Sa'e-Sa'e La Yusuf Lao Welina Gandum Aka Mesir
42
Wakatu la Yakub ringana haba b̄a one d̄i Mesir wara mboto gandum, nggahira sia d̄i anad̄ohona, <<B̄ab̄auku nggomid̄oho kamidikaimu weki? 2 Nahu ringaku haba b̄a one d̄i Mesir wara gandum, nggomid̄oho laopu ta aka dawa ro welipu gandum loakud̄u ndai wati made sarahid̄o.>> 3 Edempara sampuru dou sa'e la Yusuf laona aka Mesir d̄i welikaina gandum. 4 Pala la Yakub wati kauna lao la Benyamin, ari sab̄ua loko lab̄o la Yusuf b̄a one sia nadahuku la Benyamin b̄oha b̄a bahaya.5 B̄a one bala hid̄o d̄i dana ro rasa Kanaan, ana-ana la Israil sama-sama lab̄o dou-dou makalai lao welina gandum aka Mesir. 6 Ma landa gandum d̄i dou-dou d̄i sara'a dunia eded̄u la Yusuf, gubernur d̄i Mesir. B̄ara ndedena, sa'e-sa'e la Yusuf mai ro sujuna d̄i tando sia. 7 Wakatu la Yusuf edana sa'ed̄ohona, sia pata lalona siad̄oho, pala sia coro-coro wati patana, kai tokuna sia sod̄ina d̄i siad̄oho, <<Nggomid̄oho dou ta b̄e?>>
<<Io ruma, madad̄oho dou Kanaan. Madad̄oho mai weli gandum,>> cambe b̄a siad̄oho.
8 Konena la Yusuf napataku sa'ed̄ohona, pala sa'ed̄ohona wati patana sia. 9 Edempara sia kawarana nifina mab̄oha siad̄oho. Ro nggahira sia, <<Nggomid̄oho ake dou ma mai nina, nggomid̄oho ma mai tio ro nina kab̄aeku, ta b̄eku hid̄ina d̄i dana ro rasa nami ma wati rajaga.>>
10 <<Io, wati, rumaku,>> cambe b̄a siad̄oho. <<Madad̄oho ada-ada ita ma mai ne'e weli ngaha ro nono mpa. 11 Madad̄oho ake sa'e lab̄o ari, sab̄ua ama rumaku. Madad̄oho ake dou taho-taho laina dou ma mai nina.>> 12 La Yusuf nggahina d̄i siad̄oho, <<Cowa! Nggomid̄oho maimu ta ake d̄imatio ro nina kab̄ae ta b̄eku hid̄ina d̄i dana ro rasa nami ma wati rajaga.>>
13 Cambe b̄a siad̄oho, <<Madad̄oho ake sampuru d̄ua wekimu, ruma, madad̄oho ana b̄a sab̄ua ama d̄i dana ro rasa Kanaan, pala sab̄ua dou d̄i weki madad̄oho wa'ura made ro ma cumpukaina, ake wara lab̄o ama madad̄oho.>>
14 Cambe b̄a la Yusuf, <<Nggomid̄oho aina mboto nuntu, nggomid̄oho ake dou ma mai nina. 15 Nahu mane'e ugi nggomid̄oho, nahu masumpa kai ngara Firaun b̄a one nggomid̄oho wati d̄imatu'u wi'i dana ro rasa ake, nggara arimu ma cumpukaina ede watisi mai wa'a b̄a nggomid̄oho ta ake. 16 Sab̄ua dou d̄i weki nggomid̄oho pab̄uaku dula weha aona sia ro ma kalaina d̄itaha ta ake sampe au ra nggahi b̄a nggomid̄oho wara bukutina. Nggara watisi, kai ngara Firaun, nahu ka'imbi poda b̄a one nggomid̄oho ake poda-poda musu ma mai nina!>> 17 Sawa'u b̄a ede, siad̄oho kalu'u b̄a la Yusuf ade uma bui tolu nai ntoina.
18 D̄i ainaina katolukaina la Yusuf nggahina d̄i siad̄oho, <<Nahu dou ma dahu ro to'a d̄i Allah Ta'ala. Nggomid̄oho d̄ikasalama b̄a nahu kai sab̄ua sara ro rawi. 19 D̄imandad̄i bukuti b̄a one nggomid̄oho ake rombo ademu, sab̄ua dou ade weki nggomid̄oho d̄i tau b̄a nahu ade uma bui, ma kalaina loa lao dula ro wa'apu gandum ra weli b̄a nggomid̄oho d̄i ru'u iwa ro wekimu ma wunga susa ro ncoki b̄a bala hid̄o. 20 Sawa'u b̄a ede, nggomid̄oho pab̄uapu wa'a arimu ma cumpukaina ede d̄i nahu. Edeku bukutina b̄a one au ra nggahi b̄a nggomid̄oho ede napoda ro nggomid̄oho wati d̄ihukum made.>>
Siad̄oho nab̄atuku au ranggahi b̄a gubernur ede. 21 Edempara nggahira siad̄oho d̄i ade weki ndaid̄ohona, <<Ake ndad̄ina b̄ara ncara rawi ndai d̄i ari ndai ntoina: sia rahona bantu pala ndai wati kandad̄i auta, konena ndai edata b̄a one sia nawancuku susa ro ncokina. B̄ara ndedena, ake ndai ta'iuku susa ro ncoki ake.>>
22 Nggahira la Ruben, <<Ntoina, wa'ura nggahi b̄a nahu d̄i nggomid̄oho aina kab̄une-b̄unemu sia. Pala nggomid̄oho wati ngawamu kade'e. Ro ake, b̄ara made sia, ndaiku d̄ima'iuna.>> 23 La Yusuf naloa ka'ao nuntu siad̄oho, pala siad̄oho wati b̄adena, b̄a one siad̄oho nuntuna lab̄o la Yusuf kai kanina juru bahasa. 24 La Yusuf tu'u wi'ina sa'ed̄ohona ro nangina. Sawa'u b̄a ede, sia lao raka mbalina siad̄oho, edempara wehana la Simeon ro kauna dou d̄iki la Simeon d̄i tando sa'e ro arid̄ohona.
Sa'e-Sa'e La Yusuf Lao Mbalina Aka Kanaan
25 Parenta b̄a la Yusuf loakud̄u karu-karu ra wa'a b̄a sa'ed̄ohona d̄itau kab̄ini kai gandum ro piti ndai siad̄oho ma sapodakaina d̄i welikaina gandum tau mbali b̄a adad̄ohona ade karu-karu ede. Siad̄oho mbei rauna ngaha ro nono d̄i ru'u osu sa'e-sa'e la Yusuf d̄i ncai. Au ra parentakai b̄a la Yusuf ede karawi b̄a adad̄ohona. 26 Sawa'u b̄a ede, sa'e-sa'e la Yusuf ampana gandum rawelina ede ese kontu keledai, edempara siad̄oho laona. 27 D̄i hid̄i maru sanawakai siad̄oho, sab̄ua dou ade wekina henggana karu ne'e weha gandum d̄i pahakaina keledaina, sia rumpana piti d̄i wawo gandum ede. 28 <<Piti nahu b̄ali weana,>> nggahina d̄i sa'e ro arina, <<Tiopu, piti ake wara d̄i ade karu nahu!>> Siad̄oho ndad̄i dahu poda ro kai dahu podana siad̄oho cua-cua sod̄ina d̄i ade weki ndaid̄ohona, <<Au ra karawi b̄a Allah Ta'ala d̄i ndai ake?>>
29 Wakatu siad̄oho ronggana d̄i Kanaan, siad̄oho ngoana d̄i amana samenana au ma randad̄i d̄i siad̄oho, nggahi siad̄oho, 30 <<<Gubernur Mesir ede nuntu ro nggahina kai toku ro kasa d̄i madad̄oho ro wi'ikaina madad̄oho dou ma lao nina d̄i dana ro rasana.> 31 Pala cambe b̄a madad̄oho, <Madad̄oho dou taho-taho, laina dou ma mai nina, madad̄oho dou marombo. 32 Madad̄oho wekimu sampuru d̄ua dou sa'e lab̄o ari, ana b̄a sab̄ua ama, pala sab̄ua dou nawa'ura made ma cumpukaina wara lab̄o ama d̄i Kanaan.> 33 Gubernur ede nggahina, <Nahu ne'e ugi nggomid̄oho d̄i b̄adekai sab̄ua poda nggomid̄oho dou marombo, sab̄ua dou d̄i ade weki nggomid̄oho pab̄uaku d̄iwi'i wa'u ta ake ro makalaina loa lao dula, wa'a gandum d̄i ru'u b̄a iwa rowekimu ma wunga susa b̄ara bala hid̄o. 34 Sawa'u b̄a nggomid̄oho mai mbali ro wa'a arimu ma cumpukaina ede ampo imbi b̄a nahu, b̄a one ngomid̄oho laina dou ma mai nina, malaisi dou marombo. Ndad̄i sa'emu rataha b̄a nahu ede d̄i b̄ali b̄a nahu ro nggomid̄oho loa ngge'e d̄i dana ro rasa ake d̄imajaga ro uli.> >>
35 Sawa'u b̄a ede, wakatu siad̄oho kantaruna cua-cua karuna, siad̄oho rumpana kad̄ud̄u piti lab̄o piti-pitina. Edempara siad̄oho ro amana nawancuku dahuna. 36 Ro nggahira la Yakub d̄i anad̄ohona, <<Nggomid̄oho ma rakamaina mbora sara'a ana nahu, la Yusuf watid̄u warana, la Simeon watipu mbalina ro ake nggomid̄oho mane'eku wa'a la Benyamin rau. Na'ipiku susa ro ncoki d̄i iu b̄a nahu!>>
37 Edempara nggahi la Ruben d̄i amana, <<D̄onggopu la Benyamin d̄i mada, ama, peade mada d̄imawa'a mbali sia, nggara watisi wa'a b̄ali b̄a mada, ita loa hade d̄ua dou ana mone mada ede.>>
38 Pala nggahi la Yakub, <<Wati! La Benyamin wati loa wa'a b̄a nggomid̄oho, sa'ena wa'ura made ro ake sia mpa ma mbuipu mori. Nahu kadahuku sia b̄oha b̄a bahaya d̄i ncai. Nahu ake wa'ura tua, susa ro ncoki ra kamai b̄a nggomid̄oho d̄imakarocina made nahu.>>