La Yusuf Ro Wei La Potifar
39
La Yusuf wa'ura wa'a b̄a dou-dou Ismail aka Mesir; ro landana d̄i la Potifar, pagawe asi Firaun, sangaji Mesir. La Potifar eded̄u dou ma na'ekai dou-dou ma taki jaga asi ede. 2 RUMA bantuna la Yusuf, ndad̄ina sia nantau ncau hasi ade samenana au ra karawina. Sia nangge'e d̄i ade uma rumana, dou Mesir ede. 3 La Potifar nab̄adeku b̄a one RUMA ma bantu la Yusuf, ndad̄ina la Yusuf nantau hasi ncau ade sara'a karawina. 4 La Potifar na'ipiku mecina la Yusuf ro hantana la Yusuf ndad̄i dou ma taki karawi weana; ro ma kab̄ua wea uma ro salajana ro sara'a ntau ro warana. 5 Tampu'u wakatu ede, b̄ara la Yusuf, RUMA barekana uma ro salaja dou Mesir ede ro sara'a au-au ra ntauna, nataho ma wara d̄i uma ro ma wara d̄i omana. 6 Samenana ntau ro wara la Potifar na'imbikaiku d̄i la Yusuf, d̄imataki kab̄ua weana. Kai ndedena la Potifar watid̄u wara d̄ikananu walina, selasi ngaha ro nono ndaina. La Yusuf nawancuku gagana. 7 Wati ntoina sawa'u b̄a ede, wei la Potifar tampu'ura mai adena d̄i la Yusuf, edempara recena la Yusuf maru campo lab̄o sia. 8 Pala la Yusuf wati ngawana ro nggahina d̄i wei la Potifar, <<Kangampu ruma siwe, ruma Potifar wa'ura imbikaina samenana ntau ro warana d̄i mada. Sia wati paralu kananuna au-au wali d̄i uma ake. 9 Sara'ana ma karawi d̄i ade uma ake, madaku ma ncewi na'e kuasa. B̄ara sia waura imbi sara'akaina d̄i mada, selasi ita ruma siwe. Wati lu'u b̄a aka mada karawiku ma dab̄ae ro karawiku dosa d̄i Allah Ta'ala.>> 10 Konena sanikina ainaina rece ncau-ncau b̄a wei la Potifar, pala la Yusuf ngge'e mpa wati ngawana maru campo lab̄o wei la Potifar ede.11 D̄i sab̄ua ainaina, wakatu la Yusuf wunga karawina ade uma, wakatu ede wati wara kone sab̄ua dou rau ta ede. 12 Wei la Potifar rab̄ina jumba la Yusuf ro nggahina, <<Mai maru campo lab̄opu nahu.>> Pala la Yusuf rai losana, pala jumbana raka b̄a dou siwe ede. 13 Wakatu wei la Potifar edana b̄a one la Yusuf wa'ura rai losa ro jumbana raka b̄a sia, 14 sia ouna dou-dou ma karawi d̄i umana ro nggahina; <<Tio menapu! Dou Ibrani ra wa'a b̄a rahi nahu ara uma ake, nane'eku kab̄awa ro katuna ndai. Sia lu'una ade b̄ili nahu nane'eku pakasa maru campo lab̄o nahu, pala nahu kanggicaku. 15 Wakatu ringana kanggica nahu, sia rai losana ro akeku jumbana ra raka nenti b̄a nahu.>>
16 Edempara wei la Potifar wi'ina jumba ede sampe dula rahina. 17 Sawa'u b̄a dula rahina, sia ncundu sara'ana au ma wa'ura ndad̄i ede d̄i rahina, nggahi sia, <<Dou Ibrani ra wa'a b̄a ita ede, mai d̄enina d̄i mada ro rece pakasana mada maru campo lab̄o sia. 18 Pala wakatu mada kanggicaku, sia rai losana ro jumbana raka nenti b̄a mada.>>
19 La Potifar na'ipiku mbanina. 20 Ro parenta b̄a sia loakud̄u la Yusuf d̄iwa'u roci ro d̄ikalu'u ade uma bui, d̄i hid̄i dou-dou ra buikai b̄a sangaji. 21 Pala ta ede rau RUMA bantuna la Yusuf ro ngge'e mpa meci ro ca'una sia, ndad̄ina dou ma na'ekai uma bui nameciku la Yusuf. 22 Dou ma na'ekai uma bui ede hantana la Yusuf ndad̄i dou ma na'ekai dou-dou ra bui ro d̄onggona d̄i la Yusuf d̄imasu'u ro tunduna d̄i samenana rawi ade uma bui ede. 23 Dou ma na'ekai uma bui ede watid̄u makina, sara'ana na'imbikaiku d̄i la Yusuf, b̄a one RUMA ma bantu ro malab̄ona la Yusuf, ndad̄ina sia nantau hasi ade samenana au ra karawina.