Isa Al Masih wati tarima b̄a dou d̄i Nazaret
6:1-6
6
Edempara Isa Al Masih dula sama-samana lab̄o anamorid̄oho-Na lao aka kampo ro mporo ndai-Na. 2 D̄i ainaina Sabat Sia tampu'ura ngoa ro teina d̄i uma sambea ro ibadakai. Wara mboto dou ta ede. Wakatu dou-dou ede ringana ngoa ro tei Isa, siad̄oho nawancuku mbora akana. Nggahi siad̄oho, <<Ra ta ^bena Dou ake rakakaina sara'ana ede? Hikima ma b̄une pahu ra mbei d̄i Sia? ^Buneku loakaina Sia karawi lampa rawi ma^bisa ro guna? 3 Sab̄ua laina Sia akesi ana la Yusuf panggita haju? Ana la Maria, sa'e la Yakub, Yoses, Yudas ro la Simon? Amancawa^doho-Na wara ma midi ta ake rau.>> B̄ara ndedena siad̄oho tulana Sia.4 Edempara Isa Al Masih nggahina d̄i siad̄oho, <<Sab̄ua nabi ^dilia ro horoma ta ^be-^be, selasi d̄i kampo ro mporo ndaina, ro d̄i ade woha cina ro angina ro iwa ro wekina.>>
5 D̄i hid̄i ede Isa Al Masih wati karawina lampa rawi ma^bisa ro guna kone sab̄ua rau, selasi katahona pila-pila dou masupu kai tohona rima-Na ese wawo doud̄oho ede. 6 Sia mbora akana b̄ara siad̄oho wati imbina d̄i Sia.
Isa Al Masih nggaduna sampuru d̄ua dou anamori-Na
6:7-13
Edempara Isa laona aka rasa-rasa d̄i kompe ro pei ede, ro ngoa ro teina. 7 Sia ouna sampuru d̄ua dou anamori-Na, edempara nggaduna siad̄oho ^dua-d̄ua ro mbeina kuasa d̄i siad̄oho ^dikatesakaina roh-roh setan. 8 Nggahi-Na d̄i siad̄oho, <<Aina wa'amu au-au ade lampa ro laokaimu, selasi tiki. Aina wa'amu osu atao piti rau d̄i ade salepe. 9 Loa kani sadopa, pala aina wa'amu d̄ua ndo'o ^baju.>> 10 Sia nggahi rauna, <<Nggara nggomid̄oho malu'usi d̄i ade sab̄ua uma, ngge'epu ta ede sampe nggomid̄oho tu'u wi'imu kota ede. 11 Pala nggara nggomid̄oho maronggasi aka sab̄ua hid̄i ro dou-dou ta ede wati tarima ro kade'ena au ra nggahi b̄a nggomid̄oho, tu'u wi'ipu hid̄i ede. Fura pakipu kalu^bu ma wara d̄i kopa e^dimu, d̄imandad̄i tanda kawarakai rawi sia^doho!>>.
12 Edempara sampuru d̄ua anamori Isa Al Masih ede laona. Siad̄oho lao ngoa ro kahabana b̄a one manusia pab̄uaku mangakuna dosa-dosana ro pakina rawina ma mada^bae. 13 Ro siad̄oho katesana mboto roh setan ro borena kai mina zaitun d̄i dou masupu ro katahona supu siad̄oho.
Madena la Yahya Mataki kandeu raso dou
6:14-29
14 Haba mab̄oha sara'a mandad̄i ede rongga rau d̄i sangaji Herodes,j b̄ara ngara Isa Al Masih nawa'ura mbou ta ^be-^be. Wara dou ma nggahi, <<La Yahya Mataki kandeu raso dou nawa'ura mori mbali! B̄ara ndedena Sia ntaukaina kuasa d̄imakarawi ma^bisa ro guna ede.>>
15 Pala dou-dou makalai manggahi, <<Sia la Elia.>>
Wara rau ma nggahi, <<Sia nabi, b̄une sab̄ua dou ade weki nabi jaman ma'ulu.>>
16 Wakatu sangaji Herodes ringana ede, nggahi sia, <<Tantu ake la Yahya Mataki kandeu raso dou ra wa'u kau b̄a nahu fati kakori tutana. Ake sia nawa'ura mori mbali!>>
17 B̄ara sawatipu b̄a ede sangaji Herodes wa'ura kauna dou wa'u ro leto la Yahya, ro kalu'una d̄i ade uma bui. Sangaji Herodes karawi ndedekaina b̄ara la Herodias, wei ari ndaina, eded̄u la Filipus. B̄a one Herodes nawa'ura nika lab̄o la Herodias, 18 ro mab̄oha lampa rawi ede la Yahya wa'ura ntuwu rojona sangaji Herodes b̄une ake, <<Wati loamu nika lab̄o wei ari ndaimu ede!>>
19 B̄ara ndedena la Herodias wi'ina d̄ei adena rawi la Yahya ro nane'eku hade la Yahya, pala sia wati loana kalampa rawi ede, b̄ara tapa b̄a sangaji Herodes. 20 B̄a one Herodes wa'ura jaga katahona la Yahya d̄i uma bui b̄ara sia nahoromaku la Yahya. Sia nab̄adeku la Yahya sab̄ua dou ma taho ro raso ra nggadu b̄a Allah Ta'ala. Ro poda romo nggara nuntusi la Yahya, Herodes naca'u ringa rau, konena sia ndad̄i darura poda adena b̄ara ringana ede.
21 Cumpukaina la Herodias rakana wakatu ma taho d̄i ainaina ndiha rawarakai sangaji Herodes. Wakatu ede Herodes katu'una ndiha d̄i ru'u b̄a samenana dou mana'e b̄ora d̄i karaja'an, perwira-perwira ro dou-dou mana'ekai ela ro dou Galilea. 22 Ade ndihakai ede ana sampela siwe la Herodiask matari, ro tarina ede nawancuku kasana weana ade Herodes ro dou-dou ma mai ede. Edempara sangaji Herodes nggahina d̄i ana dou sampela ede, <<Au d̄i ne'e b̄a nggomi, raho mpa. Nahu d̄imambei d̄i ru'u b̄a nggomi!>> 23 Edempara sangaji Herodes sakena d̄i ana dou sampela ede kai sumpa. Nggahi sangaji Herodes, <<Au-au ra raho b̄a nggomi nahu ^dimambeimu, kone sarunde karaja'an nahu!>>
24 Edempara ana dou siwe sampela ede losa sod̄ina inana, <<Ina, auku mataho d̄iraho b̄a mada?>>
Cambe b̄a inana, <<Rahopu tuta la Yahya Mataki kandeu raso dou.>>
25 Ana dou siwe sampela ede roci mai mbalina d̄i Herodes ro nggahina, <<Mada maraho tuta la Yahya Mataki kandeu raso dou ake-ake wa'u ra tau ese wawo tare!>>
26 Ringana au ra raho ede sangaji Herodes nawancuku ncoki adena. Pala sia wati loana tula au ra raho b̄a ana dou siwe ede b̄a one sia nawa'ura sumpa d̄i tando dou-dou ma mai ede. 27 Ndad̄i sia parenta lalona sab̄ua dou majaga weha tuta la Yahya Mataki kandeu raso dou. Ndad̄i tentara ede laona aka uma bui, edempara fati kakorina tuta la Yahya. 28 Sawa'u b̄a ede sia wa'ana tuta la Yahya ede kai tare ro mbeina d̄i dou siwe sampela ede. Ro dou sampela ede mbeina d̄i inana. 29 Wakatu anamori-anamori la Yahya ringana lampa rawi ede, siad̄oho lao wehana timba la Yahya, edempara umbuna.
Isa Al Masih mbeina ngaha 5.000 dou
6:30-44
30 Rasul-rasul ra nggadu b̄a Isa Al Masih ede mai mbalina, ro kab̄orona weki lab̄o Isa. Siad̄oho ngoana d̄i Isa sara'a ra wa'u karawi ro tei b̄a siad̄oho. 31 Mboto poda dou ma lao ro mai, ndad̄ina Isa ro anamorid̄oho-Na wati kone wara wakatuna ^dingaha ro nonokaina. B̄ara ndedena Isa nggahina d̄i anamori^doho-Na, <<Maira ndai talao pesoku weki d̄i hid̄i ma lingi loakud̄u nggomid̄oho maloaku sanawa.>> 32 Edempara siad̄oho laona kai sampa aka hid̄i ma lingi.
33 Pala mboto dou ma wa'ura eda siad̄oho matu'u wi'i hid̄i ede ro nab̄adeku ta b̄e ^dilaokai siad̄oho.Ndad̄i, samenana kota d̄i dana ro rasa ede, doud̄oho ede narai ^batuku takengge ndano loakud̄u rongga ulu sawatipu b̄a rongga Isa ro anamori^doho-Na. 34 Wakatu Isa Al Masih londona d̄i sampa, Sia edana dou mamboto. Sia kasi adena d̄i doud̄oho ede, b̄ara siad̄oho b̄une jimba ma wati wara dou ma'ompukaina. Edempara Sia tampu'ura ngoa ro teina mboto lampa rawi d̄i siad̄oho. 35 Wakatu mbiara ai, anamori Isa nggahina d̄i Sia, <<Ne'era nga^di ai ro hid̄i ake nad̄o'o lab̄o rasa. 36 Satahona Ita kaupu lao dula dou-dou ake, loakud̄u siad̄oho naloa weli ngaha ro nono d̄i desa-desa ro d̄i kampo-kampo d̄i kompe ro pei ake.>>
37 Pala Cambe b̄a Isa Al Masih, <<Nggomi^dohoku d̄imambeina ngaha ro nono siad̄oho.>>
<<Sab̄ua madad̄oho pab̄uaku lao weli roti ma co'i 200 piti salaka,l ^dingaha doud̄oho ake?>> Ndede nggahi b̄a anamori Isa ede.
38 Edempara sod̄i b̄a Isa Al Masih, <<Pila mbua roti ma wara d̄i nggomid̄oho? Lao tiopu.>>
Sawa'u b̄a lao tio b̄a siad̄oho, nggahi siad̄oho, <<Wara lima mbua roti lab̄o d̄ua tembe uta.>>
39 Edempara Isa Al Masih kauna doud̄oho ede doho kalompo-kalompo d̄i mpori. 40 Doud̄oho ede wara ma 100 dou sakalompo, ro wara rau 50 dou sakalompo. 41 Edempara Isa wehana lima mbua roti ro uta d̄ua tembe ede, edempara ^dongana langi ro rentana syuku d̄i Allah Ta'ala. Sawa'u b̄a ede to^be-to^be b̄a Sia roti ede kai rima-Na ro mbeina d̄i anamorid̄oho-Na ^dimacengga-cenggana d̄i dou mamboto ede. Ro uta d̄ua tembe ede cengga-cengga rau d̄i siad̄oho sara'ana. 42 Siad̄oho ngahana sampe mbocuna. 43 Sawa'u b̄a ede anamori Isa kab̄orona ngaha ro nono ma ncewi ede – sara'ana wara sampuru d̄ua wonca ^bini. 44 Dou mone ma ngaha roti ede wara takasi 5.000 dou.
Isa Al Masih lampana ese wawo oi
6:45-52
45 Sawa'u b̄a ede Isa Al Masih kau lalona anamorid̄oho-Na lao ulu kai sampa aka Betsaida ipa b̄ae b̄a ndano, ro Sia kauna dou mamboto ede dula. 46 Sawa'u b̄a kauna dula dou mboto ede, Isa lao do'ana aka sab̄ua doro to'i. 47 Wakatu wa'ura nga^di ai, sampa anamori Isa rakara d̄i woha ndano, pala Isa mbuipu ta ari lua. 48 Wakatu Isa edana anamorid̄oho-Na ma ipi hompa karawe sampa b̄ara tule b̄a angi na'e.B̄ara ndedena, takasi ai ma subu, Isa lao lampa rakana siad̄oho.Ro Sia lampa ntuwuna b̄une mane'e kalalo sia^doho.m 49 Wakatu eda b̄a siad̄oho b̄a one Sia malampa ese wawo oi, kacai b̄a siad̄oho henca, 50 ndad̄ina siad̄oho kanggica b̄ara dahuna. B̄a one siad̄oho sara'ana edana Sia, ndad̄i siad̄oho nawancuku we^dina.
Pala Isa Al Masih nggahi lalona d̄i siad̄oho, <<Midira! Nahu Isa. Aina dahu!>> 51 Edempara Sia ne'ena d̄i sampa siad̄oho, ro angi rau denggana. Anamori Isa nawancuku mbora akana. 52 ^Bisa ro guna mab̄oha lima mbua roti ede watipu loa ka'ao b̄a siad̄oho.Lampa rawi ede nancokiku ^diloa ka'ao b̄a siad̄oho.
Isa Al Masih katahona dou-dou masupu d̄i Genesaret
6:53-56
(Mat. 14:34-36)
53 Wakatu ronggana ipa b̄ae b̄a ndano, siad̄oho la^buna d̄i kengge ndano Genesaret. 54 Wakatu siad̄oho losana ade sampa, eda b̄a dou-dou b̄a one ma mai ede Isa. 55 Edempara doud̄oho ede rai b̄atu rerona Isa d̄i sara'a dana ro rasa ede, ro tampu'ura wa'ana dou-dou masupu d̄i Isa. Nggara ringasi b̄a siad̄oho b̄a one Isa wara d̄i sab̄ua hi^di, siad̄oho nawa'aku dou-dou masupu ta aka. 56 Ta b̄e-b̄e rau maikai Isa – nataho d̄i kampo, d̄i kota atao d̄i desa-desa – dou-dou ma ngge'e ta ede ngge'e mpa maina ro nawi'iku dou-dou masupu d̄i lapangan kota. Edempara siad̄oho raho poda-podana d̄i Isa loakud̄u dou-dou masupu ede kau to'ina tudu jumba-Na, kone b̄a sumpu mpoana. Sara'a dou ma tudu kafero jumbana, nandad̄i taho.