La Daud kalampana sensus
(2Sam. 24:1-25)
21
Iblis nane'e ka'iha dou Israil ; b̄ara ndedena sia siwina sangaji Daud loakud̄u kalampana sensus. 2 Ndad̄i nggahira sangaji Daud d̄i la Yoab ro d̄i dou-dou perwira (mana'ekai) tentarana, <<Kalampapu sensus d̄isara'a dana ro rasa Israil sampe aka rasa-rasa to'i (kampo-kampo) b̄ara nahu kane'e b̄ade sab̄une mbotona ela ro dou Israil .>>3 Cambe b̄a la Yoab, <<Raho-raho to'i mpa RUMA mbeina naha mboto ela ro dou Israil sampe saratu kali ncewi mboto ra d̄i mboto weki siad̄oho wakatu ake. Sangaji Ma D̄ese ro ntasa, sab̄ua watipu ra b̄ade b̄a one siad̄oho ade parentakai b̄a Ita? (sab̄ua watipu ra b̄ade siad̄oho mato'a d̄i Ita?) B̄ab̄auku pab̄ua d̄ikalampakai sensus? Pea, b̄ara ncara rawi ede, sara'a bangsa d̄imatangguna au d̄imandad̄i!>> 4 Pala sangaji ngge'e mpa nentina parentana ede, ndad̄i, la Yoab laona aka sara'a dana ro rasa Israil , sampe aka kampo-kampo (to'i), edempara dula mbalina aka Yerusalem, 5 ro ngoana d̄i sangaji Daud hasi sensusna ede. Mboto weki dou mone ma loa ndad̄i tentara wara 1.100.000 dou d̄i Israil ro 470.000 dou d̄i Yehuda. 6 Pala wati lu'u dou (suku) Lewi lab̄o dou-dou (suku) Benyamin, ade weki dou ra sensus ede. La Yoab wati sensuskaina d̄i ade suku Lewi lab̄o suku Benyamin b̄a one sia wati ca'una kalampa parenta sangaji ede.
7 Allah Ta'ala wati sana adena d̄i sensus ede ro Sia hukumna dou Israil . 8 Edempara do'ara nabi Daud d̄i Allah Ta'ala nggahina, <<Io Allah, mada wa'ura ipi na'e dosa! Takangapu to'ipu mada, b̄a one au ra karawiku nawancuku sampula.>>
9 Pala nggahira RUMA d̄i nabi Gad, dou mandad̄i jembatan nabi Daud lab̄o RUMA, 10 <<Laora ro nggahipu d̄i la Daud b̄a one Nahu mambei d̄i sia tolu mbua d̄i kad̄ale. Au ra ra kad̄ale b̄a sia, d̄ikalampa b̄a Nahu.>>
11 Edempara laora Nabi Gad d̄i (aka) sangaji Daud ro karonggana nggahi RUMA ede, nggahi sia, <<Ma b̄e d̄i kad̄ale b̄a Ita ruma sangaji: 12 Dana ro rasa ake d̄i hina b̄a bala hid̄o salama tolu mba'a, atao Ita ruma sangaji marai coco-coco b̄a musu salama tolu wura, atao sara'a dana ro rasa ake salama tolunai d̄i b̄oe b̄a RUMA kai bala supu, ro mala'eka-Na ma wa'a made wara ta b̄eb̄e. Nggahipu ake wa'u, auku ma pab̄ua d̄ikarongga b̄a mada d̄i RUMA.>>
13 Cambe b̄a sangaji Daud, <<Alae, ihara nahu! Pala nggara d̄ihukumkaisi manusia, na ncewi tahopu nahu d̄ihukum b̄a RUMA, b̄a one na'eku meci ro ca'u RUMA.>>
14 Ndad̄i RUMA kamaina bala supu d̄i dou Israil , ndad̄ina 70.000 dou d̄i ade weki siad̄oho ma made. 15 Edempara RUMA kakaina sab̄ua mala'eka d̄imaka'iha leli Yerusalem. Pala wakatu mala'eka ede wa'ura rongga d̄eni lab̄o hid̄i kahorokai gando ntau la Arauna dou Yebus, RUMA rungkana nia-Na d̄i ru'u d̄ihukumkaina bangsa ede. Nggahiri Sia d̄i mala'eka ede, <<Ncihira! Midira! (Denggara).>>
16 Sangaji Daud edana mala'eka ede ma ngemo ese woha ai (hela langi lab̄o dana). Lab̄o peda d̄i rimana, mala'eka ede nawa'ura ka'ambi weki d̄ika'iha lelikaina Yerusalem. Ndad̄i sangaji Daud lab̄o dou-dou mana'ekai ela ro dou, ma wakatu ede kanina kani ro lombo tanda sinci ade, wunga suju d̄i dana. 17 Do'a sangaji Daud, nggahina, <<Io RUMA Allah Ta'ala, mada ake ma wa'ura ncara. Mada ma rakauna kalampa sensus ede. Bangsa ake wati wara ncarana! Io RUMA, Allah Ta'alaku, tahukumpu mada lab̄o iwa ro weki mada, pala takado'o to'ipu bala ake ra d̄i ela Ita.>>
18 Edempara mala'eka RUMA kauna nabi Gad nggahi d̄i sangaji Daud b̄a one la Daud pab̄uaku ne'ena ese hid̄i kahorokai gando ntau la Arauna ro tu'u mezbah d̄i ru'u b̄a RUMA d̄i hid̄i ede. 19 Ndad̄i laora la Daud b̄une ra parentakai b̄a RUMA ra karongga d̄i sia kai ncai la Gad. 20 d̄i hid̄i kahorokai gando ede la Arauna lab̄o upa dou ana monena ma wunga karawi kahoro gando. wakatu edana mala'eka ede, upa dou ana la Arauna lao rai cili wekina. 21 Wakatu la Arauna edana sangaji Daud ma mai sia lao rakana sangaji Daud ro sia sujuna d̄i tando sangaji Daud. 22 Nggahi sangaji Daud d̄i la Arauna, <<Nahu kane'e tu'u mezbah d̄i hid̄i ake d̄i ru'u b̄a RUMA, loakud̄u bala ake denggana. B̄ara ndedena landapu dana ake d̄i nahu. Nggahipu sab̄une co'ina, nahu d̄imacolana.>>
23 Cambe b̄a la Arauna, <<Io, taweha mpa, ruma sangaji ro takarawi mpa b̄eratahokaina d̄i'iu b̄a Ita. Ake capi-capi d̄i ru'u koroba ka'a, ro d̄i ru'u b̄a haju ka'ana, Ita taloa mpa kani (taweha mpa) kapenta-kapenta kahorokai gando ake, ro ta weha raupu gando d̄i ru'u d̄onggo ro mbei. Mada mambei sara'ana ede, Ita edera colata.>>
24 Pala cambe b̄a sangaji Daud, <<Aina! Nahu kane'e weli dana ake kai co'i konta (ra landakaimu). Nahu wati ne'eku d̄onggo ro mbei d̄i RUMA au ma ntau nggomi atau au-au ra raka b̄a nahu kai weha mpoa.>> 25 Ndad̄i sangaji Daud colana d̄i la Arauna 600 piti masa d̄i ru'u hid̄i ede. 26 Edempara sangaji Daud tu'una sab̄ua mezbah d̄i hid̄i ede d̄i ru'u b̄a RUMA, ro donggo ro mbeina koroba ka'a ro koroba damekai (salamakai). Sawa'u b̄a ede sia do'ana ro RUMA cambena do'a sia ede, kai kalondona afi ra ese langi ma ka'a kampoi koroba-koroba d̄i wawo mezbah ede. 27 Edempara RUMA kauna mala'eka ede tau mbali pedana d̄i ade lapina. Ndad̄i RUMA kauna mala'eka ede kalampa parenta RUMA ede.
28 Wakatu la Daud edana b̄a one RUMA macambe wea do'ana b̄ara d̄onggo ro mbeina ede, ndad̄i sia d̄onggo ro mbei walina koroba d̄i mezbah ede. 29 D̄i wakatu ede Kemah RUMA ra tu'u b̄a la Musa d̄i so sarae, ro mezbah d̄i ru'u koroba ka'a mbuipu warana d̄i hid̄i sambea ro ibadakai d̄i Gibeon. 30 Pala sangaji Daud wati disana lai ta'aka d̄inuntukaina lab̄o Allah Ta'ala, b̄a one sia nadahuku d̄i peda mala'eka RUMA.