Isa Al Masih kataho walina sab̄ua dou masupu d̄i ainaina Sabat
14:1-6
14
D̄i sab̄ua ainaina Sabat Isa lao ngahana aka sab̄ua uma dou mana'ekai dou Farisi. Ta ede dou-dou tio kab̄ae podana Isa. 2 Ndad̄i Isa mai raka b̄a sab̄ua dou ma supu mbowi, ed̄i ro rimana wa'ura winte. 3 Edempara sod̄i b̄a Isa d̄i ahli-ahli Taurat ro dou-dou Farisi ma wara ta ede, <<Nggahi b̄a hukum agama ndaita, sab̄ua loaku ndaita kataho dou masupu d̄i ainaina Sabat atao wati?>>4 Ahli-ahli Taurat ro dou-dou Farisi ede namidi mpa. Edempara Isa ouna dou ma supu mbowi ede, ^dama ro katahona sia edempara kauna lao. 5 Sawa'u b̄a ede nggahi Isa d̄i siad̄oho ede, <<Misampara sab̄ua dou d̄i ade weki nggomid̄oho mantau ana atao sab̄ua capi ma mab̄u ade temba d̄i ainaina Sabat, sab̄ua sia wati hinti kalosa rocina anana atao capi ede d̄i ainaina ede wa'u?>>
6 Pala wati kone sab̄ua dou rau maloana cambe d̄i Isa mab̄oha lampa rawi ede.
Ka'awa weki ro ca'u bantu dou
14:7-14
7 Isa na'edaku dou-dou ma mai d̄i hid̄i ede ma kad̄ale hid̄i ma ipi taho. B̄ara ndedena Sia ngoa ro teina ede d̄i siad̄oho sara'a. 8 <<Nggara nggomid̄oho na'undasi b̄a dou d̄i ndiha nikakai, aina lao dohomu d̄i hid̄i mataho d̄ei tandona. B̄ara kombisi dou ma ntau rawi ede wa'ura undana dou makalai ma ncewi penti ntewikaisi lab̄o nggomid̄oho, 9 ndad̄ina dou mantau uma ma wa'ura unda nggomi ro sia ede, kai tani adena maina d̄i nggomi ro nggahina, <Mboto kangampu, hid̄i ake wa'ura sadia d̄i ru'u b̄a dou mamai aka.> Edempara kai maja podamu nggomi pesomu weki lao dohomu ta ari nganto podana. 10 B̄ara ndedena, nggara na'undasi b̄a dou nggomid̄oho, ka^dalepu hid̄i ma ari nganto podana, loakud̄u dou mantau uma d̄imamai raka nggomi ro nanggahiku d̄i nggomi, <Soba, mai tadohoku d̄i hid̄i ma ncewi taho.> Kai ndedena nggomi ^dihoroma d̄i tando sara'a dou ra unda ma kalaina. 11 B̄ara sanikina dou ma ka'ese weki ^dika'awa, pala ma ka'awa weki ^dika'ese.>>
12 Edempara nggahi Isa d̄i dou mantau uma, <<Nggara ma'undasi dou d̄imangaha ndiha d̄i aimarai atao ngaha ndiha d̄i aimanga^di, aina undamu lenga atao sa'e ro arimu atao iwa ro wekimu atao dou-dou d̄i kompe ro peimu ma ntau ro wara. B̄ara peade siad̄oho ^dima'unda nggomi rau, ro kai ndedena nggomi d̄imatarima cepe au ra karawimu ede. 13 Ndad̄i, nggara makatu'usi ndiha, undapu dou mancoki mori, dou ma mpako ro mpedu, dou ma made ^binci, ro dou mambuda. 14 Nggomi ^dibareka b̄a Ruma, b̄ara dou-dou ede wati loana cepe au ra rawimu ede. Rawimu ma taho ede ^dicepe b̄a Allah Ta'ala wakatu dou-dou ma taho kamori mbali ra d̄i madekaina.>>
Conto ro ibara mab̄oha ndiha na'e
14:15-24
(Mat. 22:1-10)
15 Wakatu sab̄ua dou d̄i ade weki dou ma ngaha sama-sama ta ede ringana nggahi ro eli Isa, nggahi sia, <<Taho ro sanara dou ma ngaha sama lab̄o Allah Ta'ala d̄i ade Karaja'an-Na!>>
16 Pala nggahi Isa d̄i dou ede, <<D̄i sab̄ua wakatu waraku sab̄ua dou makatu'u ndiha na'e ro undana dou mamboto. 17 Rakara wakatuna d̄i tampu'ukai ndiha, dou ma ntau ndiha ede kauna adana lao d̄i dou-dou ra unda ro karongga nggahi, <Santa^be tamaira, sara'ana wa'ura sadia!> 18 Pala siad̄oho sara'ana, sab̄ua-sab̄ua dou tampu'u rahona kangampu. Ma sarambakaina manggahi d̄i ada dou ede, <Nahu b̄ou podapu raweliku salo^be dana, ro pab̄uaku lao tio. Nahu ma raho kangampu, b̄a one nahu wati loaku lao d̄i ndihakai ede.> 19 Ma kalaina manggahi, <Nahu b̄ou podapu raweliku lima oka capi rangga, ro kane'e oka tio capi-capi ede. Nahu ma raho kangampu, b̄a one nahu wati loaku lao aka ndihakai ede.> 20 Ma kalai walina manggahi, <Nahu b̄ou podapu ranikaku, b̄ara ndedena nahu wati loaku lao d̄i ndihakai ede.>
21 Ada dou ede dulana ro ngoana lampa rawi ede d̄i rumana. Rumana ede nawancuku mbanina ro nggahina d̄i adana ede, <Lao rocipu d̄i ncai-ncai ro d̄i gang-gang d̄i kota. Mai wa'apu ta ake dou mancoki mori, dou ma mpako ro mpeha, dou mambuda ro dou ma made ^binci.> 22 Edempara nggahi adana ede, <Ruma, au ra kaukai b̄a Ita wa'ura karawi sara'a b̄a mada, pala hid̄i mbuipu mboto ma ntaru.> 23 Edempara nggahi dou mantau rawi ede, <Laopu d̄i ncai-ncai bari ro d̄i ncai-ncai to'i ari mai b̄a kota, ro kau pab̄uapu dou-dou mai, loakud̄u uma nahu b̄ini b̄a dou-dou. 24 Nahu ma nggahi d̄i nggomi^doho! Wati wara kone sab̄ua dou rau ra unda b̄a nahu akande ^dimaloa ngaha ro nono d̄i ade ndihakai nahu ake.> >>
Mab̄oha b̄atu Isa Al Masih
14:25-33
(Mat. 10:37-38)
25 Mboto dou ma lampa b̄atu Isa. Isa tambarina ro nggahi-Na d̄i siad̄oho, 26 <<Nggara dou namaisi d̄i Nahu, pala nancewipu meci ro ca'una inana, amana, weina, ana^dohona, sa'e ro ari^dohona, kone sarumbu ndaina, sia wati loana ndad̄i anamori Nahu. 27 Dou ma wati ngawa tundu salibna ro b̄atuna Nahu, wati loana ndad̄i anamori Nahu. 28 Nggara sab̄ua dou d̄i ade weki nggomid̄oho mane'e tu'u sab̄ua menara, tantu sia nadoho reke wa'uku piti d̄i tu'ukaina menara ede loakud̄u sia b̄adena sab̄ua piti ra sadia nancihi ^dikanggorikai menara ede atao wati. 29 B̄ara sia watisi wa'una kanggori menara ede, sapodakaina dasana wa'ura ndawi, ndad̄i sara'a dou ma edana rawi ede ^dimaharikaina. 30 Siad̄oho ^dimanggahi, <Dou ede tu'una menara, pala wati wa'una kanggori!> 31 Nggara sab̄ua dou sangaji ma ntau 10.000 tentara mane'e lewa lab̄o sangaji makalai ma ntau 20.000 tentara, tantu sangaji ede nadoho kananu wa'uku sab̄ua sia nawa'uku lewa lab̄o musuna ede. 32 Nggara nab̄adesi b̄a sia b̄a one sia wati wa'una ao musuna, tantu wakatu musuna mbuipu ^do'ona, sia nanggaduku dou ^dirahokaina dame lab̄o musuna ede.>> 33 Edempara Isa nggahi walina, <<Ndede rau nggomid̄oho.Wati kone sab̄ua dou rau d̄i ade weki nggomid̄oho ^dimaloa ndad̄i anamori Nahu, nggara sia watisi horina weki ra d̄i sara'a au ra ntauna.>>
Sia ma ca^ba
14:34-35