La Yakub Ro Iwa Ro Wekina Lao Aka Mesir
46
La Yakub ka'ambina weki ro wa'a sara'ana ntau ro warana, edempara laona ro wakatu ronggana d̄i Bersyeba, sia d̄onggo ro mbeina koroba d̄i Allah Ta'ala ra nemba b̄a la Ishak, amana. 2 D̄i sab̄ua aimangad̄i, ade nifina sia ou b̄a Allah Ta'ala, <<Yakub, Yakub!>><<Io, RUMA,>> cambe b̄a la Yakub
3 <<Nahu ake Allah Ta'ala, Allah Ta'ala ra nemba b̄a amamu.>> Nggahi-Na, <<Aina dahu lao aka Mesir, b̄a one Nahu d̄imakandad̄ina londo ro mai nggomi bangsa ma na'e d̄i Mesir. 4 Ndai Nahu d̄imalab̄omu lao aka Mesir ro d̄imawa'a mbalina londo ro maimu ara dana ro rasa ake, la Yusuf d̄imawara d̄i kompe nggomi nggara rakasi wakatu madekaimu.>>
5 Edempara la Yakub tu'u wi'ina dana ro rasa Bersyeba. Anad̄ohona ampana la Yakub lab̄o ana ro wei siad̄oho ese kareta ra nggadu b̄a sangaji Mesir. 6 Siad̄oho wa'a rauna binata ntadi ro sara'a ntau ro wara ra raka b̄a siad̄oho d̄i Kanaan, edempara siad̄oho laona aka Mesir. 7 La Yakub wa'a sara'ana ana ro ompuna nataho ma mone ro ma siwe.
8 Akeku ngara ana ro ompu la Yakub ma lao b̄atu aka Mesir: 9 La Ruben anana ma sasa'e ro ana-anana eded̄u La Henokh, Palu, Hezron ro la Karmi. 10 La Simeon ro ana-anana eded̄u la Yemuel, Yamin, Ohad, Yakhin, Zohar ro la Saul inana dou Kanaan. 11 La Lewi ro ana-anana eded̄u La Gerson, Kehat, ro la Merari. 12 La Yehuda ro ana-anana eded̄u la Syela, Peres ro la Zerah, ana la Yehuda ma kalai, eded̄u la Er lab̄o la Onan, siad̄oho wa'ura made aka Kanaan, Ana-ana la Peres eded̄u la Hezron lab̄o la Hamul. 13 La Isakhar ro ana-anana eded̄u: la Tola, Pua, Ayub ro la Simron. 14 La Zebulon ro ana-anana eded̄u: la Elon lab̄o la Yahleel. 15 Siad̄oho sara'ana ede ana-ana ra nggana b̄a la Lea ru'u la Yakub d̄i Mesopotamia, ari mai b̄a ede rau wara ana siwena ma ngara la Dina. Ndad̄i sara'a weki londo ro mai la Yakub ro weina la Lea eded̄u tolu mpuru tolu dou.
16 La Gad ro ana-anana eded̄u la Zifyon, Hagi, Syuni, Ezbon, Arodi ro la Areli. 17 La Asyer ro ana-anana eded̄u la Yimna, Yiswa, Yiswi, ro la Beria ro ana siwena la Serah ro ana-ana la Beria eded̄u la Heber lab̄o la Malkiel. 18 Sampuru ini dou ede eded̄u londo ro mai la Yakub ro weina la Zilpa, eded̄u ada siwe ra mbei b̄a la Laban d̄i la Lea.
19 La Rahel, wei la Yakub nantau d̄ua dou anana, eded̄u: la Yusuf lab̄o la Benyamin. 20 D̄i Mesir la Yusuf nantau d̄ua dou ana, eded̄u la Manasye lab̄o la Efraim ra nggana b̄a weina la Asnat, ana la Potifera ma ndad̄i imam d̄i Heliopolis. 21 La Benyamin ro ana-anana eded̄u la Bela, Bekher, Asybel, Gera, Naaman, Ehi, Ros, Mupim, Hupim ro la Ared. 22 Sampuru upa dou anana ede, eded̄u londo ro mai la Yakub lab̄o weina la Rahel.
23 Sawa'u b̄a ede, ana la Dan eded̄u la Husim. 24 La Naftali ro ana-anana eded̄u la Yahzeel, Guni, Yezer ro la Syilem. 25 Pidu dou anana ede, eded̄u londo ro mai la Yakub ro weina la Bilha, ada siwe ra mbei b̄a la Laban d̄i la Rahel.
26 Londo ro mai la Yakub ma lao aka Mesir sara'ana ini mpuru ini dou, watipu ra reke ridod̄ohona. 27 Ana-ana la Yusuf ranggana d̄i Mesir wara d̄ua dou, ndad̄ina iwa ro weki la Yakub ma rongga d̄i Mesir sara'ana wara pidu mpuru dou.
La Yakub Ro Iwa Ro Wekina D̄i Mesir
28 La Yakub kauna la Yehuda lampa ulu d̄imangoa la Yusuf loakud̄u la Yusuf mai eda angina lab̄o amana d̄i Gosyen. 29 La Yusuf nentena kareta ro laona aka Gosyen d̄i eda angikaina lab̄o amana. Wakatu siad̄oho eda angina, la Yusuf pohuna amana ro ntoi poda nangina. 30 Nggahi la Yakub d̄i la Yusuf, <<Ake nahu nira adeku made, b̄ara nahu wa'ura edaku nggomi ro kab̄adera b̄a one nggomi mbuipu morimu.>>
31 Edempara nggahira la Yusuf d̄i sa'e ro arina ro d̄i iwa ro wekina ma kalai, <<Mada d̄imalao satando Firaun lao ngoaku b̄a one itad̄oho wa'ura tu'u wi'imu Kanaan ne'e kab̄oro weki lab̄o mada ta ake. 32 Ro mada d̄imangoa sia b̄a one itad̄oho eded̄u dou matonggu ro makab̄ua jimba ro capi, ro wa'ura wa'amu binata ntadi ro sara'a ntau ro waramu. 33 Nggara itad̄oho na ousi b̄a sangaji ro sod̄ina; au taki karawi itad̄oho, 34 ngoapu sia b̄a one itad̄oho ake dou ma taki ntadi binata, ra'aipu to'i wa'umu, sama b̄une wa'i ro waromu. Kai ndedena, sia d̄imakau itad̄oho ngge'e d̄i dana Gosyen.>> La Yusuf nuntu ndedekaina b̄a one dou Mesir nanajis nggara namori samasi lab̄o dou ma ntadi binata.