Lukas 5

Isa Al Masih kad̄alena anamori-Na ma sarambakaina

5:1-11

(Mat. 4:18-22; Mrk. 1:16-20)

D̄i sab̄ua ainaina, Isa ki^dina d̄i kengge Ndano Genesaret. Mboto dou macici angi b̄a ne'ena ringa haba ra d̄i Allah Ta'ala. 2 Wakatu ede, Isa edana d̄ua mbua sampa d̄i kengge ndano ede; dou-dou ma moti wa'ura londo d̄i sampa-sampana ro siad̄oho wunga karasona pukana. 3 Isa ne'ena ese sab̄ua sampa ntau la Simon. Edempara kauna la Simon runggi sampana ede kad̄o'o nari lab̄o kengge ndano. Isa dohona d̄i ade sampa ede ro ngoa ro teina dou mamboto.

4 Sawa'u b̄a nggori ngoa ro teina, nggahi Sia d̄i la Simon, <<Karawe ca^deipu, ro lo'opu pukamu ^diwa'ukaimu uta.>>

5  <<Guru,>> cambe b̄a la Simon, <<Sa^bala ai mantuki madad̄oho karawi kapodamu ade, pala wati wara rakamu au-au! Pala b̄ara kau b̄a Ita, taho; mada ^dimawura wali ala.>> 6  Sawa'u b̄a siad̄oho karawina b̄une ra kaukai b̄a Isa, siad̄oho mboto poda rakana uta sampe ala siad̄oho tampu'ura nci'ina. 7 B̄ara ndedena siad̄oho rahona bantu d̄i lenga^dohona ma wara d̄i sampa ma kalaina. Lenga^dohona ede lao rakana la Simon edempara siad̄oho sama-sama isina uta d̄i d̄ua mbua sampa ede sampe sampa-sampa ede ne'empara mimi. 8 Wakatu eda b̄a la Simon au ma ndad̄i ede, sia sujuna d̄i tando Isa, edempara nggahina, <<Tu'u wi'ipu mada, Ruma! B̄a one mada ake dou madosa!>>

9 La Simon lab̄o sara'a dou ma sama-sama lab̄o sia namidi adena eda mboto uta ra raka b̄a siad̄oho. 10 Ndede rau lab̄o lenga-lenga la Simon, eded̄u la Yakub, ro la Yahya, ana-ana la Zebedeus. Nggahi Isa d̄i la Simon, <<Aina dahu! Tampu'u ake nggomi d̄imandad̄i dou ma taki ala manusia.>>

11 La Simon ro lenga^dohona hinti wa'ana sampa-sampa ede aka kengge ndano, sawa'u b̄a ede siad̄oho tu'u wi'i sara'ana ede, edempara b̄atuna Isa.

Mukjizat Isa Al-Masih Menangkap Ikan

Isa Al Masih katahona sab̄ua dou ma supu ncola

5:12-16

(Mat. 8:1-4; Mrk. 1:40-45)

12 D̄i sab̄ua ainaina, Isa wara d̄i sab̄ua kota. Ta aka wara sab̄ua dou mone, sarumbuna b̄ini b̄a supu ncola. Wakatu sia edana Isa, sia sujuna d̄i tando Isa ro raho nembana, <<Ruma, nggara ngawasi Ita, Ita maloaku kataho supu mada!>>

13 Edempara Isa ^damana dou ede ro nggahina, <<Nahu kangawa, tahora!>> Wakatu ede lalo supu dou ede mborana. 14  Isa kantana dou ede ngoa kone d̄i cou-cou rau, nggahi-Na, <<Laopu aka imam, ro teipu sarumbumu d̄i sia loakud̄u sia b̄adena b̄a one nggomi poda-poda wa'ura taho. Sawa'u b̄a ede lao d̄onggo ro mbeipu koroba b̄une ra kaukai b̄a la Musa, d̄i bukutikaimu d̄i dou-dou b̄a one nggomi poda-poda wa'ura taho.>>

15 Haba mab̄oha Isa nanaha mbou rero, ro mboto dou mamai raka Sia ro nane'eku ringa ro kade'e Sia ro siad̄oho nane'e ^dikataho wea supuna. 16 Sawa'u b̄a ede Isa lao do'ana aka hid̄i ma lingi.

Isa Al Masih katahona sab̄ua dou ma made ^binci

5:17-26

(Mat. 9:1-8; Mrk. 2:1-12)

17 D̄i sab̄ua ainaina wakatu Isa wunga ngoa ro teina, wara pila-pila dou Farisi ro ahli-ahli Taurat ma doho ta ede. Siad̄oho ra maina ra d̄i Yerusalem, ro ra d̄i kota-kota d̄i Galilea ro Yudea. Kuasa Allah Ta'ala wara d̄i Isa ^dikatahokaina dou-dou masupu. 18 D̄i wakatu ede wara pila-pila dou ma mai wa'a sab̄ua dou ma made ^binci ma maru ese wawo dipi. Siad̄oho na'usahaku wa'a dou ede d̄i ade uma loakud̄u tohona sia d̄i tando Isa. 19 Pala b̄ara mboto dou ta aka, siad̄oho wati loana wa'a kalu'u dou ma supu ede. B̄ara ndedena siad̄oho ampana sia ese wawo b̄utu uma. Edempara siad̄oho henggana b̄utu uma ede, ro kalondona sia lab̄o dipina d̄i tando Isa d̄i woha dou mamboto ede. 20 Wakatu eda b̄a Isa ndede na'e imbi siad̄oho, nggahi Sia d̄i dou ede, <<Cina, dosamu wa'ura kangampu wea.>>

21 Ahli-ahli Taurat ro dou-dou Farisi tampu'ura nuntuna d̄i sab̄ua lab̄o ma kalaina, <<Cousi dou ake, madisa kab̄awa ro katuna Allah Ta'ala? Cou ma loa kangampu wea dosa, selasi ndai Allah Ta'ala?>>

22 Isa nab̄adeku au ra sod̄i b̄a siad̄oho.Ndad̄i nggahira Sia, <<^Ba^bauku nggomid̄oho sod̄i ndedekaimu d̄ei ademu? 23 B̄e mancewi mo^da, ^dinggahi, <Dosamu wa'ura kangampu wea>, atao nggahi, <Tu'ura ro lampara!> 24 Pala ake Nahu d̄imambei bukuti d̄i nggomid̄oho b̄a one ese wawo dunia ake Nahu, Ana Manusia mantau kuasa ^dimakangampu wea dosa.>> Edempara nggahi Isa d̄i dou ma made ^binci ede, <<Tu'ura, hantapu hid̄i marukaimu, ro dulara!>>

25 Dou ede tu'u rocina d̄i tando siad̄oho sara'ana, edempara hantana hid̄i marukaina ro laona ro roi ro wadina Allah Ta'ala.

26 Siad̄oho sara'ana midi adena edempara roi ro wadina Allah Ta'ala. Siad̄oho nawancuku dahuna ro nggahina, <<^Bisa ro guna ra eda b̄a ndai d̄i ainaina ake, nawancuku hebana!>>

Isa Al Masih recena la Lewi ndad̄i anamori-Na

5:27-32

(Mat. 9:9-13; Mrk. 2:13-17)

27 Sawa'u b̄a ede Isa tu'u wi'ina kota ede ro edana sab̄ua dou mataki tagi bea, ngarana la Lewi ma wunga doho d̄i kanto bea. Nggahi Isa d̄i sia, <<^Batupu Nahu.>> 28 Ndad̄i la Lewi tu'u ki^dina ro tu'u wi'ina hid̄i ede, edempara lao b̄atuna Isa.

29 Sawa'u b̄a ede la Lewi katu'una ndiha d̄i umana d̄i ru'u b̄a Isa. Mboto dou mataki tagi bea ro dou-dou makalai mab̄atu ngaha sama lab̄o siad̄oho. 30  Pila-pila dou Farisi ro ahli-ahli Taurat badare^dena d̄i anamori Isa, <<^Ba^bauku nggomid̄oho ngaha ro nonokaimu lab̄o dou-dou mataki tagi bea ro dou-dou madosa?>>

31 Cambe b̄a Isa, <<Dou ma wati supu wati paraluna sando, pala dou ma supu mpa. 32 Nahu maiku laina ^dima'ou dou-dou ma iu wekina wa'ura taho, malaisi dou-dou ma wa'ura dosa loakud̄u siad̄oho tobana ra d̄i dosa-dosa siad̄oho.>>

Isa Al-Masih Bersama dengan Para Pendosa

Mab̄oha puasa

5:33-39

(Mat. 9:14-17; Mrk. 2:18-22)

33 Nggahi dou-dou d̄i Isa, <<Dou-dou mab̄atu la Yahya ro dou mab̄atu dou Farisi naca'u puasa ro sambea. Pala anamori^doho-Mu nangaha ro nonoku.>>

34 Cambe b̄a Isa, <<Sab̄ua nggomid̄oho maloaku kau puasa dou-dou ma mai d̄i ndihakai nika, santoi ^bunti mone mbuipu sama-samana lab̄o siad̄oho? Tantu wati! 35 Pala d̄imaraka wakatuna ^bunti mone ede ^diweha d̄i woha siad̄oho.Wakatu edeku siad̄oho ampona puasa.>>

36 Edempara Isa ngoa ro teina siad̄oho kai mbeina sab̄ua conto ro ibara b̄une ake, <<Wati wara dou ma sipa ^baju b̄ou ^diwehakaina sato^be kaen ^dinempakaina ^baju mpasa. B̄a one naka'ihaku d̄ua ndo'o baju ede. ^Baju b̄ou na'iha, ro kaen ma b̄ou ede wati ncihi ncaona lab̄o ^baju ma mpasa. 37 Ndede rauku wati wara dou ma lua anggo b̄ou d̄i ade ka^du^du huri ma mpasa, b̄ara anggo mab̄ou ede nakanci'iku ka^du^du ma mpasa ede. Nda^dina oi anggo namboho, ro ka^du^duna na'iha. 38 Anggo ma b̄ou pab̄uaku lua d̄i ade ka^du^du ma b̄ou rau. 39 Ndede rauku wati wara dou ma ne'e nono anggo mab̄ou sawa'u b̄a nonona anggo ma wa'ura ntoi. B̄a one dou ede ^dimanggahi, <Anggo ma wa'ura ntoi ede nancewi caru.> >>