Conto ro ibara mab̄oha dou siwe mbaru mboha lab̄o Hakim
18:1-8
18
Sawa'u b̄a ede Isa Al Masih caritana sab̄ua conto ro ibara d̄ingoa ro teikaina anamorid̄oho-Na loakud̄u siad̄oho do'a ncau-ncauna ro aina to'i ade. 2 Nggahi Isa, <<D̄i sab̄ua kota wara sab̄ua dou hakim ma wati dahu d̄i Allah Ta'ala, ro wati kaco'ina kone cou-cou rau. 3 D̄i kota ede wara rau sab̄ua dou siwe mbaru mboha ma ntuwura mai satandona hakim ede, sia rahona parakarana ^dibela wea b̄a hakim ede. Nggahi dou siwe mbaru mboha ede, <Tabantu to'ipu parakara mada kai adil ade satando kaiku angi lab̄o musu mada.> 4 Pila-pila wakatu ntoina hakim ede wati ngawana bantu dou siwe mbaru mboha ede. Pala cumpukaina kananu b̄a hakim ede, <Nahu kone wati dahuku d̄i Allah Ta'ala ro wati kaco'iku cou-cou rau, 5 pala b̄ara dou siwe mbaru mboha ake nakasusa ncauku nahu, natahopu nahu bela weaku parakarana. Nggara watisi ndedena, sia namai ncau-ncau ro nakasusa ncauku nahu.> >>6 Edempara nggahi Isa, <<Kade'e kab̄aepu au ra nggahi b̄a hakim ma wati adil ede! 7 Sab̄ua Allah Ta'ala wati ^dimabela weana parakara ela ndai-Na ma raho bantu d̄i Sia d̄i aimarai ro d̄i aimanga^di? Sab̄ua Sia nakanajo-najoku wakatuna d̄i bantukaina siad̄oho? 8 Imbipu: Sia ^dimabela roci parakara sia^doho! Pala namaisi Ana Manusia, sab̄ua mbuipu d̄i raka eda dou ma imbi d̄i Sia d̄i dunia ake?>>
Conto ro ibara dou Farisi lab̄o dou ma taki tagi bea
18:9-14
9 Isa carita rauna conto ro ibara ake, nggahi b̄a Sia d̄i ru'u b̄a dou ma kab̄awa ro katuna dou makalai, pala na'imbi podaku b̄a one weki ndaina taho. 10 Nggahi Isa, <<Waraku d̄ua dou ma lao aka Bait Allah, siad̄oho nane'e sambea. Ma sab̄ua dou Farisi, ma kalai sab̄ua dou ma taki tagi bea. 11 Dou Farisi ede ki^di lao kalai ndaina ro sambeana,y <Io Allah Ta'ala, mada ma renta syuku d̄i Ita, b̄ara mada wati b̄une dou makalai, ma na'e ade, ma tipu dou, atao makarawi jina. Mada syuku poda b̄ara mada wati b̄une dou mataki tagi bea aka. 12 Mada puasaku d̄ua kali saminggu, ro mada d̄onggo ro mbeiku d̄i ru'u b̄a Ita saru'u ade ra cengga sampuru d̄i ade sara'a au ra raka b̄a mada.> 13 Pala dou mataki tagi bea ede ki^di kad̄o'ona wekina ro wati disana ^donga langi. Sia sarerena lawilina ro nggahina, <Io Allah Ta'ala, takasi to'ipu adeta d̄i mada, dou ma wa'ura dosa ake!> >>
14 Isa nggahi walina,<<Imbipu, wakatu dulana d̄i uma, dou mataki tagi bea edeku ^ditarima b̄a Allah Ta'ala ro laina dou Farisi ede. B̄a one sanikina dou ma ka'ese weki ^dika'awa; ro sanikina dou ma ka'awa weki ^dika^dese.>>
Ibarat tentang Orang dari Mazhab Farisi dengan Pemungut Cukai
Isa Al Masih barekana d̄ambe-d̄ambe to'i
18:15-17
15 Wara dou-dou mawa'a d̄ambe-d̄ambe to'i d̄i Isa loakud̄u Sia ^dama ro mbeina bareka d̄i siad̄oho.Wakatu eda b̄a anamorid̄oho-Na lampa rawi ede, siad̄oho mbanina d̄i dou-dou ede. 16 Pala Isa ouna d̄ambe-d̄ambe to'i ede ro nggahina d̄i anamori^doho-Na, <<Co'opu d̄ambe-d̄ambe to'i maina d̄i Nahu! Aina kantamu siad̄oho, b̄ara dou b̄une akeku ma ndad̄i anggota ela Karaja'an Allah. 17 Kawarapu! Dou ma wati mai satando d̄i Allah Ta'ala b̄une d̄ambe to'i, wati d̄imandad̄i anggota ela Karaja'an Allah.>>
Mab̄oha dou mantau ro wara
18:18-30
18 Sab̄ua dou mana'ekai dou Yahudi sod̄ina d̄i Isa, <<Guru ma taho, auku d̄i pab̄ua karawi b̄a mada loakud̄u rakaku mori masapodakaina ro ma ede ro hi^di?>>
19 <<^Ba^bauku nggomi nggahikaimu b̄a one Nahu taho?>> So^di b̄a Isa d̄i dou ede. Wati wara ma taho, selasi ndai Allah Ta'ala. 20 Nggomi wa'ura b̄ademu au ra parentakai b̄a Allah Ta'ala: <Aina jina, aina hade dou, aina mpanga, aina sakasi cowa, ro lia ro horomapu ama ro inamu.> >>
21 Cambe b̄a dou ede, <<Sara'a parenta ede wa'ura b̄atu b̄a mada ra'aipu to'i wa'uku.>>
22 Ringana nggahi dou ede, ndad̄i nggahira Isa, <<Mbuipu wara sab̄ua lampa rawi d̄i pab̄ua karawi b̄a nggomi: Landa kampoipu ntau ro waramu ede, mbeipu piti co'i ntau ro waramu ede d̄i dou mancoki mori, ro nggomi d̄imaraka ntau ro wara d̄i saroga. Sawa'u b̄a ede mai ^batupu Nahu.>> 23 Pala wakatu ringana nggahi ndede Isa, dou ede susa adena b̄ara sia na'ipiku ntau ro warana.
24 Isa nab̄adeku b̄a one dou ede nasusa adena, b̄ara ndedena nggahi Sia, <<Nawancuku nggonggi podana d̄i ru'u b̄a dou mantau ro wara d̄imandad̄i anggota Karaja'an Allah! 25 Nancewi mo^dapu sab̄ua onta lu'u d̄i karonga nda'u ntewikaisi lab̄o sab̄ua dou mantau ro wara lu'u ade Karaja'an Allah.>>
26 Dou-dou ma ringa nggahi ndede Isa, sod̄ina, <<Nggara ndedesi, couku ma loa salama?>>
27 Cambe b̄a Isa, <<Au ma wati lu'ukai b̄a aka manusia, naloaku b̄a Allah Ta'ala!>>
28 Edempara nggahi la Petrus, <<Tatio to'ipu! Madad̄oho wa'ura tu'u wi'imu uma ro salaja b̄a ne'emu b̄atu Ita.>>
29 Nggahi Isa, <<Imbipu! Dou ma wa'ura tu'u wi'i umana, atao weina, atao sa'e ro arina, atao ama ro inana atao ana-anana b̄ara karawi weana d̄i ru'u b̄a Allah Ta'ala, 30 d̄i wakatu ake wa'u, dou ede d̄imatarima mbali ma mancewi mboto, ro d̄i jaman ma kento, sia d̄imbei mori masapodakaina ro ma ede ro hi^di.>>
Isa Al Masih ngoana ma katolukalikaina mab̄oha madekai-Na
18:31-34
31 Isa kab̄oro kalaina sampuru d̄ua anamori-Na, edempara nggahi-Na, <<Ringa ro kade'epu! Ndai ake wunga laota aka Yerusalem. Ta aka, sara'a au ra tunti b̄a nabi-nabi mab̄oha Ana Manusia, ^dimanda^di. 32 Sia ^di^donggo d̄i dou-dou ma laina Yahudi. Sia ^dikasungge-sungge, d̄ikab̄awa ro katuna ro ^dikatufe. 33 Siad̄oho ^dimakancoki ro ^dimahade Sia, pala d̄i ainaina makatolukaina, Sia ^dimamori mbali.>>
34 Sara'ana ede wati loana ka'ao kone sato'i rau b̄a anamorid̄oho-Na ede. Aona nggahi ro eli-Na ede wati ^dikatada d̄i siad̄oho.Siad̄oho wati b̄adena auku aona nuntu ro nggahi Sia.
Isa Al-Masih Menubuatkan Kematian dan Kebangkitan-Nya
Isa Al Masih katahona dou mambuda
18:35-43
35 Wakatu Isa ne'era rongga d̄i Yerikho, wara sab̄ua dou mambuda ma wunga doho raho sadeka d̄i kengge ncai. 36 Wakatu ringa b̄a sia, dou mboto ma lampa sai ta ede, sod̄i b̄a sia, <<Au ma nda^di?>>
37 Nggahi siad̄oho d̄i sia, <<Isa, dou Nazaret ede malampa sai hid̄i ake.>>
38 Edempara dou mambuda ede kanggicana, <<Isa, ana Daud! Takasi to'ipu adeta d̄i mada!>>
39 Dou-dou ma lampa ulu, mbanina d̄i dou ede ro kauna sia midi. Pala sia nanaha kanggica kana'e wali, <<Ana Daud! Takasi to'ipu adeta d̄i mada!>>
40 Edempara Isa midina ro kauna dou wa'a dou mambuda ede d̄i Sia. Wakatu dou mambuda ede ronggana d̄i Isa, sod̄i b̄a Isa, 41 <<Auku d̄i ne'e b̄a nggomi d̄ikarawi wea b̄a Nahu?>>
Cambe b̄a dou ede, <<Ruma, mada kane'e loa eda.>>
42 Edempara nggahi Isa, <<Nggara ndedesi, ake nggomi maloara eda! B̄ara nggomi poda imbimu d̄i Nahu, nggomi tahora supumu.>>
43 Wakatu ede lalo sia loana eda, edempara sia b̄atuna Isa ro rentana syuku d̄i Allah Ta'ala. Wakatu eda b̄a dou mamboto ede lampa rawi ede, siad̄oho sara'ana roi ro wadina Allah Ta'ala.
Isa Al-Masih Menyembuhkan Bartimeus yang Buta