Gela Salaka
44
Sawa'u b̄a ede, la Yusuf parentana d̄i dou ma na'ekai d̄i uma ro salajana, <<Isipu karu-karu doud̄oho ede kai gandum, sab̄une d̄iwa'una wa'a b̄a siad̄oho ro tau mbalipu pitina ade cua-cua karuna, d̄i wawo gandum ede. 2 Tau raupu gela salaka nahu ta ade karu ari siad̄oho ma cumpukaina, sama-sama lab̄o piti racolakaina gandum ede.>> Dou ede karawina au ra parentakai b̄a la Yusuf. 3 B̄ala ai sanai, sid̄i-sid̄i poda sa'e ro ari la Yusuf lao dulana ro wa'ana gandum ra wuakai keledai ntau siad̄oho. 4 Siad̄oho watipu d̄o'ona lab̄o kota ede, la Yusuf nggahina d̄i dou mana'ekai uma ro salajana, <<Coco b̄atu rocipu doud̄oho ede. Nggara wa'usi raka b̄atu b̄a nggomi, nggahipu d̄i siad̄oho, <B̄ab̄auku nggomid̄oho cola cepekaimu rawi ma taho kai rawi ma iha?> 5 B̄ab̄auku nggomid̄oho mpangakaimu gela salaka ruma nahu?q Gela ede d̄i nonokai ruma nahu ro d̄i taki mokekaina. Nggomid̄oho wa'ura karawimu ma iha poda!>>6 Wakatu dou ma na'ekai uma ro salaja ede ronggana d̄i sa'e ro ari la Yusuf, sia karonggana au ra nggahi b̄a la Yusuf. 7 Cambe b̄a siad̄oho d̄i dou ede, <<B̄ab̄auku nggahi ndedekaimu? Sumpa, madad̄oho wati mpangamu! 8 Ndai ita mab̄ade b̄a one piti ra rumpa b̄a madad̄oho ta ese wawo gandum ede, wa'ura b̄ali b̄a madad̄oho d̄i ita. Ndad̄i, wati lu'u b̄a aka madad̄oho mpangamu masa atao salaka d̄i uma ruma ita ede! 9 Nggara gela salaka ede rakasi eda b̄a ita d̄i sab̄ua dou d̄i ade weki madad̄oho, sia d̄ihukum made ro madad̄oho d̄imandad̄i ada ita.>>
10 Dou ma na'ekai uma ro salaja ede nggahina, <<Taho, d̄i cou rarumpakai gela salaka ede, sia mpa d̄imandad̄i ada nami, ma kalai loa lao dula.>> 11 Edempara siad̄oho kalondo rocina ro cua-cua henggana karuna. 12 Dou ma na'ekai uma ro salaja la Yusuf ede paresa kab̄aena karu-karu ede, tampu'u d̄i karu ma sasa'e saraka d̄i karu arina ma cumpukaina. Ro gela salaka ede raraka d̄i karu la Benyamin. 13 Sa'ed̄ohona nawancuku ncoki adena, ndad̄ina siad̄oho sipa-sipana kani ro lombo ndaina, siad̄oho ampa mbalina karu-karu di keledai ro lao mbalina aka kota.
14 Wakatu la Yehuda ro sa'e ro arina rongga aka uma la Yusuf, la Yusuf mbuipu warana d̄i hid̄i ede ro siad̄oho sujuna d̄i tando la Yusuf. 15 Ndad̄i nggahira la Yusuf, <<Au ra wa'u karawi b̄a nggomid̄oho ede? Sab̄ua wati b̄ade b̄a nggomid̄oho b̄a one dou ma b̄une nahu ake, loa dodo ro moke d̄ib̄adekai au ra karawi b̄a nggomid̄oho ma iha ade?>>
16 <<Auku d̄i loa nggahi wali b̄a madad̄oho d̄i ita, ruma?>> Cambe b̄a la Yehuda, <<B̄uneku loa madad̄oho kancihi weki? Allah Ta'ala wa'ura katadana ncara ro kancaru madad̄oho. Ndad̄i, madad̄oho sara'ana d̄imandad̄i ada ita ruma, laina sia mpoa ra rakakai gela ede.>>
17 Pala cambe b̄a la Yusuf, <<Wati! Nahu wati ne'eku karawi kandede! D̄i dou ra rumpakai gela ede mpa, siaku d̄imandad̄i ada nahu, ma kalai loa lao dula aka uma amamu.>>
La Yehuda Horuna La Benyamin
18 La Yehuda lao d̄enina d̄i la Yusuf ro nggahina, <<Kangampu to'ipu rumaku, takau to'ipu mada nuntu wali lab̄o ita rumaku, ai to'ina mbanita d̄i mada. Ita rumaku sama mpa b̄une ndai sangaji Mesir. 19 Ita rumaku wa'ura sod̄ita d̄i madad̄oho ake, <Sab̄ua nggomid̄oho mbuipu mori amamu atao warapu sa'e ro arimu ma kalai?> 20 Cambe b̄a madad̄oho, <Ama madad̄oho mbuipu morina pala nawa'ura tua poda ro wara ari madad̄oho ra nggana wakatu ama wa'ura tua poda. Sa'e sab̄ua ina lab̄o ari madad̄oho ede nawa'ura made, ndad̄i ake d̄i sia kese mpa ma mbuipu mori ro ama madad̄oho nawancuku mecina sia.> 21 Ita ruma kauta madad̄oho mai wa'a sia ta ake loakud̄u eda b̄a ita rumaku. 22 Pala cambe b̄a madad̄oho, b̄a one ana dou ede wati loana ngala lab̄o amana, namade amana nggara natu'u wi'isi b̄a sia. 23 Pala nggahi ita wali, <Nggomid̄oho wati loamu mai satando nahu wali nggara watisi wa'amu arimu ede.>
24 Wakatu madad̄oho dula mbali aka ama madad̄oho, karongga b̄a madad̄oho au ra nggahi b̄a ita ede. 25 Sawa'u b̄a ede, ama madad̄oho kauna madad̄oho mai ta ake wali d̄i welikai ngaha ro nono. 26 Cambe b̄a madad̄oho, <Madad̄oho wati loamu lao ta aka, b̄a one madad̄oho wati loamu lao satando gubernur Mesir nggara madad̄oho watisi wa'amu la Benyamin. Madad̄oho maloa lao mbali ta aka nggara la Benyamin nalao rausi lab̄o madad̄oho.> 27 Edempara nggahi ama madad̄oho, <<Nggomid̄oho mab̄adeku b̄a one la Rahel, wei nahu d̄ua dou mpa anana. 28 Ma sasa'e wa'ura made. Sia wa'ura kumpa b̄a binata nggange, saraka ake nahu watid̄u eda waliku sia. 29 Nggara wa'asi b̄a nggomid̄oho ana nahu ma cumpukai ake ro b̄ohasi b̄a bahaya sia, ncoki ade nahu ra kamai b̄a nggomid̄oho d̄imakarocina made nahu, b̄a one nahu wa'ura tua.> >>
30-31 <<B̄ara ndedena, rumaku,>> nggahi la Yehuda d̄i la Yusuf, <<Ro ake nggara dulasi madad̄oho kai wati wa'amu la Benyamin ede, tantu ama madad̄oho d̄imamade. Morina wara d̄i ana dou ede ro sia wa'ura tua poda, ndad̄i ncoki adena ra kamai b̄a madad̄oho d̄imakarocina made ama madad̄oho. 32 Au walipu mada wa'ura sakeku d̄i amaku b̄a one mada matangguna ana dou ede. Nggahi mada d̄i amaku: nggara mada watisi wa'a mbaliku la Benyamin d̄i ita, madaku d̄imatangguna hukuman santoi mori mada. 33 B̄ara ndedena, mada maraho poda-poda d̄i ita rumaku, takau to'ipu mada midi ta ake ndad̄i ada ita ma cepena ari madad̄oho ake, takau to'ipu sia dula sama lab̄o sa'ed̄ohona. 34 B̄uneku loa mada dula mbali d̄i ama madad̄oho, nggara anana ede watisi dulana lab̄o madad̄oho? Mada wati sampe adeku eda au d̄imandad̄i lab̄o ama madad̄oho ede.>>