La Yehuda Ro La Tamar
38
D̄i wakatu ede, la Yehuda tu'u wi'ina sa'e ro arina ro ngge'ena lab̄o la Hira, sab̄ua dou mone, dou kota Adulam. 2 Ta ede la Yehuda pata angina lab̄o dou siwe sampela Kanaan, ana la Syua, edempara siad̄oho nikana. 3 Ana sasa'e siad̄oho mone ro tangarakai b̄a amana la Er. 4 Anana ma kad̄uakaina, mone rau, tangarakaina la Onan. 5 Ana katolukaina mone wali ro tangarakaina la Syela. Wakatu weina ngganana la Syela, la Yehuda wunga warana aka Kezib.6 La Yehuda kanikana la Er, anana ma sasa'e ede lab̄o la Tamar. 7 Ruku ro rawi la Er nawancuku dab̄aena, ndad̄i RUMA mbanina ro hadena sia. 8 Edempara la Yehuda nggahina d̄i la Onan, ari b̄a la Er, <<Nggomi pab̄uapu maru campo lab̄omu la Tamar wei sa'emu ma wa'ura made. Nggomi pab̄uapu kalampamu ede loakud̄u sa'emu raka londo ro mai.>> 9 Pala la Onan nab̄adeku, b̄a one ana-anana wati d̄imandad̄i ntau sia. Ndad̄i sanikina sia maru campo lab̄ona ra wei wa'u sa'ena ede, sia b̄oho kalosana oi pod̄ana loakud̄u sa'ena wati rakana londo ro mai. 10 Rawina ede nadab̄ae d̄i tando RUMA, ndad̄i RUMA hadena sia rau. 11 Edempara nggahira la Yehuda di ridona la Tamar, <<Lao mbalira aka uma dou matuamu ro ngge'epu ta aka kai dou mbaru mboha sampe na'ena ana nahu la Syela.>> La Yehuda nggahi ndedekaina b̄a dahuna la Syela d̄ihade rau b̄a RUMA, b̄une d̄ua dou sa'e monena. Edempara la Tamar lao dulana aka uma dou matuana.
12 Pila-pila wakatu sawa'u b̄a ede, madera ana la Sua wei la Yehuda. Sawa'u b̄a nggori wakatu tanda ncoki ade, la Yehuda recena la Hira, lengana dou Adulam ede, lao aka Timna hid̄i dou manggunti kere jimba ntau la Yehuda. 13 La Tamar ringana haba b̄a one la Yehuda rianana ede d̄imalao aka rasa Timna, sia nane'e lao nggunti kere jimba-jimbana. 14 Edempara la Tamar cepena kani ro lombo tanda mbaru mbohakaina kai kani ro lombo ma kalai. B̄onto b̄a sia pahuna kai tod̄u, edempara sia dohona d̄i tad̄a lawa kota Enaim, hid̄ina d̄i ncai malao aka Timna. La Tamar nab̄ade podaku b̄a one la Syela ana la Yehuda ma cumpukaina, wa'ura na'e, pala la Yehuda wati ngge'epu kanikana la Syela lab̄o sia.
15 Wakatu la Yehuda edana la Tamar, kacai b̄a sia dou siwe ede dou sunda, b̄ara pahuna rab̄onto kai tod̄u. 16 Edempara la Yehuda mai rakana dou siwe d̄i kengge ncai ede ro nggahina, <<Mai nahu kane'e maru campo lab̄o nggomi!>> sia wati b̄adena b̄a one dou siwe ede rido ndaina.
Cambe b̄a la Tamar, <<Au d̄imbei b̄a ita d̄i ru'u b̄a mada nggara ita mane'esi maru campo lab̄o mada?>>
17 La Yehuda nggahi walina, <<Pea, nahu d̄imambei d̄i nggomi sab̄ua mbe'e ndara.>>
Cambe b̄a la Tamar, <<Io, loa, sura wara d̄inenti b̄a mada sampe ita nggaduta mbe'e ede.>>
18 <<Auku d̄iraho b̄a nggomi d̄imandad̄i tanda d̄ine'emu nenti?>> Sod̄i b̄a la Yehuda.
Cambe b̄a la Tamar, <<Mbeipu mada sinci satempe, kondo ro tiki ma wara d̄i ita ede.>> La Yehuda mbeina au ra raho b̄a la Tamar ede, sawa'u b̄a ede, siad̄oho maru campona, edempara la Tamar na'e lokona. 19 La Tamar dula aka umana ro henggana tod̄u ra b̄ontokai pahuna, edempara kani mbalina kani ro lombo tanda mbaru mbohakaina.
20 Wati ntoi sawa'u b̄a ede, la Yehuda kakaina la Hira lengana, d̄imawa'a mbe'e ede ro d̄imaraho mbalina au-au ra wi'ina d̄i la Tamar, pala la Hira wati rumpana dou siwe ede. 21 La Hira sod̄i ndandana d̄i dou-dou d̄i Enaim; <<Ta b̄eku dou sunda ma ca'u ngena d̄i kengge ncai ede?>>
<<Wati wara dou ma sunda ta ake,>> cambe b̄a siad̄oho.
22 Edempara la Hira dula mbalina aka la Yehuda ro nggahina, <<Nahu wati rakaku rumpa dou siwe ede; ro nggahi dou-dou ta aka wati wara dou ma sunda ta ake.>>
23 Nggahi la Yehuda, <<Co'opu ntau nahu ede d̄imandad̄i ntau sia, sura aina majakai ndai mpa. Nahu wa'ura usahaku d̄imacolana, pala nggomi wati rakamu eda sia.>>
24 Takasi tolu wura sawa'u b̄a ede, la Yehuda ringana haba b̄a one ridona la Tamar wa'ura ndad̄i b̄une dou ma sunda ro na'e lokona.
Edempara parenta b̄a la Yehuda, <<Lao weha aopu sia ro ka'apu sampe madena!>>
25 Wakatu wa'a kalosa b̄a dou la Tamar, sia nggaduna nggahi ake d̄i riana monena, <<Mada wa'ura kana'e loko b̄a dou ma ntau sinci satempe lab̄o kondo ro tiki ake. Taparesa to'ipu cou ma ntau sara'ana ake.>>
26 La Yehuda napataku b̄a one sara'ana ede ntau sia ro nggahina, <<Dou siwe ede wati wara ncarana. Nahuku ma ncara, nahu wati kanikaku sia lab̄o la Syela ana nahu b̄une ra sake b̄a ndai nahu d̄i sia.>> Tampu'u wakatu ede La Yehuda watid̄u maru campo walina lab̄o la Tamar.
27 Rakara wakatuna la Tamar d̄ingganakaina ro sia nggana nduana. 28 Wakatu sia ngganana, sab̄ua dou d̄i ade weki anana ede kalosana rimana, edempara nenti b̄a sando nggana rimana ede ro d̄iki katandana kai kafa kala. Nggahi sando ede, <<Ana dou ake ma losa ulu.>> 29 Pala ana dou to'i ede rab̄i cad̄ei mbalina rimana, ndad̄i anana ma sab̄ua wali ma losa ulu. Edempara nggahi sando ede, <<Ngau poda nggomi, cicimu weki ro losa ulumu!>> Edempara anana ma ulu losa ede, tangarakaina la Peres.n 30 Sawa'u b̄a ede, ampona losa arina ma rimana ra d̄iki kai kafa kala, sia tangarakai la Zerah.