Nifi Firaun
41
Sawa'u b̄a kalalo d̄ua mba'a, Firaun nifina, ade nifina ede, sia edana b̄a one sia wunga kid̄ina d̄i kengge Sori Nil. 2 Ade nifina ede sia edana pidu mbua capi ma mpore-mpore ro niu hurina. Capi-capi ede losana ade Sori Nil, edempara ngahana mpori d̄i kengge sori ede. 3 Sawa'u b̄a ede, wontu rau pidu mbua capi ma kalai, capi-capi ede na'ipiku mpekena sampe tada kone peke sanggerena. Capi-capi ma mpeke ede kid̄ina d̄i kompe capi-capi ma mpore, d̄i kengge sori ede. 4 Edempara capi-capi ma mpeke ede ngaha kampoina capi-capi ma mpore. Sawa'u b̄a ede, sangaji b̄olana d̄i marukaina. 5 Wati ntoi sawa'u b̄a ede, sia maru mbalina ro nifi walina b̄a one sia edana pidu mburi gandum ma ntau isi ro ma tua-tua ma losa d̄i sab̄ua takona. 6 Edempara losa rau pidu mburi gandum ma kalai ma mpesa ro fi'i mango b̄ara angi ma ramai ele mai ta so sarae. 7 Sawa'u b̄a ede, wuri gandum ma mpesa ede nonona pidu mburi gandum ma ntau isi ede. Sawa'u b̄a ede, Firaun b̄olana ro kawarana weki b̄a one sia nifina. 8 D̄i aimasid̄i, sangaji darura adena, b̄ara ndedena sia kauna ou sara'a dou ma ngau sihi ro dou ma ntau ilimu d̄i Mesir. Edempara karendana nifina ede d̄i siad̄oho, pala wati kone sab̄ua dou rau ma b̄ade auku ao ro ma'ana nifi ede.9 Edempara dou ma taki kab̄ua oi anggo nggahina d̄i sangaji, <<Kangampu to'ipu mada ruma, mada pab̄uaku pehe mbaliku ncara ro kancaru mada ntoina. 10 Ntoina ruma sangaji mbanita d̄i dou ma taki kab̄ua roti ro d̄i mada. Edempara madad̄oho kalu'u b̄a ita ade uma bui, aka uma dou mana'ekai pagawe asi. 11 D̄i sab̄ua aimangad̄i madad̄oho d̄ua nifimu ro nifi madad̄oho ede wati sama ao ro ma'anana. 12 Sama-sama lab̄o madad̄oho, wara sab̄ua dou mone sampela, dou Ibrani, sia dou ma taki karawi d̄i ru'u b̄a dou mana'ekai pagawe asi. Madad̄oho karendamu nifi madad̄oho d̄i sia, edempara sia ngoana ao ro ma'anana nifi ede. 13 Sara'a nifi madad̄oho ede ncihi ncao b̄une ra ngoa b̄a sia ao ro ma'anana eded̄u: Ita ruma mbei mbalita b̄ora mada, pala hukum made b̄a ita dou ma taki kab̄ua roti ede.>>
14 Ndad̄i kau b̄a Firaun lao weha ao la Yusuf ro kalosa roci ade uma bui. Sawa'u b̄a la Yusuf nggori b̄oru honggona ro cepena kani ro lombona, sia lao satandona Firaun. 15 Nggahi Firaun d̄i sia, <<Nahu wara nifiku ro wati wara kone sab̄ua dou rau ma loana b̄ade ao ro ma'anana nifi nahu ede. Wara dou mangoa nahu b̄a one nggomi maloa ka'ao ao ro ma'anana nifi.>>
16 Cambe b̄a la Yusuf, <<Laina mada rumaku, malaisi Allah Ta'ala d̄imambei ao ro ma'anana ma ncihi.>>
17 Edempara nggahi sangaji, <<Nahu nifiku, b̄a one nahu wunga kid̄iku d̄i kengge Sori Nil. 18 Nahu edaku pidu mbua capi ma mpore-mpore ro maniu hurina, ro ngahana mpori d̄i kengge sori ede. 19 Sawa'u b̄a ede, wontu rau pidu mbua capi ma mpeke-mpeke ro tada kone peke sanggerena. Nahu watipu paranaku eda capi ma mpeke b̄une ede d̄i sara'a dana ro rasa Mesir. 20 Capi-capi ma mpeke ede ngaha kampoina capi-capi ma mpore ede. 21 Pala capi-capi ma mpeke ede ngge'e mpa mpekena, edempara nahu b̄olaku d̄i marukaiku. 22 Sawa'u b̄a ede, nahu maru mbali ro nifi waliku, nahu edaku pidu mburi gandum ma ntau isi ro tua-tua, losa d̄i sab̄ua takona. 23 Sawa'u b̄a ede, losa rau pidu mburi gandum ma mpesa ro fi'i mango b̄ara angi ma ramai ele mai ta so sarae. 24 Sawa'u b̄a ede, wuri gandum ma mpesa ede nonona wuri gandum ma ntau isi ede. Wa'ura karenda b̄a nahu d̄i dou-dou ma ngau sihi ro dou-dou ma ntau ilimu, pala wati wara kone sab̄ua dou rau ma loana b̄ade ao ro ma'anana.>>
25 Edempara nggahi la Yusuf d̄i Firaun, <<Io, ruma, d̄ua mbua nifi ede sama mpa ao ro ma'anana. Allah Ta'ala wa'ura ngoana d̄i ita ruma auku d̄ine'e karawi b̄a Allah Ta'ala. 26 Pidu mbua capi ma mpore ede eded̄u pidu mba'a ro pidu mburi gandum ma ntau isi ede, eded̄u pidu mba'a rau; d̄ua mbua nifi ede sama mpa ao ro ma'anana. 27 Pidu mbua capi ma mpeke, ma wontu kento ro pidu mburi gandum ma mpesa ro fi'i mango b̄ara angi ma ra mai ele mai ta so sarae ede, eded̄u wakatu hid̄o na'e pidu mba'a ntoina. 28 B̄une ranggahi b̄a mada d̄i ita rumaku, Allah Ta'ala wa'ura tei katadana d̄i ita auku d̄ine'e karawi b̄a Allah Ta'ala. 29 D̄i b̄adekai b̄a ita b̄a one d̄imamai pidu mba'a wakatu remba ngaha ro nono d̄i sara'a dana ro rasa Mesir. 30-31 Sawa'u b̄a ede, d̄imamai pidu mba'a bala hid̄o ro wakatu remba ngaha ro nono ede d̄inefa impi b̄ara wakatu bala hid̄o ede na'ipi podaku, ndad̄ina dana ro rasa ake ndad̄i na'ipiku susa ro ncokina. 32 Nifi ita rumaku d̄ua kali, ede aona b̄a one lampa rawi ede wa'ura katantu b̄a Allah Ta'ala ro b̄a one Allah Ta'ala d̄imakarocina lampa rawi ede.
33 B̄ara ndedena, satahona ita ruma kad̄alepu sab̄ua dou maloa ro ma loa timba ro lemba ro mbeipu d̄i sia kuasa d̄ima'atona dana ro rasa ake. 34-35 Ita ruma pab̄uapu hantata pagawe-pagawe ro mbeipu di siad̄oho kuasa d̄imaweha saru'u ade rancengga lima ra d̄i samenana hasi gandum santoi pidu mba'a, wakatu remba hasi ede ro wi'i udupu d̄i kota-kota ro jaga katahopu. 36 Gandum ede d̄i ngaha pidu mba'a wakatu bala hid̄o d̄i Mesir. Ro kai cara ede dou d̄i dana ro rasa ake wati d̄imamade b̄ara sarahid̄o.>>
La Yusuf Ndad̄i Gubernur D̄i Mesir
37 Firaun ro pagawe-pagawena nab̄atuku au ra nggahi b̄a la Yusuf ede. 38 Edempara nggahi Firaun d̄i siad̄oho, <<Watid̄u wara walina dou makalai ma b̄une la Yusuf, b̄ara sia wa'ura d̄anda ro wa'a b̄a Ruh Allah.>> 39 Edempara Firaun nggahina d̄i la Yusuf, <<Allah Ta'ala wa'ura ngoa sara'ana ake d̄i nggomi, ndad̄i tada poda b̄a one nggomi ma ncewi loa ro loa timba ro lemba ntewikaisi lab̄o dou-dou makalai. 40 Ndad̄i nahu mahanta nggomi ndad̄i gubernur ro sara'a ela ro dou nahu d̄imab̄atu parenta nggomi, nahu mpa ma ntau kuasa ese mai b̄a nggomi.>> 41-42 Sawa'u b̄a ede, Firaun runcuna sinci d̄i kangge rimana ma wara satempe karaja'an, edempara cub̄una d̄i kangge rima la Yusuf ro nggahina, <<Kai sinci ake nahu makasaha nggomi ndad̄i gubernur d̄i sara'a dana ro rasa Mesir.>> Sawa'u b̄a ede, kakanikaina d̄i la Yusuf sando'o jumba linen ma alu ro kakondona d̄i wo'o la Yusuf kai kondo masa. 43 Edempara mbeina d̄i la Yusuf kareta karaja'an ma nomor d̄ua d̄i Mesir d̄inente ba la Yusuf ro dou ma taki jaga ma lampa ta tando kareta ede, nggahina, <<Horomapu sia!>> Ndedeku la Yusuf rahanta ndad̄i gubernur d̄i dana ro rasa Mesir. 44 Nggahi sangaji d̄i sia, <<Nahu Firaun ro nahu d̄imangoa sara'a dou, b̄a one sara'a dou wati loana karawi au-au sawatipu b̄a kau b̄a nggomi.>> 45-46 Edempara sangaji tangarakaina la Yusuf kai ngara la Zafnat-Paaneah, b̄une ngara dou Mesir. Sangaji ede kanika rauna la Yusuf lab̄o sab̄ua dou siwe sampela, ngarana la Asnat, ana la Potifera ma ndad̄i imam d̄i kota Helipolis.
La Yusuf umuna tolu mpuru mba'a wakatu sia tampu'una karawi d̄i ru'u b̄a sangaji Mesir. Edempara laora la Yusuf tu'u wi'ina asi sangaji Mesir ro lampa heko sara'ana dana ro rasa Mesir. 47 Ncihi romo ade wakatu pidu mba'a ede remba b̄a ngaha ro nono ro losa hasi na'ipiku rembana. 48 Gandum ede kab̄oro b̄a la Yusuf edempara wi'ina d̄i kota-kota. Ade sanikina kota sia wi'ina gandum hasi oma-oma ma wara d̄i kompe ro pei kota ede.
49 Gandum rakab̄oro ede na'ipiku mbotona, ndad̄ina la Yusuf watid̄u kanina uku ro taka walina, b̄a one mboto gandum ede b̄une sarae d̄i kengge moti. 50 Sawatipu b̄a raka wakatu bala hid̄o na'e ede, la Asnat wei la Yusuf ngganana d̄ua dou ana mone d̄i ru'u b̄a la Yusuf. 51 Nggahi la Yusuf, <<Allah Ta'ala wa'ura kanefana nahu d̄i sara'a susa ro ncokiku ro d̄i sara'a iwa ro weki amaku.>> B̄ara ndedena, tangarakai b̄a sia anana ma sasa'e ede <<la Manasye.>>o
52 Sia nggahi rauna, <<Allah Ta'ala wa'ura mbeina nahu d̄ua dou ana ade wakatu susa ro ncokiku, b̄ara ndedena sia tangarakaina anana ma kad̄uakaina ede, <<la Efraim.>>p
53 Pidu mba'a wakatu remba ngaha ro nono d̄i Mesir wa'ura kalalo. 54 Ndad̄i maira pidu mba'a bala hid̄o, b̄une rawa'u nggahi b̄a la Yusuf. D̄i sara'a dunia b̄oha b̄a bala hid̄o, pala d̄i sara'a dana ro rasa Mesir wara rasadia d̄ingaha ro nono. 55 Wakatu dou-dou Mesir tampu'ura susa ro ncoki b̄ara bala hid̄o, siad̄oho rahona ngaha ro nono d̄i Firaun. Edempara sangaji kauna siad̄oho lao d̄i la Yusuf ro b̄atu sara'ana au ra parentakai b̄a la Yusuf d̄i siad̄oho. 56 Wakatu bala hid̄o ede nanaha ipi d̄i sara'a dana ro rasa, la Yusuf hengga sara'ana jompa ro landana gandum d̄i dou-dou Mesir. 57 Dou-dou d̄i dunia maina d̄i Mesir d̄iwelikaina gandum d̄i la Yusuf, b̄ara bala hid̄o ede nawancuku ipi podana d̄i dunia.