La Yakub Ngoa Wi'ina D̄i Anad̄ohona
49
Edempara la Yakub ouna anad̄ohona ro nggahina, <<Nggomid̄oho mai kab̄oropu wekimu ta ake, d̄eni lab̄o nahu. Nahu d̄imangoa nggomid̄oho au-au d̄i'iu b̄a nggomid̄oho d̄i wakatu ma kento.2 Kab̄oropu wekimu, oe ana-ana la Yakub,
ringa ro kade'epu nggahi la Israil amamu.
3 Ruben, anaku masasa'e,
nggomiku tenggo ro waleku, wua saramba tenggo ro kante'eku,
nggomi ma wancu gaga ro ma wancu tenggo d̄i ade weki sara'a anaku.
4 Nggomi b̄une oi ma wati wa'u d̄itapa,
ndad̄ina laina nggomi ma penti poda;
b̄a one nggomi wa'ura maru campo lab̄omu wei kento nahu,
kasampu b̄a nggomi hid̄i marukai amamu.
5 La Simeon ro la Lewi, sa'e lab̄o ari sama mpa parangena;
d̄aha siad̄oho eded̄u rawi ma toku ro kasa.
6 Nahu wati d̄imab̄atu ro d̄imakalu'u weki,
ade mafakakai siad̄oho,
b̄ara ade mbanikaina, siad̄oho hadena dou,
ma kakoa capi d̄ikasanakai adena.
7 Ihara siad̄oho, b̄ara ipi poda mbanina ede,
ihara fa'a ade siad̄oho, b̄ara toku ro dab̄ae siad̄oho.
Nahu d̄imakambari mburana siad̄oho d̄i sara'a dana ro rasa Israil.
Nahu d̄imawura rerona siad̄oho d̄i sara'a bangsa.
8 Yehuda, nggomi b̄une singa d̄imakumpa deri musumu;
Sa'e ro arimu d̄imaroi nggomi
ro suju d̄i tando nggomi.
9 Yehuda, b̄une singa ndara:
Sawa'u b̄a nggori hadena musu, sia mbali aka karombona;
sia aluna weki edempara tokona,
ro wati kone sab̄ua dou rau ma disana hako sia.
10 La Yehuda d̄imanenti tiki sangajikai,
londo ro maina d̄imaparenta santoi-ntoina.
Bangsa-bangsa d̄imawa'a hadia,t
nasuju ro to'a d̄i tando sia.
11 Ana keledai d̄iki b̄a sia d̄i fu'u haju anggo,
fu'u anggo ma wancu taho;
Sia dub̄ana kani ro lombona kai oi anggo,
anggo kala b̄une kala ra'a.
12 Kala madana b̄ara nonona anggo,
b̄ura woina b̄ara nonona susu.u
13 Zebulon d̄imangge'e d̄eni lab̄o moti,
kapa ro lopi d̄imalab̄u d̄i kengge motina.
Saraka aka Sidon watas dana ro rasana.
14 Isakhar eded̄u b̄une keledai ma tenggo ma toko d̄i hela d̄ua garanji ra wa'ana.
15 Wakatu edana, b̄a one hid̄i ede nawancuku tahona
ro nawancuku howona dana ro rasa ede,
sia te'ena d̄incana d̄itundukaina wua d̄iwa'ana ro nangawa ka'ada b̄a dou.
16 Nggomi Dan, d̄imaparesa ncihi ro ncara bangsamu,
ro nggomi d̄imandad̄i suku b̄une suku-suku makalai d̄i Israil.
17 Nggomi b̄une sawa d̄i kengge ncai,
sawa ma wari d̄i kengge ncai to'i,
ma noto ed̄i jara
sampe mab̄u dou ma nentena.
18 Io RUMA, salamakai ra mbei b̄a Ita, edeku d̄ingena-ngena b̄a mada.
19 Gad, nggomi d̄i dei b̄a parampo,
pala nggomi d̄imarampo mbalina siad̄oho.
20 Asyer, ngaha ro nonomu na'ipiku rembana, ro
nggomi d̄imaka'ambi wea ngaha ro nono d̄i ru'u b̄a sangaji-sangaji.
21 Naftali, b̄une maju siwe ma hori weki;
ana-anana wancuku ntikana.v
22 Yusuf b̄une keledai ndara,
keledai daro ma d̄eni lab̄o mada oi,
marai hodi rero d̄i tinti doro.w
23 Konena musu-musu ma mai dei kapoda sia,
ma cocona kai fana.
24 Pala fana la Yusuf ngge'e mpa tenggo ro ancuna ngge'e mpa kante'ena,
b̄ara kuasa Majaga Ro Sandaka Ma Wancu Tenggo,
Allah Ta'ala b̄a la Yakub, Doro wadu Israil.
25 Allah Ta'ala ra nemba b̄a amamu ma bantuna nggomi,
Ma Wancu Kuasa ro ma barekana nggomi
kai ura ma ramai ra d̄i langi,
ro oi ma ramai ta awa dana,
lab̄o ana-ana ro binata-binata,
26 gandum ro b̄unga.y
Bareka Allah Ta'ala ra tarima b̄a amamu,
na'ncewi ese, ese mai b̄a ntau ro wara d̄i doro-doro ma wa'ura wara ntoi wa'una.z
Raho-raho to'i mpa londo sara'a bareka ede ta ese wawo tuta la Yusuf, ta ese tantanggana. Siaku ma ipi na'e d̄i ade weki ari ro sa'ed̄ohona.
27 Benyamin eded̄u b̄une lako doro ma nggange.
D̄i aimasid̄i sia kumpana au d̄ine'ena ngaha.
D̄i aimangad̄i sia cengga-cenggana ede.>>
28 Edeku sampuru d̄ua suku Israil ro nggahi ro eli ra renta b̄a la Yakub ama siad̄oho, wakatu ngoa wi'ina d̄i cua-cua anad̄ohona.
La Yakub Made D̄i Mesir Ro Ra Umbu D̄i Kanaan
29-30 Sawatipu b̄a madena la Yakub ngoa wi'i walina d̄i anad̄ohona, nggahi sia, <<D̄i samporo walimpa ra nahu d̄imamade b̄une wa'i ro waroku. Umbupu nahu d̄i kompe siad̄oho ade karombo doro d̄i Makhpela, ta wela ele b̄a Mamre d̄i dana ro rasa Kanaan. La Ibrahim wa'ura welina karombo ro oma d̄i la Efron dou Het ede, d̄i kandad̄ikaina dana rade. 31 Ta edeku ra'umbukai la Ibrahim ro la Sara, la Ishak ro la Ribka ro ta ede rau, nahu ra'umbukaiku la Lea. 32 Oma ro karombo doro ma wara ta ede wa'ura colana d̄i dou Het. Umbupu nahu ta ede.>> 33 Sawa'u b̄a la Yakub nggori ngoa wi'ina d̄i anad̄ohona, sia maruna edempara madena.