Isa Al Masih kauna lao pidu mpuru dou anamorid̄oho-Na
10:1-12
10
Sawa'u b̄a ede Isa kad̄ale walina pidu mpurun dou anamori wali, edempara kauna siad̄oho lao ulu ^dua-d̄ua dou aka sanikina kota ro aka hid̄i d̄i laokai b̄a Sia. 2 Nggahi Isa d̄i siad̄oho, <<Hasi ^diweha nambotoku, pala dou makarawi sato'i mpa. B̄ara ndedena, rahopu d̄i Dou mantau oma loakud̄u nggaduna dou ^dimaweha hasi ede. 3 Laora! Nahu manggadu nggomid̄oho b̄une jimba d̄i woha lako doro. 4 Aina wa'amu dompe atao ka^du^du atao sadopa rau. Aina midimu d̄i woha ncai ^dimbeikaimu salam kone d̄i sab̄ua dou rau. 5 Nggara nggomid̄oho malu'usi d̄i ade sab̄ua uma, wa'apu salam, <Taho ro ntai d̄i ru'u b̄a uma ake.> 6 Nggara nawarasi dou ta ede ma taho ade, ndad̄i salammu ede ngge'e mpa warana d̄i dou ede; nggara watisi, salammu ede ^dimambali d̄i nggomid̄oho. 7 Ngge'epu d̄i sab̄ua uma mpa. Ngaha ro nonopu au ra ka'ambi wea ta ede d̄i ru'u b̄a nggomid̄oho, b̄ara dou ma karawi d̄imatarima ufana. Aina pesomu weki ra d̄i uma sab̄ua lao d̄i uma ma kalai. 8 Nggara nggomid̄oho malu'usi d̄i sab̄ua kota ro tarima katahona nggomid̄oho, ngahapu au ra ka'ambi wea d̄i ru'u b̄a nggomid̄oho, 9 ro katahopu dou-dou ma supu d̄i kota ede ro nggahipu d̄i siad̄oho, <Wa'ura raka wakatuna Allah Ta'ala d̄imandad̄i sangaji d̄i ru'u b̄a nggomi^doho.> 10 Pala nggara nggomid̄oho malu'usi d̄i sab̄ua kota ro nggomid̄oho wati tarima ao b̄a dou, losa laopu aka ncai bari ro nggahipu, 11 <Kone kalu^bu kotamu ma pandako d̄i ed̄i nami, nami mafura pakina d̄ikatandakai au ra rawi b̄a nggomid̄oho.Pala d̄i ^badekaimu b̄a one wa'ura raka wakatuna Allah Ta'ala d̄imandad̄i sangaji d̄i ru'u b̄a nggomi^doho!> 12 D̄i kawara b̄a nggomid̄oho, d̄i Ainaina Kiama, dou Sodom nancewi mod̄a ^dikangampu wea b̄a Allah Ta'ala ntewikaisi dou kota ede!>>Kota-kota ma wati imbi
10:13-16
(Mat. 11:20-24)
13 <<Ihara nggomid̄oho, dou-dou Korazim! Ro ihara nggomid̄oho, dou-dou Betsaida! Paisi b̄isa ro guna ra karawi d̄i woha nggomid̄oho ede wa'ura karawi d̄i kota Tirus ro kota Sidon, tantu dou-dou ta aka ntoira tobana ra d̄i dosa-dosa siad̄oho, ro kanina kani ro lombo tanda ncokikai ade ro tauna kalu^bu ese wawo tuta siad̄oho. 14 D̄i Ainaina Kiama, dou-dou Tirus ro dou-dou Sidon d̄imancewi mod̄a kangampu b̄a Allah Ta'ala ntewikaisi nggomid̄oho. 15 Ro nggomid̄oho dou-dou Kapernaum! Kacai b̄a nggomid̄oho, nggomid̄oho d̄ikad̄ese sampe ese saroga? Wati! Pala nggomi d̄ilo'o paki b̄a Allah Ta'ala aka anaraka!>>
16 Edempara nggahi Isa d̄i anamori^doho-Na, <<Dou ma ringa ro kade'e nggomid̄oho, naringa ro kade'eku Nahu. Ro cou-cou ma tula ao nggomid̄oho, dou ede natulaku Nahu. Ro dou ma tula Nahu, dou ede natulaku Sia ma ranggadu Nahu.>>
Dulana pidu mpuru dou anamori Isa Al Masih
10:17-20
17 Pidu mpuruo dou anamori Isa ede dula mbalina kai neo poda adena. Nggahi siad̄oho d̄i Isa, <<Ruma, roh-roh setan nab̄atu rauku au ra kaukai b̄a madad̄oho nggara parentasi b̄a madad̄oho kai ngara Ita Ruma!>>
18 Cambe b̄a Isa, <<Nahu edaku Iblis ma mab̄u ra d̄i langi b̄une kakila ai. 19 D̄i b̄ade b̄a nggomi^doho! Nggomid̄oho wa'ura mbei b̄a Nahu kuasa d̄i loakaimu tonda sawa ro meti ro kuasa ^diloakaimu kakoa sara'a tenggo ro ngau Iblis, ndad̄ina nggomid̄oho wati b̄oha b̄a bahaya. 20 Kone ade ndedekaina nggomid̄oho aina neo ade b̄ara roh-roh setan b̄atuna nggahi ro eli nggomid̄oho, pala neora ademu b̄ara ngaramu wa'ura tunti d̄i saroga.>>
Isa Al Masih do'a syukuna
10:21-24
21 D̄i wakatu ede wa'u, Isa neo ro sana ade-Na b̄ara kuasakai b̄a Roh Allah.p Isa nggahina, <<Ama, Ruma makuasakai langi ro dana! Mada matarima kasi d̄i Ita b̄ara sara'ana ede ra ili ro pita b̄a Ita d̄i dou-dou ma loa ro ma ntau ilmu, pala katada b̄a Ita d̄i dou-dou ma wati ntau ilmu. Edeku ma kasanana ade Ita.
22 Sara'ana wa'ura d̄onggo b̄a Ita Ama d̄i Mada. Wati kone sab̄ua dou rau ma patana Ana, selasi Ama. Wati wara rauna ma pata Ama selasi Ana; ro dou-dou ra kane'ekai b̄a Ana ede ^dikapatana d̄i Ama.>>
23 Sawa'u b̄a ede Isa tambarina d̄i anamori^doho-Na, edempara nggahina d̄i siad̄oho mpoa, <<Taho ro sanara nggomid̄oho b̄ara wa'ura edamu au ra eda b̄a nggomid̄oho wakatu ake. 24 Kawarapu: Mboto nabi ro sangaji mane'e eda au ra eda b̄a nggomid̄oho wakatu ake pala siad̄oho wati rakana eda. Siad̄oho nane'e ringa au ra ringa b̄a nggomid̄oho wakatu ake, pala siad̄oho wati rakana ringa.>>
Conto ro ibara mab̄oha dou Samaria ma taho ade
10:25-37
25 D̄i sab̄ua wakatu wara sab̄ua dou ahli Taurat tu'u ki^dina, sia nane'eku coba Isa. Sia sod̄ina d̄i Isa, <<Guru, auku d̄i pab̄ua karawi b̄a mada ^diloakaiku raka mori masapodakaina ro ma ede ro hi^di?>>
26 Cambe b̄a Isa, <<Au ra tunti d̄i ade Kitab Taurat? Au ra baca b̄a nggomi d̄i ade Kitab Taurat ede?>>
27 Cambe b̄a dou ede, << <Meci ro ca'upu Allah Ta'alamu kai more ademu, kai samore nawa ro sarumbumu, kai sara'a tenggo ro wa'u, ro kai sara'a fiki ro kananumu, ro meci ro ca'upu d̄i sasamamu manusia b̄une nggomi mameci ro ca'u sarumbu ndaimu.> >>
28 Nggahi Isa d̄i dou ede, <<Au ra cambemu ede ncihi, karawipu ede, ndad̄i nggomi ^dimamori.>>
29 Pala ahli Taurat ede nane'e kancihi weki ndaina. Ro nggahi sia d̄i Isa, <<Couku sasama mada ede?>>
30 Cambe b̄a Isa, <<Wara sab̄ua dou mone ma tu'u wi'i Yerusalem lao aka Yerikho. D̄i woha ncai sia rampo b̄a dou, weha kampoina ntauna, edempara sia kancoki b̄a parampo-parampo ede, sawa'u b̄a ede wi'i pakina dou ede kai mboto ncuwuna. 31 D̄i wakatu ede wara sab̄ua dou imam ma lampa ta ncai ede rau. Wakatu eda b̄a sia dou ede, sia peso kad̄o'ona weki d̄i dou ede, edempara lampa ro lao walina. 32 Ndede rau lab̄o sab̄ua dou Lewi ma lampa sai ta ede; wakatu eda b̄a sia dou ede, sia mai ^denina d̄i dou ede ro tio ka^baena. Pala sia rau peso kad̄o'ona weki, edempara lampa ro lao walina. 33 Pala sawa'u b̄a ede sab̄ua dou Samaria ma wunga ade lampa ro laokaina, lampa sai rauna ta ede. Wakatu sia edana dou ede, sia nawancuku kasi adena. 34 Ndad̄i sia mai ^denina d̄i dou ede edempara karaso weana suwu-suwuna kai oi anggo ro lo'ina kai mina, edempara ponte ro ^ba^bana suwu-suwu dou ede. Sawa'u b̄a ede, sia ampana dou ede ese wawo keledai ra nente b̄a ndaina, edempara wa'ana aka sab̄ua uma sewa ro kab̄ua katahona. 35 B̄ala ai sanai sia d̄onggona d̄ua mbua piti salaka d̄i dou ma ntau uma sewa ede ro nggahina, <Ka^bua katahopu sia, ro nggara nakurasi piti ake, nahu d̄imacolana wakatu nahu dula mbaliku ta ake.> >>
36 Edempara Isa kanggorina carita ede ro sod̄ina, <<Ade weki tolu dou ede ma ^beku, kananu b̄a nggomi ma karawi kai sasama manusia d̄i dou ra rampo ede?>>
37 Cambe b̄a ahli Taurat ede, <<Dou ma rabantu dou ede.>>
Isa nggahina d̄i dou ede, <<Laora ro karawipu b̄une ede rau!>>
Ibarat tentang Orang Samaria yang Baik Hati
Isa Al Masih lao lambana la Marta ro la Maria
10:38-42
38 Wakatu Isa lab̄o anamorid̄oho-Na lampa ro lao walina, siad̄oho ronggana d̄i sab̄ua kampo. Ta ede wara sab̄ua dou siwe ma ngara la Marta, tarima aona Isa d̄i umana. 39 La Marta nantau sa'e siwe ngarana la Maria. La Maria ede doho ^denina d̄i Isa, ^dikade'ekaina ngoa ro tei Sia. 40 Pala la Marta nawancuku repona kab̄ua ngaha ro nono. Sia lao rakana Isa ro nggahina, <<Ruma, sab̄ua Ruma wati kandad̄i auta la Maria co'ona mada makarawi kese? Takau to'ipu sia karawi inga mada!>>