La Manasye Sangaji Yehuda
33
La Manasye umuna sampuru d̄ua mba'a wakatu sia ndad̄ina sangaji Yehuda ro sia parentana d̄i Yerusalem lima mpuru lima mba'a ntoina. 2 Sia karawina dosa d̄i RUMA, b̄ara b̄atuna rawi d̄ab̄ae ranginakai b̄a bangsa-bangsa ra katesa kalosa b̄a ra d̄i Kanaan d̄i wakatu dou Israil lu'ukaina dana ro rasa ede. 3 Hid̄i-hid̄i nembakai berhala ra wa'u ka'iha leli b̄a sangaji Hizkia, amana ede, tu'u mbali b̄a sia. Sia tu'una mezbah-mezbah d̄i ru'u sambea ro ibadakai d̄i Baal, ro sia ndawina patung-patung Dewi Asyera, ro nanembaku ntara-ntara. 4 RUMA wa'ura nggahina b̄a one d̄i ru'u santoi-ntoina Yerusalem eded̄u hid̄i d̄i ru'u sambea ro ibadakai d̄i RUMA, pala d̄i Uma RUMA ede, sangaji Manasye wa'ura tu'una mezbah-mezbah d̄i ru'u dewa-dewa. 5 D̄i d̄ua mbua sarei Uma RUMA ede tu'u b̄a sia mezbah-mezbah d̄i ru'u nembakai ntara-ntara. 6 Anad̄ohona d̄onggo ro mbei b̄a sia ndad̄i koroba ka'a d̄i So Hinom. Sia rau kalampana rawi ndad̄i sando, moke ro sarofi, ilmu sanggili, ro narahoku tanda d̄imateina d̄i ruh-ruh dou ma made. Sia na'ipiku dosana d̄i RUMA ndad̄i nakamaiku mbani RUMA. 7 Patung berhala toho b̄a sia d̄i ade Uma RUMA, sapodakaina mab̄oha hid̄i ede Allah Ta'ala wa'ura nggahina d̄i sangaji Daud ro d̄i la Sulaiman ana monena ede, <<Uma Nahu d̄i Yerusalem ake, ra wa'u kad̄ale b̄a Nahu d̄i ade sampuru d̄ua dana ro rasa londo ro mai Israil , eded̄u hid̄i ra wa'u katantukai b̄a Nahu mandad̄i hid̄i d̄i sambea ro ibadakai d̄i Nahu d̄i ru'u santoi-ntoina. 8 Nggara ela ro dou Israil nato'asi d̄i sara'a parenta Nahu ro kalampana/b̄atuna hukum-hukum ra mbei b̄a la Musa ada-Nahu ede d̄i siad̄oho, ndad̄i Nahu wati d̄imaco'o wi'i siad̄oho d̄i katesa b̄a dou d̄i dana ro rasa ra wa'u mbei b̄a Nahu d̄i wa'i ro waro siad̄oho.>> 9 Sangaji Manasye makamaina ela ro dou Yehuda karawi dosa ma ncewi ipi dab̄ae ntewikaisi dosa ra karawi b̄a bangsa-bangsa ra katesa kalosa b̄a RUMA d̄i dana Kanaan d̄i wakatu ela RUMA lu'ukaina dana ro rasa ede.Sangaji Manasye bertobat
10 RUMA rojona sangaji Manasye lab̄o ela ro douna, pala siad̄oho wati ngawana kade'e nggahi RUMA. 11 B̄ara ndedena RUMA kamaina panglima-panglima tentara Asyur d̄imadei Yehuda. Sangaji Manasye wa'u b̄a dou kai b̄esi kab̄e, edempara belenggu (leto) b̄a dou ro lao wa'a aka Babel. 12 Ade susa ro ncokina ade sia ka'awana weki d̄i RUMA Allah Ta'alana, ro do'ana raho bantu d̄i RUMA. 13 Allah Ta'ala cambena (mbeina) au ra raho b̄a sangaji Manasye ro wa'a mbalina sia aka Yerusalem d̄imaparenta wali. B̄ara rawi mandad̄i ede, sangaji Manasye ndad̄i imbi poda b̄a one RUMA eded̄u Allah Ta'ala.
14 Sawa'u b̄a ede sangaji Manasye tu'u kad̄ese walina tembo (kuta) ari ta wela ela Kota Daud. Sia tampu'una tu'u tembo ede d̄isab̄ua hid̄i d̄i So d̄eni lab̄o mada oi Gihon edempara tu'u ca d̄ana sampe (saraka) aka Tad̄a Na'e mangara Tada Uta (Gerbang Ikan) ro ade kota ma d̄ipehekai Ofel. D̄i sanikina kota mantau b̄ente d̄i Yehuda toho b̄a sia sab̄ua dou panglima tentara. 15 Sia wa'a pakina patung dewa bangsa ma kalai ro berhala-berhala ra wa'u tohona ade Uma RUMA, sia d̄umbana mezbah-mezbah berhala ma wara d̄i dore Uma RUMA, ro d̄i hid̄i-hid̄i ma kalai d̄i Yerusalem. Sara'ana ede wa'a kalosa paki b̄a sia ari mai b̄a kota. 16 Sawa'u b̄a ede sia katahona mezbah hid̄i sambea ro ibadakai d̄i RUMA, edempara d̄onggo ro mbeina d̄i hid̄i ede koroba damekai (salamakai) ro koroba syukur. Sara'a ela ro dou Yehuda kau b̄a sia sambea ro ibada d̄i RUMA Allah Ta'ala dou Israil . 17 Ela ro dou mbuipu d̄onggo ro mbeina koroba d̄i hid̄i-hid̄i makalai, pala d̄onggo ro mbei ede eded̄u d̄i ru'u b̄a RUMA.
Nggorina Parentakai Sangaji Manasye
(2Raj. 21:17-18)
18 Carita makalai mab̄oha sangaji Manasye, ro mab̄oha do'ana d̄i Allah Ta'ala ra karongga d̄i sia kai ncai nabi-nabi kai ngara RUMA, Allah Ta'ala Israil , sara'ana wa'ura tunti ade buku sajara raja-raja Israil . 19 Ade buku sejara nabi-nabi wa'ura tunti rau do'a sangaji Manasye ro cambe wea b̄a Allah Ta'ala do'ana ede, ro carita mab̄oha dosa-dosana sawatipu b̄a sia tobana, hid̄i-hid̄i nembakai berhala, ro patung-patung Dewi Asyera ra ndawi b̄a sia, ro berhala-berhala ra nemba b̄a sia. 20 Made sangaji Manasye ro ra umbu d̄i asi. Ro la Amon ana monena mandad̄i sangaji ma cepe sia.