Isa Al Masih ngoa ro teina mab̄oha do'a
11:1-13
11
D̄i sab̄ua ainaina, Isa do'ana d̄i sab̄ua hi^di. Sawa'u b̄a nggori do'ana, nggahi b̄a sab̄ua dou d̄i ade weki anamori^doho-Na, <<Ruma, tatei to'ipu d̄i madad̄oho do'a b̄une la Yahya matei do'a d̄i anamori^dohona.>>2 Edempara nggahi Isa d̄i siad̄oho, <<Nggara nggomid̄oho mado'asi, renta ndakepu,
<Ama,
Itaku Allah Ta'ala ma Kese Weki.
Raho-raho to'i mpa Ita d̄inemba ro ^dihoroma.
Itaku Sangaji b̄a mada^doho.
Raho-raho to'i mpa Ita ma parenta d̄i dunia.
3 Tambei to'ipu d̄i madad̄oho
ngaha ro nono d̄iparalu b̄a mada^dohoq d̄i sanikina ainaina.
4 Takangampu to'ipu dosa-dosa mada^doho,
b̄une madad̄oho rau makangampu wea sanikina ncara ro kancaru dou
d̄i mada^doho.
Ro aito'ina Ita co'ota madad̄oho mbora imbi wakatu madad̄oho b̄oha b̄a coba'an.> >>
Doa Bapa Kami
5 Nggahi Isa d̄i anamori^doho-Na, <<Misakai sab̄ua dou d̄i ade weki nggomid̄oho laona aka uma lengana wakatu b̄oha ai, ro nggahina, <Cina, tambei to'ipu sepe roti tolu mbua, 6 b̄a one lengaku ma wunga ade lampa ro laokaina, wunga saina d̄i uma ro nahu wati ntauku ngaha ro nono d̄i ru'u b̄a sia!> 7 Misampara lengamu ede cambe ndakena ra d̄i ade umana, <Aina hakomu nahu! Ta^da wa'ura kunci ro nahu lab̄o ana^dohoku wa'ura maru. Nahu wati loaku tu'u mbei au-au d̄i nggomi.> >>
8 <<Edempara ^buneku?>> Nggahi b̄a Isa sawa'u b̄a ede, <<Nahu manggahi, io! Konena nggomi lengana, sia wati ^dimangawa tu'u ro mbeina au-au d̄i nggomi. Pala b̄ara nggomi wati ntaumu maja raho ncau-ncaumu d̄i sia, edempara sia tu'una ro mbeina d̄i nggomi au ^diparalumu. 9 Ndad̄i, Nahu manggahi d̄i nggomi: Rahopu, ndad̄i nggomid̄oho ^dimbei; ngupapu, ndad̄i nggomid̄oho ^dimaraka; tokepu ta^da, ndad̄i ta^da ^dihengga wea d̄i ru'u b̄a nggomid̄oho. 10 B̄a one dou ma raho ^dimatarima; dou ma ngupa ^dimaraka, ro dou ma toke ta^da, ^dihengga wea ta^dana. 11 D̄i ade weki nggomid̄oho sab̄ua wara ama ma mbei sawa d̄i anana, nggara narahosi b̄a anana uta? 12 Atao mambei meti, nggara narahosi dolu? 13 Nggomid̄oho kone madab̄ae, nggomid̄oho mab̄aderauku mbei ma taho d̄i ru'u b̄a anamu. Au walipu Amamu ma wara d̄i Saroga! Sia d̄imambei Roh-Na d̄i ru'u b̄a siad̄oho ma raho d̄i Sia!>>
Isa Al Masih ro Beelzebul
11:14-23
14 D̄i sab̄ua ainaina, Isa katesana roh setan d̄i sab̄ua dou mampongi. Sawa'u b̄a losa roh setan ede, dou ede tampu'ura nuntu ro nggahina. Ndad̄i dou mamboto mbora akana, 15 pala wara ma nggahi, <<Sia loakaina katesa roh setan b̄ara kuasakai b̄a Beelzebul, mana'ekai roh setan ede.>>
16 Wara rau dou-dou makalai ma ne'e b̄ab̄u Isa, ndad̄i siad̄oho rahona Sia kalampa, lampa rawi ma^bisa ro guna tanda b̄a one Sia ramaina ra d̄i Allah Ta'ala. 17 Pala Isa nab̄adeku kananu siad̄oho.Edempara nggahi Sia, <<Nggara sab̄ua negara nancengga ro mbi'asi ndad̄i kalompo-kalompo, ro kalompo-kalompo ede nacua mususi angi, negara ede wati ntoina. Ro sab̄ua kaluarga nggara nancengga ro mbi'asi ro nacua mususi angi, kaluarga ede ^dima'iha leli. 18 Ndede rau ade karaja'an Iblis; nggara sab̄ua kalompo nancaosi lab̄o kalompo makalaina, karaja'an ede ^dimaleli. Nggahi nggomid̄oho b̄a one Nahu ma katesa roh setan b̄ara kuasa Beelzebul. 19 Nggara ndedesi, kai kuasa couku anamori^dohomu katesana roh setan ede? Anamori-anamorimu ede ma bukutina b̄a one nggomid̄oho mancara! 20 Pala Nahu katesaku roh setan kai kuasa Allah Ta'ala, ro ede aona b̄a one Karaja'an Allah nawa'ura mai d̄i woha nggomid̄oho.
21 Nggara sab̄ua dou ma tenggo ma jaga umana kai ^dahana ma ncihi, ndad̄i sara'a ntauna ^dimasalama. 22 Pala nggara nawarasi dou ma tenggo ese mai b̄a sia ma mai dei ro kakoana sia, edempara dou ma ncewi tenggo ede ^dimaweha rampa sara'a ^daha ra wi'ikai weki b̄a dou ma ntau uma ede, edempara cengga-cengga sara'ana ntau ro warana ede.
23 Dou ma wati horu Nahu, sapodakaina sia namusuku Nahu, ro dou ma wati bantu Nahu, sapodakaina naka'ihaku karawi Nahu!>>
Mai mbalina roh setan
11:24-26
(Mat. 12:43-45)
24 <<Nggara roh setan natu'u wi'isi sab̄ua dou, roh setan ede nalampa rero d̄i hid̄i-hid̄i ma mango d̄i ngupakaina hid̄i ^disanawakaina, pala sia wati rakana. B̄ara ndedena, nggahi sia, <Nahu d̄imalao mbali aka uma ra tu'u wi'i b̄a nahu!> 25 Wakatu roh setan ede ronggana ta aka, sia edana uma ede caru raso ro mocina. 26 Edempara sia laona ro wa'ana pidu roh setan makalai ma ncewi dab̄ae ntewikaisi sia. Sawa'u b̄a ede sara'a roh setan ede lu'u ngge'ena d̄ei dou ede. Ro cumpukaina ka'ada'an dou ede nancewi iha ro dab̄ae ntewikaisi sawatipu b̄a ede.>>
Mori mataho ro sana
11:27-28
27 Sawa'u b̄a Isa nggori nggahi ndedena, sab̄ua dou siwe d̄i ade weki dou mamboto ede nggahina d̄i Isa, <<Na'ipiku taho ro sanana dou siwe ma ranggana ro ma rasusuna Ita!>>
28 Pala cambe b̄a Isa, <<Nancewi taho ro sana walipu dou ma ringa ro kade'e nggahi ro eli Allah Ta'ala ro makalampana!>>
Diberkahilah Mereka yang Mendengar & Melakukan Perkataan Isa Al-Masih
Dou-dou rahona Isa Al Masih karawi ma b̄isa ro guna
11:29-32
(Mat. 12:38-42)
29 Wakatu Isa wunga kahumbu b̄a dou mamboto, nggahi Isa, <<Nawancuku dab̄aena dou-dou jaman ake. Siad̄oho rahona lampa rawi ma^bisa ro guna loakud̄u siad̄oho imbina d̄i Nahu, pala siad̄oho wati d̄imbei kone sab̄ua lampa rawi ma^bisa ro guna, selasi b̄isa ro guna Nabi Yunus ntoina. 30 ^Bune santika au ra karawi b̄a Nabi Yunus ma ndad̄i tanda d̄i ru'u b̄a dou-dou d̄i kota Niniwe, ndede rauku au ra karawi b̄a Nahu, Ana Manusia d̄imandad̄i tanda d̄i ru'u b̄a dou-dou jaman ake. 31 D̄i wakatu ainaina kiama, Sangaji siwe dana ro rasa ta wela ^Do-na ^dimamori mbali sama-sama lab̄o dou-dou jaman ake, ro ma^ba^bu ro lo'ona siad̄oho.B̄ara ne'ena ringa ro kade'e ngoa ro tei b̄a la Sulaiman ma loa timba ro lemba, Sangaji siwe ede lampa ro laona ma d̄o'o poda ratampu'u aka sumpu dana. Pala ta ake wara ma ncewi na'e ntewikaisi la Sulaiman! 32 Wakatu Ainaina Kiama, dou-dou Niniwe ^dimamori mbali sama-sama lab̄o dou-dou jaman ake, ro b̄ab̄u ro lo'ona siad̄oho, b̄ara dou Niniwe ede wa'ura tobana ra d̄i dosa-dosa siad̄oho wakatu siad̄oho ngoa ro tei b̄a la Yunus. Pala ta ake wara ma ncewi na'e ntewikaisi la Yunus!>>
Mataroa ro marindi
11:33-36
33 <<Wati wara dou ma ka'a ilo edempara cilina atao ^bontona kai roa.r Sia nawi'iku ilo ede d̄i ed̄i ilo, loakud̄u dou ma lu'u naloaku eda taroana. 34 Mada eded̄u ilo d̄i ru'u b̄a sarumbu. Nggara nataho taroasi madamu, sara'a sarumbumu nataroa poda. Pala nggara nagawusi madamu, sara'a sarumbumu nandad̄i rindi ncaki. 35 B̄ara ndedena, aina kabare, ai to'ina taroa ma wara d̄i nggomid̄oho ede ndad̄i rindi poda. 36 Nggara sara'a sarumbumu nataroasi, ro wati wara kone sato'i ma rindi, ndad̄i sara'a sarumbumu ede nawancuku taroa podana b̄une hina b̄a cahaya ilo.>>
Isa Al Masih kancarana dou-dou Farisi ro ahli-ahli Taurat
11:37-54
37 Sawa'u b̄a Isa nggori nuntu ro nggahi-Na, Sia rece b̄a sab̄ua dou Farisi mai ngaha d̄i umana. Edempara Isa lao ngahana ta ede. 38 Dou Farisi ede midi adena eda Isa ma ngaha kai wati waca wa'una rima-Na b̄une atoran agama. 39 B̄ara ndedena nggahi Isa d̄i sia, <<Poda romo nggomid̄oho dou-dou Farisi ranginakaimu karaso mangko ro pingga ta b̄ae arina, pala ta d̄ei sarumbu ndaimu b̄ini b̄a toku ro kasa ro rawi mada^bae. 40 Nggomi^doho, dou ma sampula! Sab̄ua laina Allah Ta'ala ma randawina ta wela arina, ro ndawi rauna ta wela ^deina? 41 Ma wara d̄i ade mangko ro pinggamu ede, edeku d̄i pab̄ua mbei b̄a nggomid̄oho d̄i dou-dou mancoki mori. Kai cara ede, sara'ana d̄imandad̄i raso d̄i ru'u b̄a nggomid̄oho.
42 Ihara nggomid̄oho, dou-dou Farisi! Hasi nggud̄a ro conggemu b̄une selasih ro inggu ro marakani lo'i makalaina; nggomid̄oho mbeimu saru'u ade ra cengga sampuru d̄i ru'u b̄a Allah Ta'ala, pala meci ro ca'u ro adilna Allah Ta'ala wati kandad̄i au b̄a nggomid̄oho.Sapodakaina edeku d̄i pab̄ua karawi b̄a nggomid̄oho, kai wati nefamu ma kalai-lai rauna.
43 Ihara nggomid̄oho, dou-dou Farisi! Nggomid̄oho maca'u hid̄i-hid̄i ma taho d̄i ade uma sambea ro ibadakai, ro maca'u ^dihoroma b̄a dou d̄i amba-amba. 44 Ihara nggomi^doho! Nggomid̄oho sama b̄une rade ma wati ntau wadu tanda, ra tonda-tonda b̄a dou kai wati ^badena.>>
45 Sab̄ua dou d̄i ade weki ahli-ahli Taurat ede nggahina d̄i Isa, <<Guru, kai nggahi ndedemu, Ita makab̄awa ro katuna rauku mada^doho!>>
46 Cambe b̄a Isa, <<Ihara nggomid̄oho rau, ahli-ahli Taurat! Nggomid̄oho kau pa^buamu kalampa lampa rawi ma nggonggi ro mbeimu atoran-atoran ma tani, pala ndai nggomid̄oho kone sato'i rau wati ne'emu bantu dou makalampana. 47 Ihara nggomi^doho! Nggomid̄oho ndawimu rade d̄i ru'u b̄a nabi-nabi, sapodakaina nabi-nabi ede rahade b̄a wa'i ro waro ndai^dohomu. 48 Ndad̄i ndai nggomid̄oho mangakumu b̄a one nggomid̄oho ma kapodana au ra wa'u karawi b̄a wa'i ro waromu; b̄ara sia^dohoku ma rahadena nabi-nabi ede ro nggomi^dohoku ma ndawina radena. 49 B̄ara ndedena timba ro lemba Allah Ta'ala manggahi, <Nahu d̄imanggadu nabi-nabi ro dou-dou d̄i ru'u b̄a nggomi^doho; sarundena rahade ro sarunde walina rakancoki!> 50 Allah Ta'ala karawi ndedekaina loakud̄u dou-dou jaman ake d̄ihukum b̄ara rahade sara'ana nabi ra'aipu saramba kandad̄i dunia, 51 ratampu'u aipu rahade la Habel sampe wakatu hadekai la Zakaria d̄i hela d̄ua mezba lab̄o Bait Allah. Imbipu: Dou-dou jaman ake tantu d̄ihukum b̄ara sara'ana ede.
52 Ihara nggomid̄oho, ahli-ahli Taurat, b̄a one kunci ^dihenggakai loa ro tingi wara d̄i nggomid̄oho, pala ndai nggomid̄oho wati ne'emu lu'u ta ^deina ro dou ma ne'e lu'u, tapa ao b̄a nggomid̄oho.>>