La Yakub B̄arekana La Efraim Ro La Manasye
48
Pila-pila wakatu sawa'u b̄a ede, ronggara haba d̄i la Yusuf b̄a one amana ma wunga supu na'e. Ndad̄i laora sia lab̄o ana-anana, eded̄u la Manasye ro la Efraim lao tiona la Yakub. 2 Wakatu ringa b̄a la Yakub b̄a one la Yusuf ma mai, sia usahana katenggo weki, edempara tu'u dohona. 3 Nggahi la Yakub d̄i la Yusuf, <<Allah Ta'ala Ma Wancu Kuasa wa'ura katada weki-Na d̄i nahu aka Lus, d̄i dana ro rasa Kanaan ro wa'ura barekana nahu.>> 4 Sia nggahina d̄i nahu, <<Nahu d̄imambei mboto ana ro ompu, loakud̄u londo ro maimu ndad̄i mboto bangsa; Nahu d̄imambei dana ro rasa ake d̄i ru'u londo ro mai nggomi ndad̄i ntau siad̄oho santoi-ntoina.>>5 La Yakub nggahi walina, <<Yusuf, d̄ua dou anamu ede la Efraim lab̄o la Manasye ranggana ara Mesir ake sawatipu b̄a rongga nahu ta ake, wi'ikai b̄a nahu ana nggomi ede sama mpa b̄une ana nahu, la Ruben lab̄o la Simeon. 6 Nggara wei nggomi nanggana walisi ana-anamu, siad̄oho wati d̄iwi'ikai b̄a nahu kai ana-ana nahu, malaisi ngge'e mpa ana nggomi; pasaka d̄i ru'u b̄a siad̄oho natarimaku d̄i la Efraim ro d̄i la Manasye. 7 Karawi ndedekai b̄a nahu lampa rawi ede d̄i ru'u b̄a la Rahel inamu. Ade lampa ro laokai nahu ra d̄i Mesopotamia, inamu made d̄i dana Kanaan, wati d̄o'ona lab̄o Efrata ro nahu nawancuku ncoki adeku. Sia wa'ura umbu b̄a nahu ta aka, d̄i kengge ncai malao aka Efrata.>> <Ake Efrata, ngarana Betlehem.>
8 Wakatu la Yakub edana ana-ana la Yusuf ede, sod̄i b̄a sia, <<Cou siad̄oho ake?>>
9 Cambe b̄a la Yusuf, <<Akeku ana-ana mada ra mbei b̄a Allah Ta'ala d̄i mada d̄i dana Mesir ake.>> La Yakub nggahina, <<Kad̄enipu siad̄oho d̄i nahu loakud̄u nahu mabarekana siad̄oho.>> 10 La Yakub watid̄u loana eda taho b̄ara sia wa'ura tua ro madana wa'ura gawu. La Yusuf kad̄enina anad̄ohona d̄i la Yakub ro sia pohu ro ngiluna siad̄oho. 11 Edempara nggahira la Yakub d̄i la Yusuf, <<Kacai b̄a nahu, nahu wati d̄ima'eda angi wali lab̄o nggomi, pala ake Allah Ta'ala wa'ura mbeina wakatu d̄i nahu loakud̄u eda angi lab̄o ana-ana nggomi rau.>> 12 Edempara la Yusuf wehana anad̄ohona ma wunga iwa b̄a la Yakub ro ndai sia sujuna d̄i tando amana.
13-14 Sawa'u b̄a ede, la Yusuf tohona d̄ua dou anana ede d̄i kompe la Yakub, la Efraim ma cumpukaina ede ta sab̄ae ku'i ro la Manasye ma sasa'e ta sab̄ae wanana. Pala la Yakub cekona rimana ro tohona rima wanana ta ese wawo tuta la Efraim ro rima ku'ina ta ese wawo tuta la Manasye. 15 Sawa'u b̄a ede, barekana la Yusuf,s nggahina,
<<Allah Ta'ala, Siaku ra nemba b̄a la Ibrahim ro la Ishak,
Sia ma d̄anda ro wa'a nahu saraka ake;
16 Siaku, mala'eka ma wa'ura hori kalosa nahu d̄i samenana bahaya.
Raho-raho to'impa Allah Ta'ala ede barekana siad̄oho d̄uana ake.
Raho-raho to'impa d̄ipehe ncau-ncau b̄a dou ngara nahu ro ngara la Ibrahim ro la Ishak
b̄ara anad̄ohoku ake!
Raho-raho to'i mpa siad̄oho ntauna ana ro ompu,
ro ntauna londo ro mai ma mboto d̄i dunia.>>
17 La Yusuf wati sana adena wakatu edana amana ma toho rima wanana d̄i wawo tuta la Efraim, edempara wehana rima amana ra tohona ese wawo tuta la Efraim ro toho b̄a la Yusuf ese wawo tuta la Manasye. 18 Nggahi la Yusuf d̄i amana, <<Aina kandede ama, akeku ana mada ma sasa'ena; tatohopu rima wana ita ta ese wawo tutana.>>
19 Pala tula b̄a amana ro nggahina, <<Nahu kab̄ade, anaku, nahu b̄ade.>> La Manasye d̄imana'e kuasana ro londo ro mai rauna d̄imandad̄i bangsa mana'e. Pala arina d̄imancewi na'e kuasana ntewikaisi lab̄o sia, ro londo ro mai arina ede d̄imandad̄i bangsa-bangsa ma na'e.>>
20 Edempara bareka walina siad̄oho d̄uana ede d̄i ainaina ede, nggahina, <<Dou Israil d̄imapehe ngaramu nggara nabarekasi dou makalai. Siad̄oho d̄imanggahi, <Raho-raho to'i mpa Allah Ta'ala kandad̄ina nggomi b̄une la Efraim ro la Manasye.>> Ndedeku la Yakub ka'ipi pentina la Efraim ntewikaisi la Manasye.
21 Edempara nggahi la Yakub d̄i la Yusuf, <<Nahu nad̄enira madeku, pala Allah Ta'ala d̄imabantuna nggomid̄oho lao mbali aka dana ro rasa wa'i ro waromu. 22 Nahu d̄imambei d̄i nggomi laina d̄i sa'ed̄oho ro arimu, dana ro rasa Sikhem, dana ma howo ede ra rampa b̄a nahu d̄i dou Amori kai peda ro fana.>>