<<    <     2 Raja     25     >    >> 
Ihana Yerusalem
(2Taw. 36:13-21; Yer. 52:3b-11)
25
Sawa'u b̄a ede sangaji Zedekia barontana d̄i Nebukadnezar sangaji Babel. B̄ara ndedena sangaji Nebukadnezar lab̄o sara'a tentarana mai ro deina Yerusalem d̄i tanggal (ainaina) sampuru wura sampuru ade mba'a kaciwikaina parentakai sangaji Zedekia. Siad̄oho tu'una hid̄i ngge'ekai tentarana arimai b̄a kota, tu'una tembo d̄i dei hekokai, 2 ro dei heko ncauna kota ede sampe mba'ana sampuru sa'ica parentakai sangaji Zedekia. 3 D̄i tanggal ciwi wura upa ade mba'ana ede rau wakatu bala hid̄o nawa'ura ipi poda, ndad̄ina ela ro dou watid̄u wara mantau ngaha ro nono kone sato'i, 4 tembo kota d̄umba b̄a musu. Aimangad̄i ede, konena dou Babel wunga dei hekona kota ede, sara'a tentara Yehuda lao rai hori weki (horu weki) lao aka So Yordan. Siad̄oho laona ta ncai nggaro asi, edempara losana ta tad̄a lawa ma kandapona d̄ua mbua tembo d̄i hid̄i ede. 5 Pala tentara Babel fou b̄atuna sangaji Zedekia, ro rakana wa'u sangaji ede d̄i dana Yerikho. Sara'a tentarana lao rai tu'u wi'ina sia. 6 Edempara sangaji Zedekia lao wa'a b̄a dou aka sangaji Nebukadnezar d̄i (aka) kota Ribla, edempara b̄ab̄ukai hukuman d̄i sangaji Zedekia. 7 Ana-ana sangaji Zedekia ra hade d̄i tando ndai sangaji Zedekia. Sawa'u b̄a ede sangaji Zedekia cingga kalosa wea isi madana, edempara balungguna sia, ro lao wa'a aka Babel.
Uma RUMA Ka'iha leli b̄a Dou
(Yer. 52:12-33)
8 D̄i tanggal pidu wura lima ade mba'ana kasampuru ciwikaina parentakai Nebukadnezar sangaji Babel, maira sab̄ua dou mangara la Nebuzaradan aka Yerusalem. Sia eded̄u dou mataki ngoa ro tei kataho ro panglima tentara sangaji Nebukadnezar. 9 La Nebuzaradan ka'ana Uma RUMA, asi sangaji, ro uma sara'a dou mana'ekai d̄i Yerusalem, 10 edempara sara'a tentarana d̄umbana tembo-tembo kota ede. 11 Edempara ela ro dou ma mbuipu wara ade kota, eded̄i dou-dou ma ahlia karawi wati lao wa'a bui, dou-dou ma ncoki mori ro dou-dou ma wa'ura kasab̄ua weki lab̄o dou Babel, sara'ana lao wa'a b̄a sangaji Nebukadnezar aka Babel. 12 Pala sarundena ra d̄i ela ro dou ma ipi ncoki mori wi'i b̄a sia d̄i Yerusalem ro kauna karawi d̄i nggaro-nggaro anggo ro oma-oma.
Dou Yehuda Lao Wa'a aka Babel
(Yer. 52:24-27)
18-19 Selasi (arimai b̄a) ede, la Nebuzaradan wa'u ro letona Imam Agung (dou mana'ekai imam-imam) eded̄u la Seraya, la Zefanya dou mabantu imam, tolu dou majaga Uma RUMA, lima dou mataki ngoa ro tei ndai sangaji ma mbuipu wara d̄i kota, panglima, waki panglima ma uru sura ro ro'o tentara, lab̄o ini mpuru dou mana'ekai kota ede. 20 Sara'a dou ede lao wa'a b̄a sia aka sangaji Nebukadnezar d̄i (aka) kota Ribla, 21 d̄i dana ro rasa mangara Hamat. Ta aka siad̄oho ra kancoki edempara hade b̄a dou.
Ndedeku dou-dou Yehuda wa'a b̄a dou ra d̄i dana ro rasa siad̄oho lao wa'a aka hid̄i pakikai d̄i Babel.