa'u b̄a ede wehapu ana capi ma mpore ro sambelepu. Ndai d̄imangaha ndiha ro kad̄ihi ade. 24 B̄a one anaku ma wa'ura made, ake nawa'ura mori mbali; sia ma wa'ura moda, ake kawa'ura raka eda mbali.> Edempara siad̄oho tampu'ura kad̄ihina ade ro ngaha ndiha.
25 Wunga ade ndihakai ede, ana ma sasa'e mbuipu wara d̄i omana. Wakatu dula sia ro ^denira lab̄o umana, sia ringana eli musik ro dou-dou matari. 26 Sia ouna sab̄ua dou ada d̄i ade weki ada^dohona, edempara sod̄i b̄a sia, <Au mandad̄i d̄i uma?> 27 Cambe b̄a adana ede, <Arimu wa'ura mai mbali! Ro Amamu wa'ura kauna sambele ana capi ma mpore, b̄ara sia wa'ura raka mbalina anana ade ka'ada'an taho ro salama!>
28 Ana ma sasa'ekaina ede mbani podana ndad̄i sia wati ngawana lu'u ade umana. Edempara losa amana ro siwina sia ro kauna lu'u. 29 Pala nggahi b̄a ana ma sasa'e ede, <Pila-pila mba'a ntoina mada karawi kapodaku ade d̄i ru'u b̄a Ita. Mada wati paranaku dangawa au ra kaukai b̄a Ita. Au ra mbei b̄a Ita d̄i mada? Kone sab̄ua mbe'e rau watipu iuku mbei b̄a Ita ^dingaha ndihakaiku lab̄o lenga^dohoku! 30 Ana Ita ede wa'ura kampoina ntau ro wara Ita lab̄o dou-dou siwe sunda, pala wakatu sia dulana, Ita sambelemu ana capi ma mpore d̄i ru'u b̄a sia!> 31 Cambe b̄a amana, <anaku, nggomi mawara ncau ta ake lab̄o nahu. Samenana ntau nahu eded̄u ntau nggomi rau. 32 Pala ndai pab̄uaku ngaha ndiha ro kad̄ihi ade, b̄ara arimu ma wa'ura made, pala ake nawa'ura mori mbali; sia wa'ura moda, pala ake wa'ura eda mbali.> >>