La Yusuf Ngoa Kantirina Mab̄oha Weki Ndaina
45
La Yusuf watid̄u wa'una pi'i adena d̄i tando pagawe-pagawena, b̄ara ndedena sia kauna losa pagawed̄ohona loakud̄u sia loa ngoa ntiri mab̄oha weki ndaina d̄i ari ro sa'ed̄ohona. 2 Sawa'u b̄a losa sara'a pagawena, la Yusuf nangi orana, ndad̄ina dou-dou Mesir ta ari lua narakaku ringa eli nangi la Yusuf ro haba mab̄oha au mandad̄i ede rongga aka asi sangaji. 3 Nggahi la Yusuf d̄i ari ro sa'ed̄ohona, <<Mada ake la Yusuf. Sab̄ua mbuipu morina ama?>> Ndede ringana au ra nggahi b̄a la Yusuf ede, siad̄oho nadahu podaku, ndad̄i wati loana cambe au-au. 4 Edempara nggahi la Yusuf d̄i siad̄oho, <<Mai d̄enipu ta ake.>> Edempara siad̄oho lao d̄enina ro la Yusuf nggahi walina, <<Mada la Yusuf ralanda b̄a itad̄oho aka dou Mesir ntoina. 5 Pala aina dahu atao sinci ademu, b̄ara landamu mada. Sapodakaina Allah Ta'ala ma rawa'a ulu mada ta ake d̄i kasalamakaina dou mamboto. 6 Ake ampode mba'a kad̄uakaina wakatu bala hid̄o ro mbuipu lima mba'a wali ntoina, dou wati d̄imanggud̄a ro congge ro wati wara oru wehakai hasi. 7 Allah Ta'ala wa'ura wa'a uluna mada d̄imakasalama mori ro woko itad̄oho ro londo ro maimu. 8 Ndad̄i, sapodakaina laina itad̄oho ma rakandad̄i mada wara d̄i hid̄i ake, malaisi Allah Ta'ala. Allah Ta'ala ma rakandad̄ina mada pagawe ma ese b̄ora kai ncai sangaji Mesir. Allah Ta'ala rau ma rakand̄ad̄ina mada makuasakai sara'ana uma ro salaja sangaji Mesir.9 Ake, lao dula rocipu aka ama ro nggahipu d̄i ama, b̄a one la Yusuf, ana ita ma nggahi ndake, <Allah Ta'ala wa'ura kandad̄ina mada dou makuasakai d̄i sara'a dana Mesir, mai rocira. 10 Ama loa ngge'e d̄i dana ro rasa Gosyen loakud̄u d̄eni lab̄o mada ro ana ro ompuna, jimba, mbe'e, capi ro sara'a ntau ama. 11 Nggara ama nangge'esi d̄i Gosyen, mada loa ntanda ro eda ama. Wakatu bala hid̄o warapu lima mba'a wali ro mada d̄ima'usahana loakud̄u ama, iwa ro weki ro binata ntadi ama wati kura ngaha ro nonona.>
12 Nggahi la Yusuf wali d̄i ari ro sa'ed̄ohona, <<Ake ndai itad̄oho mawa'ura b̄ade, nggomi rau Benyamin ariku b̄a one nahu poda-poda la Yusuf. 13 B̄ara ndedena, ngoapu d̄i ama ndai b̄a one nawancu na'ena kuasa mada ta ake, d̄i Mesir, ro ngoapu d̄i ama sara'a ra eda b̄a itad̄oho ro mai wa'a rocipu ama ta ake.>>
14 Sawa'u b̄a ede, sia pohuna la Benyamin, arina ede ro nangina b̄a neo adena, la Benyamin rau nangina ro pohuna sa'ena. 15 La Yusuf ma mbuipu nangi ede, pohu ro ngiluna sa'ed̄ohona. Sawa'u b̄a ede, siad̄oho tampu'ura nuntu ro nggahina lab̄o la Yusuf.
16 Wakatu raka ringa b̄a sangaji d̄i asina haba b̄a one sa'e ro ari la Yusuf wara maina, sangaji ro pagawe-pagawena neo ade rauna. 17 Edempara nggahira sangaji d̄i la Yusuf, <<Kaupu sa'e ro arimu ede wua gandum kai keledai siad̄oho ro lao wa'apu aka Kanaan. 18 Lao weha aopu amamu ro iwa ro weki siad̄oho ro mai ngge'epu ta ake. Nahu d̄imambeina siad̄oho dana ma taho poda d̄i Mesir ro siad̄oho naloaku mori kai remba ngaha ro nono d̄i hasi dana ede. 19 Kaupu siad̄oho wa'a rau pila-pila mbua kareta ma wara d̄i Mesir d̄i wuakaina ana-ana ro wei siad̄oho ro amamu. 20 Ngoapu d̄i siad̄oho b̄a one siad̄oho aina darura adena mab̄oha ntau ro warana ma wara d̄i dana ro rasa Kanaan, b̄a one au-au ma ipi taho d̄i Mesir d̄imandad̄i ntauna.
21 Ana-ana la Yakub kalampana au ra parentakai b̄a sangaji ede. La Yusuf mbeina d̄i siad̄oho pila-pila mbua kareta b̄une ra parentakai b̄a sangaji ro osuna ade lampa ro laokai siad̄oho. 22 Mbei rauna d̄i siad̄oho cua ndaina sapasa kani ro lombo ma b̄ou d̄ikani menana ade lampa ro laokaina, pala d̄i la Benyamin mbeina tolu ratu piti salaka ro lima pasa kani ro lombo ma b̄ou. 23 Sia nggadu rauna d̄i ru'u b̄a amana sampuru mbua keledai rangga, d̄i wuakaina barang-barang ma taho poda d̄i Mesir ro sampuru mbua keledai siwe d̄i wuakaina gandum, roti, ngaha ro nono ma kalaina d̄i ngaha ade lampa ro laokaina aka Mesir. 24 Edempara sia kauna lao sa'e-sa'e ro arina ro nggahina d̄i siad̄oho, <<Aina cence ncihi d̄i ncai.>>
25 Siad̄oho tu'u wi'ina Mesir ro lao dulana aka Kanaan d̄i la Yakub, amana. 26 Sawa'u b̄a siad̄oho ronggana d̄i Kanaan, nggahira siad̄oho d̄i amana, <<La Yusuf mbuipu morina. Sia makuasakai d̄i sara'a dana ro rasa Mesir!>> Ndede ringana haba ede, la Yakub mbora akana ro sia wati imbina d̄i siad̄oho.
27 Pala sawa'u b̄a siad̄oho carita sara'ana au ra nggahi b̄a la Yusuf ro wakatu sia edana kareta ranggadu b̄a la Yusuf d̄i weha aokaina sia lao aka Mesir, sia kawara lalona weki. Edempara nggahira la Yakub, 28 <<Ncihira! Aina ranuntu wali, ma penti ana nahu la Yusuf mbuipu morina, ede mpa d̄ine'e b̄a nahu! Nahu pab̄uaku lao ro eda angi lab̄o sia sawatipu made nahu.>>