La Yakub Lao Satandona Firaun
47
1-2 Sawa'u b̄a la Yakub lab̄o iwa ro wekina rongga d̄i Mesir, la Yusuf wa'ana lima dou sa'e ro arina, edempara lao satandona sangaji. Nggahi sia d̄i sangaji ede, <<Ama ro sa'e ro ari mada wa'ura tu'u wi'ina dana ro rasa Kanaan. Siad̄oho wa'a sara'ana mbe'e ro jimbana, capi ro sara'a ntau ro wara siad̄oho, ake siad̄oho wara d̄i dana Gosyen.>> 3 Sangaji sod̄ina d̄i siad̄oho, <<Au karawi nggomid̄oho?>>Cambe b̄a siad̄oho, <<Madad̄oho ake dou ma ompukai mbe'e ro jimba b̄une wa'i ro waro madad̄oho. 4 Madad̄oho mai ngge'e d̄i dana ro rasa ake, b̄a one d̄i dana Kanaan wunga b̄oha b̄a bala hid̄o, ndad̄ina watid̄u wara mpori wali d̄i ru'u b̄a mbe'e-mbe'e ro jimba-jimba madad̄oho. Takau to'ipu madad̄oho ngge'e d̄i dana Gosyen.>> 5 Edempara nggahira sangaji d̄i la Yusuf, <<Ake ama ro sa'e ro arimu wa'ura wara ta ake. 6 Wi'ikaipu dana ro rasa Mesir ake b̄une dana ro rasa ndaimu. Kaupu siad̄oho ngge'e d̄i dana ro rasa Gosyen, dana ma taho poda d̄i Mesir. Ro kad̄alepu d̄i weki siad̄oho ede ma loa tonggu ro kab̄ua binata ntadi nahu.>>
7 La Yusuf kapata rauna amana d̄i sangaji. La Yakub barekana sangaji, 8 ro sangaji sod̄ina d̄i sia, <<Sab̄une umu ita ama?>>
9 Cambe b̄a la Yakub, <<Adamu ake wa'ura mori 130 mba'a kai dou ma ngge'e rero. Mori adamu b̄ini b̄a susa ro ncoki ro poro umu ntewikaisi lab̄o umu wa'i ro waroku.>> 10 Sawa'u b̄a ede, la Yakub rahona weki ne'e dula ro rahona d̄i Allah Ta'ala bareka d̄i ru'u b̄a sangaji. 11 La Yusuf bantuna amana ro sa'e ro arina ngge'e d̄i Mesir. Sia mbeina dana ma ipi taho d̄i kantau b̄a siad̄oho d̄eni lab̄o kota Rameses, b̄une ra parentakai b̄a sangaji. 12 Ro la Yusuf mbei kancihina ngaha ro nono d̄i ru'u b̄a amana, sa'e ro arina ro sara'a iwa ro wekina ma ncihi ncao b̄une mboto ana siad̄oho.
Bala Hid̄o
13 Bala hid̄o ede na'ipi podaku, ndad̄ina ta b̄e-b̄e watid̄u wara ngaha ro nono wali. Dou-dou Mesir ro dou-dou Kanaan narome ro wati wa'una karawi au-au b̄ara hid̄ona. 14 Sanikina siad̄oho welina gandum, la Yusuf kab̄orona piti co'i gandum ede ro wi'ina d̄i asi sangaji. 15 Wakatu cumpura piti d̄i Mesir ro d̄i Kanaan, dou-dou Mesir mai satandona la Yusuf ro nggahina, <<Ta mbei to'ipu madad̄oho ngaha ro nono! Aina co'ota madad̄oho made. Piti madad̄oho wa'ura mpoi.>>
16 Cambe b̄a la Yusuf, <<Nggara watisid̄u warana pitimu, mbeipu binata ntadimu, nahu ma cepena kai ngaha ro nono d̄i nggomid̄oho. 17 Edempara siad̄oho mbeina binata ntadina d̄i la Yusuf ro la Yusuf mbeina ngaha ro nono d̄i siad̄oho ede. Ro siad̄oho ede cepena ngaha ro nono ede kai jara, jimba, mbe'e, capi ro keledai. D̄i mba'ana ede la Yusuf mbeina ngaha ro nono siad̄oho ro siad̄oho colana kai binata ntadi.
18 Samba'a sawa'u b̄a ede, siad̄oho mai satando walina la Yusuf ro nggahina, <<Madad̄oho mangoa ntiri d̄i ita ruma b̄a one piti madad̄oho wa'ura cumpu ro binata ntadi madad̄oho wa'ura ndad̄i ntau ita ruma. Madad̄oho watid̄u ntaumu au-au wali d̄imbei b̄a madad̄oho d̄i ita, selasi sarumbu madad̄oho ro dana madad̄oho. 19 Ita aina co'ota madad̄oho made! Aina co'ota oma madad̄oho mango karante. Colapu ndai madad̄oho ro dana madad̄oho kai gandum. Kai ndedena, madad̄oho ro dana madad̄oho ndad̄i ntau sangaji. Tambei to'ipu gandum d̄i tuwukai mori madad̄oho ro tambei raupu d̄ei d̄i nggud̄a b̄a madad̄oho aka oma!>>
20 Edempara la Yusuf cola sara'ana dana ra landa b̄a dou Mesir d̄i ru'u b̄a sangaji. Sanikina dou Mesir kai tani adena landa danana, b̄ara wakatu bala hid̄o ede nawancuku ipi podana. Ndad̄i sara'ana dana Mesir ndad̄i ntau sangaji. 21 Sara'a dou Mesir kandad̄i b̄a la Yusuf ada Sangaji Mesir. 22 Dana imam-imam mpa ma wati raweli b̄a la Yusuf. Imam-imam wati pori landa danana b̄a one sara'a au-au d̄iparalu b̄a siad̄oho, wa'ura mbei kancihi b̄a sangaji. 23 Ndad̄i la Yusuf nggahina d̄i dou-dou ede, <<Ainaina ake nggomid̄oho ro danamu wa'ura cola b̄a nahu d̄i ru'u b̄a sangaji. Ake d̄ei d̄inggud̄a b̄a nggomid̄oho d̄i omamu. 24 D̄i wakatu wehakai hasi, nggomid̄oho pab̄uaku mbei saru'u ade hasi ra cengga lima d̄i ru'u b̄a sangaji. Sewina loa kani b̄a nggomid̄oho d̄i ru'u d̄ei ro d̄i ru'u ngaha ro nono iwa ro wekimu.
25 Cambe ba siad̄oho, << Ita ruma wa'ura kasalamata madad̄oho ro taho adeta d̄i madad̄oho. Madad̄oho nira ademu ndad̄i ada ita.>> 26 Edempara la Yusuf kasahana atoran-atoran ede d̄i dana ro rasa Mesir, eded̄u b̄a one saru'u ade ra cengga lima hasi pakona pab̄uaku ndad̄i ntau sangaji. Saraka ake atoran-atoran ede mbuipu d̄ikalampa. Dana imam-imam mpa ma wati rakantau b̄a sangaji.
Sawatipu Madena La Yakub Ngoa Wi'ina D̄i La Yusuf
27 La Yakub ngge'ena d̄i Mesir, d̄i dana Gosyen ro siad̄oho ndad̄i ntau ro wara ro ntau ana ro ompu ma mboto ta ede. 28 La Yakub sampuru pidu mba'a morina d̄i Mesir ro madena wakatu umuna 147 mba'a. 29 Wakatu d̄enira d̄imadekaina, sia ouna la Yusuf anana ede ro nggahina d̄i sia, <<Tohopu rimamu d̄i hela d̄ua fu'u wangga nahu ro sumpapu b̄a one nggomi wati d̄ima'umbu nahu ara Mesir ake.r 30 Raho b̄a nahu wa'apu timba nahu ra d̄i Mesir ake, umbupu nahu d̄i hid̄i wa'i ro waroku, d̄i ade rade siad̄oho.
Edempara cambe b̄a la Yusuf, <<Mada d̄imakalampana au ra parentakai b̄a ita ede ama.>>
31 Nggahi la Yakub, <<Sumpara b̄a one nggomi d̄imakarawina.>> La Yusuf sumpana ro la Yakub rentana do'a syuku d̄i marukaina.