<<    <     1 Raja     1     >    >> 
Sangaji Daud d̄i Umuna Wa'ura Tua
1
Ake sangaji Daud na wa'ura ipi tua. Konena sia wa'ura b̄onto kai weri lombo ma ^tebe, sia ngge'e mpa iuna b̄usi. 2 B̄ara ndedena pagawe-pagawe sangaji, ma nggahi, <<Ma D̄ese ro ntasa, satahona (tahopu) madad̄oho mangupa wea sab̄ua dou sampela siwe d̄imangge'e lab̄o Ita ro d̄imakab̄ua Ita sangaji. Sia d̄imamaru lab̄o Ita loakud̄u Ita iu rana.>> 3-4 Edempara ngupa d̄i sara'a dana Israil sab̄ua dou sampela siwe ma ntika. Ndad̄i d̄i rasa Sunem raka rumpa sab̄ua dou siwe sampela ma ntika poda ngarana la Abisag. Sia lao wa'a aka sangaji, edempara sia ma tonggo ro ma kab̄ua sangaji. Pala sangaji wati maru campona lab̄o sia.
La Adonia Raho Pab̄uana Sia Mandad̄i Raja
5-6 B̄ara la Absalom wa'ura made, ndad̄i la Adonia, ana mone la Daud ma kad̄uakai ndad̄i ma sasa'e. Ngara inana la Hagit. La Adonia eded̄u dou ma gaga. Amana watipu iuna (perna) mbani kai sia nggara sia ncara rawina. La Adonia na ipiku ne'ena ndad̄i sangaji, edempara sia ka'ambina d̄i ru'u weki ndaina, mboto kareta lewakai lab̄o tentara-tentara ma nente jara ro 50 dou ma jaga ndai sia. 7 Edempara sia lao mufakana lab̄o la Yoab ro Imam Abyatar. Ina b̄a la Yoab ngarana la Zeruya. La Yoab lab̄o Imam Abyatar na satuju (na ca'u) d̄imabantu usaha la Adonia. 8 Pala Imam Zadok, Benaya ana la Yoyada, Nabi Natan, Simei, la Rei ro dou majaga ndai sangaji Daud wati lu'una ta la Adonia.
9 D̄i sab̄ua ainaina d̄i sab̄ua hid̄i ma ngara Batu Ular (Wadu Sawa). d̄eni lab̄o mada oi En-Rogel, la Adonia d̄onggo mbeina koroba jimba, capi rangga lab̄o ana capi ma mpore-mpore. Sia undana ana-ana mone makalai sangaji Daud, ro pagawe-pagawe asi ra d̄i suku (dou) Yehuda aka ndiha koroba ede. 10 Pala arina ma ngara la Sulaiman, lab̄o Nabi Natan ro la Benaya ro pegawe-pegawe ndai sangaji Daud wati ra undana.
La Sulaiman Ratuha ro Lanti Mandad̄i Sangaji
11 Ndad̄i Nabi Natan lao eda angina lab̄o la Betsyeba, ina la Sulaiman, edempara nggahina d̄i sia, <<Sab̄ua Ita Paduka (ruma siwe) watipu ringgata haba b̄a one la Adonia, ana mone la Hagit, wa'ura hanta weki ndaina mandad̄i sangaji, pala sangaji Daud wati b̄adena au-au mab̄oha (ade) lampa rawi ede? 12 Nggara Ita Paduka (ruma siwe) mane'esi loakud̄u la Sulaiman lab̄o ndai Ita Paduka (ruma siwe) salama, mada mangoana 13 rocipu lao satando sangaji Daud, ro nggahi ndakepu d̄i sia: Sab̄ua laina ndai Ita sangaji ma wa'ura sumpa d̄i mada b̄a one ana mone mada la Sulaimanku d̄imandad̄i sangaji ma cepena Ita sangaji? Ake, b̄ab̄auku la Adonia ma ndad̄i sangaji?>> 14 Nggahi wali Nabi Natan, <<Pea, Ita paduka (ruma siwe) wunga nuntu lab̄o sangaji, mada d̄imalu'u, katenggonana au ra wa'u nggahi b̄a Ita Paduka (ruma Siwe).>>
15 Ndad̄i laora la Batsyeba sangaji d̄i ade b̄ilina. Sangaji d̄i wakatu ede na wa'ura ipi tua, ro la Abisag, dou siwe sampela ra d̄i Sunem ede, wunga kab̄uana sangaji. 16 La Batsyeba sujuna d̄i tando sangaji, edempara sod̄i b̄a sangaji, <<Auku d̄ine'e b̄a nggomi?>>
17 Cambe b̄a la Batsyeba, <<Sangaji Ma D̄ese ro ntasa, Ita sangaji ma wa'ura sumpa d̄i mada kai ngara RUMA, Allah Ta'ala b̄a Ita sangaji, b̄a one ana mone mada la Sulaiman d̄imandad̄i sangaji macepena Ita sangaji. 18 Pala ake kai wati b̄ade b̄a ndai Ita sangaji, la Adonia nawa'ura ndad̄i sangaji. 19 Sia nawa'ura d̄onggo ro mbeina mboto jimba, capi rangga ro ana capi ma mpore-mpore. Sia wa'u raura undana lao aka ndiha ade ana-ana mone Ita sangaji lab̄i Imam Abyatar ro la Yoab, panglima tentara sangaji. Pala, sia wati undana la Sulaiman. 20 Sangaji Ma D̄ese ro ntasa, sara'a ela ro dou Israil wakatu ake wunga ngenana eli ra d̄i Ita sangaji mab̄oha couku d̄imaceoena Ita ma ndad̄i sangaji. 21 Nggara Ita sangaji wati mbeita nggahi ede, pasti (tantu) roci sawa'u b̄a made Ita sangaji, mada lab̄o ana mone mada d̄ikarawi b̄a siad̄oho kai dou ma wa'ura hiana d̄i sangaji.>>
22 Wunga ade la Batsyeba mbuipu nuntuna, Nabi Natan rongga d̄i asi. 23 Edempara sangaji ngoa b̄a dou mab̄oha mai la Natan. Ro la Batsyeba losa, la Natan lu'u edempara sujuna d̄i tando sangaji. 24 Nggahi Nabi Natan, <<Sangaji Ma d̄ese ro ntasa, sab̄ua Ita sangaji tawa'ura ngoa sara'a dou b̄a one la Adonia d̄imacepena Ita mandad̄i sangaji? 25 Ainaina ake lalo sia wa'ura d̄onggo ro mbeina (koroba) mboto jimba, capi rangga ro ana capi ma mpore-mpore. Sara'a ana mone Ita sangaji wa'ura undana (ouna). Ro dou-dou panglima tentara Ita sangaji, lab̄o Imam Abyatar. Siad̄oho wakatu ake wunga ndihana lab̄o sia ro kanggica-kanggica, <Hidup sangaji Adonia!> 26 Pala, sia wati unda (ou na) mada. Imam Zadok ro la Benaya lab̄o la Sulaiman rau wati ra unda b̄a sia. 27 Sab̄ua Ita sangaji ma rakauna sia kalampa sara'ana ake, kai wati ngoa d̄i dou-dou pagawe Ita sangaji couku d̄imacepena Ita sangaji?>>
28 Nggahi sangaji Daud, <<Ou la Batsyeba.>> Ndad̄i Nabi Natan losa ro la Batsyebalu'u mbali satando sangaji. 29-30 Edempara nggahi sangaji d̄i sia, <<Poda romo nahu wa'ura sakeku d̄i nggomi, kai ngara RUMA, Allah Ta'ala dou Israil b̄a one la Sulaiman ana mone nggomi d̄imacepe nahu ma ndad̄i sangaji. Ndad̄i ake nahu masake kai ngara RUMA ma mori, ma wa'ura hori kalosa nahu ra d̄i samenana susa ra darura nahu, b̄a one d̄i ainaina ake lalo nahu d̄imakarawi au ra wa'u sake b̄a nahu d̄i nggomi.>>
31 Ndad̄i sujura la Batsyeba ro nggahina, <<Hiduplah/D̄ese ro ntasa sangaji ru'u santoi-ntoina!>> 32 Edempara sangaji Daud kauna ou la Zadok, Natan ro la Benaya. Sawa'u b̄a mai siad̄oho, 33 nggahira sangaji d̄i siad̄oho, <<Oupu perwira-perwira nahu ro laopu lab̄o siad̄oho d̄i la Sulaiman ana mone nahu. Ampapu sia ese bagal ndai nahu, ro wa'apu sia aka mada oi Gihon. 34 d̄i hid̄i aka la Zadok lab̄o la Natan pab̄uaku tuha ro lantina la Sulaiman mandad̄i sangaji Israil . Sawa'u b̄a ede nggomid̄oho pab̄uapu ufimu sangkakala ro nggahi kanggica, <Hidup sangaji Sulaiman!> 35 Sawa'u b̄a ede d̄ende kandihapu sia mai mbali ara ake d̄imadohokai kadera sangajikai nahu, b̄ara siaku ra wa'u kad̄ale b̄a nahu mandad̄i sangaji macepe nahu d̄imaparenta Israil ro Yehuda.>>
36 <<Io taho, Ma D̄ese ro ntasa,>> cambe b̄a la Benaya, <<Raho-raho to'i mpa RUMA, Allah Ta'ala b̄a Ita sangaji, makatenggona perenta Ita sangaji ede. 37 B̄une RUMA wa'ura lab̄ona Ita sangaji, raho-raho to'i mpa sia rau malab̄ona la Sulaiman. Raho-raho to'i mpa RUMA ndawina parentakai sia ncewi na'e ro ntoru ntewikaisi parentakai Ita sangaji.>>
38 Ndad̄i la Zadok, Natal, Benaya lab̄o dou-dou majaga ndai sangaji kau santab̄ena la Sulaiman ne'e ese bagal sangaji, edempara siad̄oho d̄ende wa'ana lao aka mada oi Gihon. 39 Sawa'u b̄a ede la Zadok wehana minyak zaitun lab̄o tau (kid̄ina) ra wa'u wa'ana ra d̄i Kemah RUMA, edempara sia tuha ro lantina la Sulaiman kai luana mina ede d̄i la Sulaiman. Ro sangkakala rau d̄i ufi, sara'a dou ma mai d̄i hid̄i ede nggahi kanggica, <<Hidup sangaji Sulaiman!>> 40 Edempara siad̄oho sara'a d̄endena sia lao mbali ro nggahi kanggica salaho ufi jalitu, ndad̄i dana b̄une ma hengga (kambimbi) b̄ara eli ndiha ede.
41 La Adonia lab̄o dou-dou ra undana b̄ou mpara nggori ndihana, wakatu siad̄oho ringana eli ndiha ede. D̄i wakatu la Yoab ringana eli sangkakala, sod̄i b̄a sia, <<Au ma ndad̄i aka kota ndad̄ina ipikai eli ndiha?>> 42 La Yoab watipu nggori nggahina, wed̄i lalompa mai la Yonatan, ana Imam Abyatar, <<Mai lu'u,>> nggahi la Adonia. <<Nggomi dou mataho, tantu nggomi ma wa'aku haba ma taho rau.>>
43 <<Mboto kangampu, laina haba mataho,>> cambe b̄a la Yonatan. <<Sangaji Daud wa'ura hantana la Sulaiman mandad̄i sangaji! 44 La Zodak, Natan, la Benaya ro dou-dou majaga ndai sangaji wa'ura kau lao d̄ende la Sulaiman. Siad̄oho wa'ura ampana la Sulaiman ese bagal sangaji, 45 ro la Zadok lab̄o la Natan nawa'ura tuha ro lantina sia d̄i mada oi Gihon. Ake siad̄oho nawa'ura lao mbali aka kota, nggahi kanggica salahu kai ndiha, ro sara'a kota ndad̄i mbou. Eded̄u eli ndiha ra ringa itad̄oho akande. 47 Perwira-perwira sangaji nawa'ura lao mbei salama d̄i sangaji Daud. Nggahi siad̄oho, <<Raho-raho to'ipu Allah Ta'ala b̄a Ita sangaji, kandad̄ina la Sulaiman ncewi na'e ro ntoru ntewikaisi Ita sangaji; raho-raho to'i mpa parentakai la Sulaiman ncewi taho ro mbou ntewikaisi parentakai b̄a Ita sangaji.> Sawa'u b̄a ede d̄i hid̄i marukaina, sangaji Daud suju nembana Allah Ta'ala, 48 ro do'ana, <<D̄ese ro ntai (Roi ro wadiku Ita, Io RUMA, Allah Ta'ala ma nemba b̄a dou Israil . Ainaina ake sab̄ua dou d̄i weki londo ro maiku wa'ura hanta b̄a Ita RUMA mandad̄i sangaji, macepena mada. Ro Ita RUMA wa'ura mbeita mada mori d̄ima'eda madana rawi Ita ake!>>
49 Dou-dou ra unda b̄a la Adonia ndad̄i dahu, ndad̄ina siad̄oho sara'a tu'u kid̄i edempara laona, cua-cua weha ncai ndaina 50 Ndad̄i la Adonia naipiku dahuna d̄i la Sulaiman, ndad̄ina sia lao rai lu'u aka Kemah RUMA ro nentina sumpu-sumpu mezbaha d̄i hid̄i ede. 51 Dou lao ngoana d̄i sangaji Sulaiman lampa rawi ede. Siad̄oho mai ngoana b̄a one la Adonia na ipiku dahuna d̄i la Sulaiman, ndad̄i sia wa'ura laona aka mezbah ro nentina sumpu-sumpu mezbah ede, ro nggahina, <<Nahu wati d̄imatu'u wi'i hid̄i ake, sawatipu b̄a la Sulaiman sumpana d̄i nahu b̄a one sia wati d̄imahade nahu.>>
52 Cambe b̄a la Sulaiman, <<Nggara sia natahosi rawina, sia wati d̄iukum kone sato'i rau; pala nggara sia nakarawi dab̄aesi, sia pab̄uaku d̄i hade.>> 53 Edempara sangaji kauna dou lao weha ao la Adonia ra d̄i mezbah ede. Ndad̄i maira la Adonia satando sangaji, ro sujuna d̄i tando sia. Edemppara nggahi, <<Nggomi loa lao dula!>>