Sa'e-Sa'e La Yusuf Lab̄o La Benyamin Lao Aka Mesir Kad̄uakalikaina
43
1-2 Bala hid̄o d̄i Kanaan nanaha ipi poda. Ro gandum ra wa'a b̄a ana-ana la Yakub d̄i Mesir nane'era mpoi, edempara nggahi la Yakub d̄i anad̄ohona, <<Nggomid̄oho lao weli walipu gandum aka Mesir.>>3 Pala la Yehuda nggahina d̄i amana, <<Gubernur Mesir ede wa'ura ngoa kab̄ae podana b̄a one madad̄oho wati loamu lao satando sia nggara madad̄oho watisi wa'amu ari madad̄oho. 4 Nggara kausi b̄a ita wa'a la Benyamin, madad̄oho ma ngawa lao weli wali ngaha ro nono ta aka. 5 Pala nggara watisi kau b̄a ita wa'a la Benyamin, madad̄oho wati ngawamu lao, b̄ara gubernur Mesir ede wa'ura ngoa kab̄ae podana madad̄oho. B̄a one madad̄oho wati loamu lao satando sia wali nggara watisi wa'amu ari madad̄oho.>>
6 Pala nggahi la Yakub, <<B̄ab̄auku nggomid̄oho kasusakaimu nahu kai ngoamu dou ede, b̄a one nggomid̄oho mbuipu wara arimu?>>
7 Cambe b̄a siad̄oho, <<Dou ede sod̄i ncau-ncauna madad̄oho mab̄oha iwa ro weki ndaita, nggahina, <Sab̄ua mbuipu morina amamu? Sab̄ua nggomid̄oho mbuipu ntaumu ari mone ma kalai?> Madad̄oho kai tani ade cambemu samenana au ra sod̄ina ede. Madad̄oho wati b̄ademu b̄a one sia d̄imakau madad̄oho wa'a ari madad̄oho ede.>>
8 Edempara nggahi la Yehuda d̄i amana, <<Takau to'ipu la Benyamin lao lab̄o madad̄oho ro mada d̄imatangguna. Madad̄oho d̄imalao roci loakud̄u ndai wati d̄imamade sarahid̄o. 9 Mada matangguna sia, nggara watisi wa'a mbali b̄a mada sia kai salama, mada matangguna hukuman santoi mori mada. 10 Sapodakaina ake madad̄oho wa'ura d̄ua kali lao ro maimu pai rakausi b̄a ita wa'a la Benyamin.>>
11 Edempara nggahi la Yakub d̄i siad̄oho, <<Nggara pab̄uasi ndedena wa'apu hasi ma wancu taho d̄i dana ro rasa Kanaan ake kai karu-karu nggomid̄oho d̄ihadiakai gubernur Mesir ede, wa'apu anggo mango, oi ani, marakani lo'i, kaleli ro wua badam. 12 Wa'a raupu piti d̄ua kali ncewi mbotona, b̄a one piti ra rumpamu ade karu ede pab̄uapu b̄alimu, kombisi piti ede wati rasangajana tau b̄a siad̄oho ade karu nggomid̄oho. 13 Wa'apu arimu ede ro lao rocira. 14 Raho-raho to'i mpa Allah Ta'ala Ma Wancu Kuasa kandad̄ina gubernur kasi adena d̄i nggomid̄oho loakud̄u sia nangawa mbei mbali la Simeon ro la Benyamin. D̄i ru'u b̄a nahu ake, nggara pab̄uasi mborana d̄ua dou anaku, indo loaku kab̄une b̄a nahu.>>
15 Edempara sa'e ro ari la Yusuf wa'ana hadia-hadia ro piti d̄ua kali ncewi mbotona, edempara laona aka Mesir sama-sama lab̄o la Benyamin. Sawa'u b̄a ronggana d̄i Mesir, siad̄oho lao satandona la Yusuf. 16 Wakatu eda b̄a la Yusuf arina la Benyamin ro sa'ed̄ohona, nggahira sia d̄i dou mataki karawi weana eded̄u dou mana'ekai uma ro salajana, <<Wa'apu dou-dou ede aka uma nahu. Siad̄oho d̄imangaha sama lab̄o nahu d̄i aimarai ake, b̄ara ndedena sambelepu sab̄ua binata ntadi ro ka'ambipu d̄i ru'u b̄a nami.>> 17 Dou ma taki karawi weana ede kalampana au ra parentakai b̄a gubernur ede ro wa'ana la Benyamin ro sa'ed̄ohona ade uma la Yusuf.
18 Wakatu siad̄oho lao wa'a b̄a dou ede aka uma la Yusuf, siad̄oho nadahu podaku ro nggahi siad̄oho, <<Ndai wa'ana ta ake, b̄ara piti ra rumpa b̄a ndai ade karu aipu ndai mai ta ake ntoina. Siad̄oho d̄imawa'u sadeka ndai, edempara nawehaku keledai ndai ro kandad̄ina ndai ada siad̄oho.>> 19 Wakatu siad̄oho ronggana d̄i kompe tad̄a uma la Yusuf, siad̄oho nggahina d̄i dou mana'ekai uma ro salaja la Yusuf, 20 <<Mboto-mboto kangampu ruma, madad̄oho wa'ura parana mai welimu ngaha ro nono ta ake. 21-22 Aipu madad̄oho dulamu, wakatu madad̄oho ne'e maru sai d̄i sab̄ua hid̄i, madad̄oho henggamu karu. Ro madad̄oho wed̄i menamu b̄ara edamu piti racolakai gandum wara ta ese wawo gandum d̄i cua-cua karu madad̄oho. Madad̄oho wati b̄ademu cou ma ratauna piti ede. Ake madad̄oho mai wa'a mbali piti ede d̄i ita. Ari mai b̄a piti ede madad̄oho wa'a raumu piti d̄i welikai ngaha ro nono wali.
23 Dou ma taki karawi wea la Yusuf ede nggahina, <<Aina dahu ro aina daruramu, Allah Ta'alamu, eded̄u Allah Ta'ala ranemba b̄a amamu, Allah Ta'ala ma ratauna piti ede ade karu nggomid̄oho, nahu wa'ura tarimaku piti co'i gandum ede.>>
Sawa'u b̄a ede, wa'ana la Simeon d̄i siad̄oho, 24 edempara otona siad̄oho lu'u d̄i ade uma ro mbeina siad̄oho oi d̄iwacakaina ed̄i. Ro rapa gandum d̄ipahakaina keledai siad̄oho. 25 Sawa'u b̄a ede, siad̄oho sadiana hadia d̄i mbeina la Yusuf nggara namaisi wakatu aimarai, siad̄oho wa'ura ngoa rau b̄a one siad̄oho d̄imangaha sama lab̄o la Yusuf. 26 Wakatu la Yusuf ronggana aka umana, siad̄oho mbeina hadia-hadia ede d̄i la Yusuf ro sujuna. 27 La Yusuf sod̄ina mab̄oha ka'ada'an siad̄oho ro nggahina, <<Nggomid̄oho wa'ura caritamu d̄i nahu mab̄oha amamu ma wa'ura tua ede. B̄une habana sia? Sab̄ua nataho-taho mpa?>>
28 Cambe b̄a siad̄oho, <<Io, ruma, ama madad̄oho eded̄u ada ita, nataho-taho mpa.>> Edempara siad̄oho sujuna d̄i la Yusuf.
29 Wakatu la Yusuf edana la Benyamin arina ma sab̄ua loko lab̄o sia, ndad̄i nggahira sia, <<Ndad̄i, akeku arimu ma cumpukaina ede, ra ngoa b̄a nggomid̄oho d̄i nahu? Raho-raho to'i mpa Allah Ta'ala barekana nggomi anaku.>> 30 La Yusuf wati wa'una pi'i adena ro lingi adena d̄i arina, sia watid̄u wa'una pi'i adena. B̄ara ndedena, sia lu'u rocina d̄i ade b̄ilina ro nangina. 31 Sawa'u b̄a ede, sia wacana pahu ro losa walina ro kai pi'ina ade, sia kauna dou ka'ambi ngaha ro nono. 32 La Yusuf ngaha kesena d̄i meja makalai ndaina ro sa'e ro arina d̄i meja ma kalai. Dou-dou Mesir ma wara ta ede ngaha d̄i meja makalai wali, b̄a one dou Mesir wati loana ngaha sama-sama lab̄o dou Ibrani, nggahi b̄a siad̄oho lampa rawi b̄une ede nanajis. 33 Sa'e ro ari la Yusuf dohona d̄i meja ma satando angi lab̄o la Yusuf, b̄atu cua-cua umuna, tampu'u ma sasa'e saraka ma cumpukaina. Wakatu siad̄oho edana cara doho ede, siad̄oho cua ntanda angi kai mbora akana. 34 Ngaha ro nono siad̄oho raweha d̄i meja la Yusuf, pala la Benyamin mbeina ngaha ro nono lima kali ncewi mbotona ntewikaisi sa'ed̄ohona. Edempara siad̄oho ngaha ro nonona sama-sama lab̄o la Yusuf sampe mbocuna.