50
La Yusuf nangi pohu ro ngiluna amana. 2 Edempara la Yusuf kauna dou mataki kab̄ua dou ma made bore kai marakani lo'i d̄i timba la Yakub loakud̄u wati mbaina. 3 Karawi ede nakampoiku wakatu upa mpuru nai ntoina, eded̄u wakatu ra nginakai kab̄ua dou ma made. Dou-dou d̄i Mesir ncoki ade rauna pidu mpuru nai ntoina b̄ara mad̄e la Yakub.4 Sawa'u b̄a nggori tanda ncoki ade ede, nggahira la Yusuf d̄i pagawe Sangaji, <<Takarongga to'ipu nggahi ake d̄i sangaji, 5 <Wakatu ama mada d̄enira madekaina, sia kauna sake mada, b̄a one mada d̄ima'umbuna d̄i ade rade ra sadia b̄a ndai ama mada d̄i Kanaan. B̄ara ndedena, takau to'ipu mada lao d̄ima'umbu ama mada; Sawa'u b̄a ede, mada d̄imamai mbali.>>>
6 Edempara nggahira Sangaji, <<Laora umbupu amamu, b̄une ra sakemu d̄i sia.>>
7 Edempara laora la Yusuf d̄i umbukaina amana. Sara'a pagawe sangaji, dou-dou ma tuakai d̄i asi ro sara'a dou-dou ma na'ekai d̄i Mesir, lao sama-samana lab̄o la Yusuf. 8 Iwa ro weki, sa'e ro ari rocina ro angina ma kalai lao rau. D̄ambe-d̄ambe to'i wati wa'ana ro binata ntadi siad̄oho wi'i rauna d̄i dana Gosyen. 9 Mboto tentara ma nente kareta ro ma nente jara ma lao lab̄ona la Yusuf. Ndad̄i dou ma b̄atu la Yusuf na'ipiku mbotona.
10 Wakatu siad̄oho rongga d̄i hid̄i dou ma rape gandum d̄i Goren-Hataad, ta wela ele b̄a Sori Yordan, siad̄oho nangi nduru ro kanggicana b̄ara ncoki adena. La Yusuf katu'una upacara tanda ncoki ade, pidu nai ntoina. 11 Wakatu dou-dou Kanaan edana tanda ncoki ade d̄i Goren-Hataad ede, nggahira siad̄oho, <<Nawancuku ncoki ro lalai ade upacara tanda ncoki ade dou Mesir ede!>> B̄ara ndendena, hid̄i ede tangarakai Abel-Mizraim.a
12 Ana-ana la Yakub kalampana au ra ngoa wi'i b̄a la Yakub d̄i siad̄oho. 13 Siad̄oho wa'ana timba la Yakub lao aka Kanaan ro umbuna ade karombo doro d̄i Makhpela, ta wela ele b̄a Mamre, d̄i oma ra weli b̄a la Ibrahim d̄i la Efron dou Het ede, d̄imandad̄i dana rade ntau ndaina. 14 Sawa'u b̄a nggori umbu amana, la Yusuf dula mbalina aka Mesir sama-sama lab̄o sa'e ro arina ro sara'a dou ma b̄atu sia lao umbu amana ede.
La Yusuf Kangampu Weana Rawi Ncara Sa'ed̄ohona
15 Sawa'u b̄a made ama siad̄oho, sa'e-sa'e la Yusuf nggahina,<<B̄uneku nggara la Yusuf nawi'isi d̄ei adena rawi ndai ro sia nacola cepesi au ra karawi b̄a ndai ntoina d̄i sia?>> 16 B̄ara ndedena, siad̄oho nggaduna nggahi ake d̄i la Yusuf, <<Sawatipu b̄a madena ama ndai, 17 sia kauna nami karongga nggahi ake d̄i nggomi, <Kangampu weapu ncara ro kancaru sa'ed̄ohomu d̄i nggomi ntoina.> Ndad̄i, kai dou ma ndad̄i ada-ada Allah Ta'ala ra nemba b̄a ama ndai, nami maraho, kangampu to'ipu ncara ro kancaru rawa'u karawi b̄a nami.>> La Yusuf nangina, wakatu ringana nggahi ra karongga b̄a dou ede.
18 Edempara sa'ed̄ohona ede mai ro sujuna d̄i tando la Yusuf ro nggahina, <<Nami ake mangawa ndad̄i ada nggomi.>>
19 Pala la Yusuf nggahina d̄i siad̄oho, <<Itad̄oho aina dahumu d̄i mada, mada wati loaku karawi b̄une Allah Ta'ala. 20 Itad̄oho wa'ura mafakamu karawi ma iha d̄i mada, pala Allah Ta'ala rungkana karawi ma'iha ede ndad̄i taho loakud̄u au ma randad̄i ntoina ede mboto dou ma mori ake loa d̄ikasalama. 21 Aina darura, mada d̄imakancihina au d̄iparalu b̄a itad̄oho ro d̄i anad̄ohomu.>> Ndedeku la Yusuf kasana weana ade sa'e ro arina kai nggahi ro eli ma taho ro ntika, ndad̄ina siad̄oho sana adena.
La Yusuf Madena
22 La Yusuf ngge'e mpa midina d̄i Mesir lab̄o iwa ro wekina, sia morina sampe umuna 110 mba'a. 23 Sia mbuipu rakana eda ana ro ompu la Efraim. Sia raka rauna kab̄ua ana-ana la Makhir, eded̄u ompu la Manasye, b̄une ana ndaina. 24 Nggahi la Yusuf d̄i ari ro d̄i sa'ed̄ohona, <<Mada wa'ura d̄eni madekaiku; pala Allah Ta'ala tantu d̄imajaga ro sandakana itad̄oho ro ma d̄anda ro wa'a itad̄oho losa d̄i dana ro rasa ake, lao aka dana ro rasa ra sake kai sumpa b̄a Allah Ta'ala d̄i la Ibrahim, Ishak ro la Yakub.>> 25 Edempara la Yusuf kauna sumpa sara'a sa'e ro arina, nggahina, <<Sakepu d̄i mada, b̄a one nggara nad̄anda ro wa'asi b̄a Allah Ta'ala itad̄oho lao dula d̄i dana ro rasa ede, itad̄oho pab̄uapu wa'a raumu peke ro rui mada.>> 26 Sawa'u b̄a ede, la Yusuf madena d̄i Mesir d̄i umuna 110 mba'a. Siad̄oho kab̄uana timba la Yusuf kai marakani lo'i loakud̄u wati mbaina, edempara tauna ade parab̄o.