HABA MATAHO
RA KARONGGA B̄A
LA MATIUS
NGGAHI RO ELI D̄IKARONGGA
Injil Matius karonggana d̄i ndaita Haba Mataho b̄a one Isa eded̄u Sangaji Makasalama ra sake b̄a Allah Ta'ala. Kai ncai Isa edeku Allah Ta'ala mbeina au ra sake-Na d̄i ade Kitab Suci ma ulu d̄i ru'u b̄a ela-Na. Konena Isa ra nggana b̄a dou Yahudi ro morina kai cara dou Yahudi, pala Haba Mataho ede laina d̄i ru'u b̄a bangsa Yahudi mpoa malaisi d̄i ru'u b̄a sara'a dou d̄i dunia.
Injil Matius ake ra'ato kacaru; ratampu'u rawarakai Isa, sawa'u b̄a ede mab̄oha kandeu sarani ro coba'an d̄i'iu b̄a Sia, edempara mab̄oha karawi-Na d̄i Galilea. Ta ede Sia hotobana, ngoa ro teina ro katahona dou masupu. Sawa'u b̄a ede Injil ake nacaritaku lampa ro lao Isa ra d̄i Galilea lao aka Yerusalem, ro au ma ndad̄i lab̄o Isa ade minggu cumpukai mori-Na d̄i dunia ake ma na'e poda eded̄u made ro mori mbali-Na.
Sab̄ua lampa rawi ma ipi penti rakarongga b̄a la Matius eded̄u b̄a one Isa eded̄u Guru ma heba poda, ma ngoa ro tei b̄a one Allah Ta'ala ma parenta kai Sangajikaina. Isa rau nantau wibawa d̄imangoa kab̄ae ao ro ma'anana Hukum Allah. Mamboto d̄i ade au ra ngoa ro tei b̄a Isa ede rakalompo b̄atu isina ma penti. Wara lima kalompo: (1) Hotoba d̄i Doro to'i ma wara hubungana lab̄o ruku ro rawi, mapab̄ua d̄ikarawi, hak-hak, ro ao ro onena mab̄oha mori d̄i ru'u b̄a sanikina ela Allah Ta'ala (pasal 5-7); (2) ngoa ro tei-ngoa ro tei d̄i ru'u b̄a sampuru d̄ua dou anamori Isa ade kalampakaina taki ro puta (pasal 10); (3) conto ro ibara-conto ro ibara mab̄oha ka'ada'an wakatu Allah Ta'ala maparenta kai Sangajikaina (pasal 13); (4) ngoa ro tei mab̄oha ao ro ma'anana ndad̄i dou mab̄atu Isa (pasal 18); ro (5) ngoa ro tei mab̄oha ainaina kiama ro mab̄oha maikai Ana Manusia (pasal 24-25).
Isi
Dafta londo ro mai Isa Al Masih ro rawarakai-Na 1:1–2:23
Karawi la Yahya Mataki kandeu raso dou 3:1-12
Kandeu sarani ro Iblis cobana Isa 3:13–4:11
Isa kalampana taki d̄i woha ela ro dou Galilea 4:12–18:35
Ra d̄i Galilea lao aka Yerusalem 19:1–20:34
Minggu cumpukaina d̄i Yerusalem ro d̄i kompe ro peina 21:1–27:66
Isa mori mbalina ro katadana weki-Na 28:1-20