La Yusuf Ro Sa'e-Sa'e Ro Arina
37
La Yakub ngge'ena d̄i dana ro rasa Kanaan; hid̄i ngge'ekai amana ntoina 2 ro akeku lao caritana iwa ro weki la Yakub:D̄i wakatu la Yusuf, ana la Yakub umuna sampuru pidu mba'a, sia jaga ro sandakana mbe'e ro jimba sama-sama lab̄o sa'ed̄ohona eded̄u ana-ana la Bilha ro la Zilpa, wei kento amana. Sia ncunduna d̄i amana rawi dab̄ae ra karawi b̄a sa'ed̄ohona.
3 La Yakub na'ipiku mecina la Yusuf ntewikaisi d̄i ana-anana ma kalaina, b̄a one la Yusuf rangganana d̄i wakatu amana wa'ura tua. D̄i sab̄ua ainaina la Yakub kauna dou nda'u wea sando'o jumba ma wancu ntika d̄i ru'u b̄a la Yusuf.j 4 Ndede eda b̄a sa'ed̄ohona b̄a one amana na'ipiku mecina la Yusuf ntewikaisi siad̄oho, fa'ara ade siad̄oho d̄i la Yusuf, ndad̄ina siad̄oho watid̄u ngawa walina nuntu kai taho-taho lab̄o sia.
5 D̄i sab̄ua aimangad̄i la Yusuf nifina ro wakatu sia karendana nifina ede d̄i sa'ed̄ohona, ndad̄i b̄ara ndedena sa'ed̄ohona nanaha fa'a adena d̄i sia. 6 Ndakeku nggahi la Yusuf d̄i siad̄oho, <<Takade'e to'ipu! 7 Mada nifiku, ndai sara'a wara d̄i oma wunga tod̄ota gandum, edempara gandum mada tu'u mpendena. Gandum itad̄oho hekona tod̄o gandum mada, edempara sujuna d̄i gandum mada.>>
8 Nggahi b̄a sa'ed̄ohona, <<Kacai b̄a nggomi, nggomi d̄imandad̄i sangaji ro makuasakaina nami?>> Edempara nanaha fa'a ade sa'ed̄ohona d̄i la Yusuf b̄ara nifi ro nggahina ede.
9 Sawa'u b̄a ede, la Yusuf nifi walina ro karendana d̄i sa'ed̄ohona, <<Mada nifi waliku, ade nifiku ede mada edaku liro, wura ro sampuru sab̄ua ntara sujuna d̄i mada.>>
10 Nifina ede karenda rauna d̄i amana ro rojo b̄a amana, <<Nifi nggomi ede wati wara ao ro onena. Fiki b̄a nggomi, nahu, inamu lab̄o sa'e ro arimu d̄imamai suju ro nemba nggomi?>> 11 Sa'e-sa'e la Yusuf nahiana adena d̄i sia, pala amana ngge'e mpa fiki ro kananuna, auku aona nifi ede.
La Yusuf Landa B̄a Sa'ed̄ohona
12 D̄i sab̄ua ainaina, wakatu sa'e-sa'e la Yusuf wa'ura lao aka Sikhem d̄i jaga ro sandakakaina mbe'e ro jimba ntau amana, 13 nggahira la Yakub d̄i la Yusuf, <<Laopu aka Sikhem, aka hid̄i sa'ed̄ohomu ma wunga jaga ro sandaka mbe'e ro jimba ndai.>> Cambe b̄a la Yusuf, <<Io, ama.>>
14 Nggahi amana, <<Tiopu b̄uneku ka'ada'ana sa'ed̄ohomu lab̄o mbe'e ro jimbana, sawa'u b̄a ede, mai ngoa mbalipu nahu.>> Edempara la Yakub kauna la Yusuf tu'u wi'i So Hebron.
Wati ntoi sawa'u b̄a ede, la Yusuf ronggana aka Sikhem. 15 Wunga ade lampa ngupa rerokaina sa'ed̄ohona d̄i so ro sera ede, sia eda angina lab̄o sab̄ua dou mone, dou ede sod̄ina d̄i la Yusuf, <<Au ngupamu?>>
16 <<Io, mada wunga ngupaku sa'ed̄ohoku. Siad̄oho wunga jaga ro sandakana mbe'e ro jimba,>> cambe b̄a la Yusuf, <Sab̄ua ita mab̄adeku, tab̄eku siad̄oho?>>
17 Cambe b̄a dou ede, <<Siad̄oho wa'ura tu'u wi'ina hid̄i ake. Ringa b̄a nahu, nggahi siad̄oho b̄a one siad̄oho nane'e lao aka Dotan.>> Edempara la Yusuf lao ngupa b̄atuna sa'ed̄ohona aka Dotan ro edana sa'ed̄ohona ta ede.
18 Siad̄oho eda sando'ona la Yusuf ro sawatipu b̄a sia ronggana aka sa'ed̄ohona, sa'ed̄ohona ede mafakana ne'e hade la Yusuf. 19 Nggahi siad̄oho d̄i weki ndaid̄ohona ede, <<Tio menapu, ma taki nifi ede akara maikaina. 20 Mai ndai tahadeku sia ro talo'o tauku timbana ade temba mango. Ndai tangoa mpa d̄i ama ndai b̄a one sia wa'ura kumpa b̄a binata nggange. Ndai ta tioku au d̄imandad̄i lab̄o nifina ede.>>
21 La Ruben ringana mafaka siad̄oho ede, edempara sia ngupana aka b̄uneku carana d̄iloakaina kasalama la Yusuf. Ndad̄i nggahira la Ruben di siad̄oho, <<Aina hademu sia, 22 ndai talo'o mpa sia ade temba d̄i so sarae ake, pala ndai aina kancoki sia.>> La Ruben nggahi ndedekaina b̄ara ne'ena kasalama la Yusuf ro wa'a kadula la Yusuf aka amana. 23 Wakatu la Yusuf ronggana aka sa'ed̄ohona, kai kasa siad̄oho runcuna jumba la Yusuf ma wancu ntikak ede. 24 Edempara randa b̄a sa'ed̄ohona ro lo'o tauna d̄i ade temba mango.
25 Wakatu siad̄oho wunga ne'ena ngaha, siad̄oho edana dou ma landa ro lajo. Dou-dou ede suku Ismail ma tu'u wi'i Gilead ne'e lao aka Mesir. Onta-onta siad̄oho nawuaku marakani lo'i ro anggo mango. 26 Edempara nggahi la Yehuda d̄i sa'e ro arid̄ohona, <<Auku onena hadesi b̄a ndai la Yusuf ari ndai ro ili ro pita rarawi ndai ede? 27 Mai ndai ta landaku sia d̄i dou Ismail ede. Ndai aina kancoki sia. Kone b̄une b̄e wali sia ede ari ndai.>> Siad̄oho nab̄atuku au ranggahi b̄a la Yehuda, 28 ro wakatu pila-pila dou Midianl lampa saina hid̄i ede, la Yusuf kalosa b̄a sa'ed̄ohonam d̄i ade temba ede, edempara landana d̄i dou-dou ede kai co'i d̄ua mpuru piti salaka. Edempara sia wa'a b̄a dou ma landa ro lajo ede aka Mesir.
29 Wakatu la Ruben lao mbalina aka temba ede, pala sia wati rumpana la Yusuf d̄i ade temba ede, ndad̄i sia sipa-sipana kani ro lombona b̄ara ncoki adena. 30 Sia lao raka mbalina arid̄ohona ro nggahina, <<La Yusuf watid̄u warana d̄i ade temba ede! Ake auku d̄ipab̄ua karawi b̄a nahu?>>
31 Edempara sambele b̄a siad̄oho sab̄ua mbe'e ro compo tau b̄a siad̄oho jumba la Yusuf d̄i ra'a mbe'e ede. 32 Sawa'u b̄a ede, siad̄oho kauna dou lao wa'a jumba ede d̄i ama siad̄oho kai nggaduna nggahi, <<Jumba ake ra rumpa b̄a madad̄oho. Taparesa to'ipu, sab̄ua jumba ake laina ntau ana ita?>>
33 La Yakub napataku jumba ede, edempara nggahina, <<Poda, ake jumba ana nahu! Tantu sia wa'ura kumpa b̄a binata nggange. Alae, ana nahu la Yusuf wa'ura made ha'a sipa-sipa b̄a binata ede!>> 34 La Yakub sipa-sipana kani ro lombona b̄ara ncoki adena ro kanina kani ro lombo tanda ncokikai ade. Ntoi poda sia nangi nduru weana anana ede. 35 Sara'a anad̄ohona, nataho ma mone ro ma siwe mai rerena sia, pala sia wati ne'ena d̄irere. Nggahi la Yakub, <<Sampe nahu madeku, nahu d̄imanangi nduru ncau d̄i ru'u ana nahu.>> Ndedeku sia leli adena b̄ara la Yusuf anana ede.
36 Wakatu ede, d̄i Mesir dou-dou Midian wa'ura landana la Yusuf d̄i la Potifar, pagawe d̄i asi Firaun. La Potifar eded̄u ma na'ekai dou-dou ma taki jaga d̄i asi Firaun.