Isa Al Masih katahona supu ada Perwira Roma
7:1-10
(Mat. 8:5-13)
7
Sawa'u b̄a nggori nuntu ro nggahi-Na d̄i tando dou mamboto, Isa laona aka Kapernaum. 2 Ta ede wara perwira Roma ma ntau ada ro na'ipiku mecina adana ede. Ada perwira ede nasupuku ro nane'era made. 3 Wakatu perwira ede ringana haba mab̄oha Isa, sia kauna pila-pila dou ma tuakai Yahudi lao raka Isa ^dirahokaina loakud̄u Sia maina ro kataho adana. 4 Wakatu dou-dou ra kakai ede ronggana d̄i Isa, siad̄oho raho poda-podana loakud̄u Sia bantuna perwira ede. Nggahi siad̄oho d̄i Isa, <<Perwira ake patu ^dibantu b̄a Ita, 5 b̄ara sia nawancuku meci ro ca'una bangsa ndaita ro wa'ura katu'una hid̄i sambea ro ibadakai d̄i ru'u b̄a mada^doho.>>6 Edempara Isa laona lab̄o siad̄oho.Wakatu Isa ne'empara rongga d̄i uma ede, perwira ede kauna lenga^dohona lao raka Isa d̄i ne'ekaina ngoa, <<Ita aina kasusa weki lao aka uma mada. Mada wati patuna d̄imatarima ao Ita d̄i uma mada. 7 B̄ara ndedena ndai mada wati disaku mai satando angi lab̄o Ita. Ndad̄i renta mpa sab̄ua nggahi ndad̄i ada mada ede ^dimataho. 8 B̄a one mada rau kab̄atu au ra parentakai b̄a dou ma ese mai b̄a mada ro ma awa mai b̄a mada wara rau tentara-tentara ma pab̄uaku b̄atuna au ra parentakai b̄a mada. Nggara kausi b̄a mada d̄i tentara, <Lao!> Sia ^dimalao; ro nggahisi b̄a mada ^dimakalaina, <Maipu ta ake!> Sia ^dimamai. Ro kausi b̄a mada ada mada, <Karawipu ake!> Sia nakarawiku.>>
9 Isa midi adena ringa nggahi dou ede. Sia tambarina ro nggahina d̄i dou mamboto ma wunga lampa b̄atu Sia, <<Heba poda dou ake. Kone d̄i ade woha dou Israel watipu parana eda b̄a Nahu imbi ma na'e b̄une ake!>>
10 Wakatu dou ra kakai ede dula mbalina aka uma perwira ede, adana ede nawa'ura taho.
Isa Al Masih kamori mbalina ana b̄a dou siwe mbaru mboha
7:11-17
11 Wati ntoina sawa'u b̄a ede,g Isa laona aka kota Nain. Anamori^doho-Na ro dou mboto ma lao sama lab̄o Sia. 12 Wakatu Isa ne'era rongga aka ta^da lawa kota, dou-dou wunga lao otona dou ma made ede ari mai b̄a kota. Dou ma made ede eded̄u dou mone, sab̄ua ede mpa anana b̄a dou siwe mbaru mboha ede. Mboto dou kota ma lao lab̄ona dou siwe mbaru mboha ede. 13 Wakatu eda b̄a Ruma Isa dou siwe mbaru mboha ede, Sia kasi adena d̄i sia, edempara nggahina, <<Ina, aina nangi!>> 14 Edempara Isa lao ^denina salence ra kalei b̄a dou ede ro ^damana. Edempara dou-dou ma kalei salence ede midina. Nggahi Isa, <<Oe ana mone, Nahu makau nggomi, tu'ura!>> 15 Ana dou mone ma wa'ura made ede, tu'u dohona ro tampu'ura nuntu ro nggahina. Edempara Isa d̄onggona ana dou mone ede d̄i inana.
16 Sara'a dou ndad̄i dahu ro tampu'ura roi ro wadina Allah Ta'ala. Nggahi siad̄oho, <<Sab̄ua nabi ma na'e wa'ura mai d̄i ade woha ndaita! Allah Ta'ala nawa'ura mai ^dimakasalama ela-Na!>>
17 Haba mab̄oha Isa ake wa'ura mbou d̄i sara'a Yudea ro d̄i dana ro rasa d̄i kompe ro peina.
Nabi Yahya dalam Penjara
Dou ra kakai b̄a la Yahya Mataki kandeu raso dou
7:18-35
(Mat. 11:2-19)
18 Wakatu ringa b̄a la Yahya mab̄oha lampa rawi ede d̄i anamori^dohona, sia ouna d̄ua dou anamorina, 19 edempara kauna siad̄oho lao raka Ruma Isa ro so^di, <<Sab̄ua Ita d̄imamai b̄une ra sake b̄a Allah Ta'ala, atao pab̄uaku madad̄oho ngena dou makalai?>>
20 ^Dua dou anamori la Yahya ede laona d̄i Isa ro nggahina, <<Santa^be Ruma, la Yahya Mataki kandeu raso dou, makau madad̄oho mai sod̄i Ita, sab̄ua Ita dou d̄imamai ra sake b̄a Allah Ta'ala, atao pab̄uaku madad̄oho ngena dou makalai?>>
21 Wakatu ede, Isa katahona dou mamboto, ro katesa kalosana mboto roh setan ro katahona dou mambuda ndad̄i loa eda. 22 Ndad̄i cambe b̄a Isa, <<Lao mbalipu aka la Yahya ro ngoapu au ra ringa ro ra'eda b̄a nggomi^doho: dou mambuda naloa eda, dou mamade ^binci naloa lampa, dou ma supu ncolah nataho, dou mampinga naloa ringa, dou ma wa'ura made ndad̄i mori mbali, ro Haba Mataho ma ramai ra d̄i Allah Ta'ala d̄ingoa ro kahaba d̄i dou-dou mancoki mori. 23 Taho ro sanara d̄i ru'u b̄a dou ma ngge'e mpa imbina d̄i Nahu.>>
24 Sawa'u b̄a lao dou-dou ra kakai b̄a la Yahya ede, Isa tampu'ura nuntu ro nggahi-Na d̄i dou mamboto mab̄oha la Yahya, nggahi-Na, <<Nggomid̄oho laomu aka so sarae, auku lao tiomu? Sab̄ua malao tioku salela mpori ra ewu b̄a angi? 25 Nggomid̄oho auku lao tiomu? Sab̄ua ma lao tioku dou makani, kani ro lombo ma ntika? Dou-dou ma kani b̄une ede ro ma mori ma remba nangge'e d̄i asi sagaji! 26 Ndad̄i, nggomid̄oho laomu ta aka, auku lao tiomu? Sab̄ua malao tioku sab̄ua nabi? Ncihi romo, dou ede nancewi ese ntewikaisi nabi. 27 B̄a one mab̄oha la Yahya edeku ra tunti d̄i ade ayat Kitab Suci ake,
<Akeku dou ra nggadu b̄a Nahu,> nggahi Allah Ta'ala,
<Nahu d̄imanggadu ulu sia sawatipu b̄a Nggomi,
loakud̄u sia d̄imahengga ulu ncai d̄i ru'u b̄a Nggomi!> >>
28 Nggahi b̄a Isa, <<D̄i kawara b̄a nggomid̄oho, d̄i dunia ake watipu wara dou ma ncewi d̄ese ro ntasa b̄une la Yahya Mataki kandeu raso dou. Pala dou ma to'i poda d̄i ade weki ela Karaja'an Allah, nancewi na'e ntewikaisi la Yahya Mataki kandeu raso dou.>>
29 Sara'a dou -- wara dou-dou mataki tagi bea rau -- maringa ro kade'e au ra nggahi b̄a Isa mab̄oha lampa rawi ede; siad̄oho edeku dou-dou ma wa'ura to'a kalampa au ra kaukai b̄a Allah Ta'ala ro nangawa d̄ikandeu raso b̄a la Yahya. 30 Pala dou-dou Farisi ro ahli-ahli Taurat wati ngawana tarima au ra nia b̄a Allah Ta'ala d̄i ru'u b̄a ndai siad̄oho.Nda^dina siad̄oho wati ngawana d̄ikandeu raso b̄a la Yahya.
31 Edempara Isa nuntu ro nggahi walina, <<Kai auku d̄ipab̄ua ntewikai b̄a Nahu, dou-dou jaman ake? ^Bune auku siad̄oho ede? 32 Siad̄oho ede b̄une santika d̄ambe-d̄ambe to'i ma doho d̄i amba ma ou nggao lenga^dohona, <Nami ma ufi jalitu d̄i ru'u b̄a nggomid̄oho, pala nggomid̄oho wati ngawamu joge! Nami marawa ^dilalaikai ade, pala nggomid̄oho wati ngawamu nangi nduru!> 33 La Yahya Mataki kandeu raso dou maina -- sia puasana ro wati nonona anggo -- ro nggahi b̄a nggomid̄oho, <Sia ralu'ukai b̄a setan!> 34 Ana Manusia maina -- Sia ngaha ro nonona -- edempara nggahi b̄a nggomid̄oho, <<Tiopu dou aka! Na'e ngahana, naca'u mawu, lenga dou mataki tagi bea ro lenga dou ma dosa.> 35 Kone ade ndedekaina, timba ro lemba Allah Ta'ala wa'ura wara pahuna d̄i ade sara'a dou ma tarimana.>>
Isa Al Masih d̄i uma la Simon
7:36-50
36 Sab̄ua dou Farisi, ma ngara la Simon, undana Isa mai ngaha d̄i umana. Isa laona aka uma la Simon ro doho ngahana. 37 D̄i kota ede wara sab̄ua dou siwe sunda. Wakatu ringa b̄a sia b̄a one Isa wunga ngahana d̄i uma dou Farisi ede, sia mai wa'ana sab̄ua boto marmar, isina mina mengi. 38 Sia ki^dina d̄i kontu Isa d̄i kompe e^di-Na, sia nangi ro ^becana ed̄i Isa kai oi madana. Sawa'u b̄a ede osa kamangona ed̄i Isa kai honggona edempara ngiluna ed̄i Isa ro luana kai mina mengi. 39 Wakatu dou Farisi ma ra'unda Isa edana lampa rawi ede, nggahi sia d̄ei adena, <<Nggara napodasi dou ake nabi, tantu Sia nab̄adeku cou dou siwe ma tudu Sia, ro b̄a one dou siwe ede mori b̄ini b̄a dosa!>>
40 Edempara nggahi Isa d̄i la Simon, <<Simon, Nahu wara ne'eku nggahi d̄i nggomi.>>
Cambe b̄a la Simon, <<Io, Guru, tanggahira.>>
41 Nggahi Isa, <<Wara d̄ua dou ma nconggo d̄i dou ma mbei sepe piti. Ma sab̄ua dou manconggo 500 piti salaka, ro sab̄ua dou wali ma mpuru piti salaka. 42 Dou d̄uana ede, wati wa'una cola nconggona ede, edempara nconggo siad̄oho ede fura kampoi b̄a dou ma ntau piti. Couku d̄i ade weki dou d̄uana ede d̄imancewi meci ro ca'u d̄i dou ma rambeina sepe piti ede?>>
43 Cambe b̄a la Simon, <<Nggahi mada, dou ma ipi mboto rafura weana nconggona edeku!>>
Nggahi b̄a Isa, <<Ncihi cambemu ede.>> 44 Edempara Isa tambarina d̄i dou siwe ede ro nggahi-Na d̄i la Simon, <<Nggomi ma'edaku dou siwe ake? Nahu maiku d̄i uma nggomi, nggomi wati sadia weamu Nahu oi ^dikarasokai ed̄i Nahu; pala dou siwe ake wa'ura karasona ed̄i Nahu kai oi madana, ro osa kamangona kai honggona. 45 Nggomi wati ngilu aomu Nahu, pala dou siwe ake wati dengga-denggana ngilu ed̄i Nahu ratampu'u Nahu ronggaku ta ake. 46 Nggomi wati luamu mina d̄i tuta Nahu, pala dou siwe ake wa'ura luana mina mengi d̄i ed̄i Nahu. 47 B̄ara ndedena Nahu manggahi d̄i nggomi: meci ro ca'una ma na'e ede tanda b̄a one dosana ma mboto wa'ura kangampu wea! Nggara dou ^dikangampu wea sato'i, sia ^dimameci ro ca'u sato'i rau.>>
48 Edempara nggahi Isa d̄i dou siwe ede, <<Dosa-dosamu wa'ura kangampu wea.>>
49 Dou-dou makalai ma doho ngaha sama lab̄o Isa tampu'ura nggahina d̄i sab̄ua lab̄o ma kalaina, <<Cousi dou ake sampe loana kangampu wea dosa dou?>>
50 Pala nggahi Isa d̄i dou siwe ede, <<B̄ara nggomi imbimu d̄i Nahu, nggomi ^dikasalama. Laora kai salama!>>
Isa Al-Masih Mengampuni Wanita yang Berdosa