Nifi Dou Ma Taki Kab̄ua Oi Anggo Ro Dou Ma Taki Kab̄ua Roti
40
Pila-pila wakatu sawa'u b̄a ede, d̄ua dou ma karawi wea sangaji Mesir eded̄u ma taki kab̄ua oi anggo ro dou ma taki kab̄ua roti, siad̄oho karawina ma ncara d̄i sangaji. 2 Ndad̄i mbanira sangaji d̄i d̄ua douna ede, 3 edempara kalu'una siad̄oho ede ade uma bui, d̄i hid̄i buikai la Yusuf. 4 Siad̄oho rabui ta ede pila-pila wakatu ntoina ro dou mana'ekai asi mbeina taki ro puta d̄i la Yusuf d̄imakab̄ua wea au d̄iparalu b̄a siad̄oho.5 D̄i sab̄ua aimangad̄i dou ma taki kab̄ua oi anggo ro dou ma taki kab̄ua roti ede cua-cua nifina, nifi siad̄oho ede wati samana. 6 Wakatu la Yusuf mai rakana siad̄oho d̄i b̄ala aisanai, aimasid̄i ede, eda b̄a la Yusuf siad̄oho susa adena. 7 Edempara sod̄i b̄a sia, <<B̄ab̄auku itad̄oho susakai adeta d̄i ainaina ake?>>
8 Cambe b̄a siad̄oho, <<Aka sangad̄ina nami nifimu ro wati wara ma b̄ade ao ro ma'anana.>>
Nggahi la Yusuf, <<Allah Ta'ala mpoa mpa ma loana ngoa kab̄ae ao ro ma'ana nifi. Karendapu d̄i mada au ranifita ede.
9 Dou ma taki kab̄ua oi anggo ede nggahina, <<Ade nifiku ede nahu edaku wara fu'u anggo d̄i tando nahu. 10 Fu'u anggo ede nancanga tolu, sanga-sangana natampu'ura ncuri, losa safaka lalo wuntana ro sanga-sangana ede b̄ini b̄a wuana ma ntasa. 11 D̄i wakatu ede, nahu wunga nentiku gela taki nonokai Firaun, Sangaji Mesir. Ndad̄i nahu wehaku wua anggo ede ro pua tau b̄a nahu ade gela sangaji, edempara d̄onggo b̄a nahu d̄i sia.>>
12 Nggahi la Yusuf, <<Akeku ao ro ma'ana nifi ita ede, tolu ncanga ede aona tolu nai. 13 Tolu nai wali sangaji d̄imakalosa ita ade uma bui ro nakangampuku ita ro ita nakauku karawi mbali b̄une ntoina, eded̄u ma taki mbei oi anggo d̄i ru'u b̄a sangaji. 14 Pala kawara to'ipu mada, nggara wa'usira taho ka'ada'an ita. Bantu to'ipu mada takarongga weapu masa'ala mada d̄i sangaji, loakud̄u sia kalosa rauna mada ade uma bui ake. 15 Sapodakaina mada ake dou Ibrani, ntoina rawa'a cili b̄a dou, mai wa'ana ara Mesir ake ro ta ake rau mada wati paranaku karawi madab̄ae sampe pab̄ua d̄ikalu'u d̄i ade uma bui.>>
16 Sawa'u b̄a dou ma taki kab̄ua roti ede b̄adena, b̄a one nifi dou ma taki kab̄ua oi anggo ede nataho ao ro ma'anana, edempara sia rau nggahina d̄i la Yusuf, <<Nahu nifi rauku. Nahu su'uku tolu mbua wonca roti. 17 Ade wonca ma ese ngantona mboto pahu pangaha d̄i ru'u b̄a Firaun, pala nasi-nasi mai ngahana pangaha-pangaha ede.>>
18 Cambe b̄a la Yusuf, <<Akeku ao ro ma'anana nifi ede, tolu mbua wonca ede aona tolu nai, 19 tolu nai wali, sangaji d̄imakau dou fati kakori tuta ita edempara terona timba ita d̄i sab̄ua tandi'i ro nasi-nasi d̄imamai noto hi'i ita.>>
20 Tolu nai sawa'u b̄a ede, Firaun katu'una ndiha rawarakaina ro sia unda sara'ana pagawe asina. Sia kauna dou loakud̄u dou ma taki kab̄ua oi anggo ro dou ma taki kab̄ua roti kalosa d̄i uma bui ro wa'a aka tando sara'a pagawe asina. 21 Dou ma taki kab̄ua oi anggo mbei mbali b̄a sangaji karawi b̄une ntoina. 22 Pala dou ma taki kab̄ua roti b̄ab̄ukaina hukum made. Sara'ana ede nancihi ncao b̄une rangoa b̄a la Yusuf. 23 Pala dou ma taki kab̄ua oi anggo ede wati kawara walina la Yusuf sia nawa'ura nefa poda la Yusuf.