Londo Ro Mai La Esau
<1Taw. 1:34-37>
36
Akeku londo ro mai la Esau d̄ipehe rau kai la Edom. 2 La Esau nikana lab̄o tolu dou siwe Kanaan eded̄u: la Ada, ana la Elon dou Het, la Oholibama, ana b̄a la Ana ro ompu b̄a la Zibeonh dou Hewi; 3 La Basmat, ana la Ismail ari b̄a la Nebayot. 4 La Ada ngganana la Elifas, la Basmat ngganana la Rehuel, 5 ro la Oholibama ngganana la Yeus, Yaelam ro la Korah. Sara'a ana la Esau ede ranggana d̄i dana ro rasa Kanaan.6 Edempara la Esau tu'u wi'ina la Yakub ro laona aka dana ro rasa ma kalai ro wa'a sara'ana weina, anadohona ro sara'a dou ma wara d̄i umana, sama-sama lab̄o sara'a binata ntadi ro ntau ro wara ra rakana d̄i Kanaan. 7 La Esau ncengga ngge'e lab̄o la Yakub b̄ara ntau ro wara siad̄oho nawancuku mbotona, ndad̄ina siad̄oho wati loana ngge'e sama d̄i dana ro rasa ede. Ro d̄i dana ro rasa ede watid̄u ncihina ngaha ro nono rau d̄i ru'u b̄a binata ntadi siad̄oho ma wancu mboto ede. 8 La Esau ra tangara rau kai la Edom, ngge'e impina d̄i dana ro rasa doro-doro Seir.
9 Akeku londo ro mai la Esau, wa'i ro waro dou Edom. 10-13 Wei la Esau ma ngara la Ada ngganana ana mone, ngarana la Elifas. Ro la Elifas nantau lima dou ana mone, eded̄u: la T'eman, Omar, Zefo, Gaetam ro la Kenas. La Elifas nantau wei kento, ngarana la Timna. Sia ngganana ana mone ma ngara la Amalek.
Wei la Esau ma ngara la Basmat ngganana ana mone ngarana la Rehuel. Ro la Rehuel nantau upa dou ana mone, eded̄u: la Nahat, Zerah, Syama, ro la Miza.
14 Wei la Esau ma ngara la Oholibama, ana b̄a la Ana ompu b̄a la Zibeon,i Ngganana tolu dou ana mone, eded̄u: la Yeus, Yaelam ro la Korah.
15 Akeku ma na'ekaina suku-suku londo ro mai la Esau eded̄u la Elifas, ana sasa'e la Esau eded̄u wa'i ro waro b̄a suku-suku ma wara ta awa ake eded̄u suku T'eman, Omar, Zefo, Kenas, 16 Korah, Gaetam, ro suku Amalek. Siad̄oho sara'ana ede londo ro mai la Ada, wei la Esau.
17 La Rehuel, ana la Esau eded̄u wa'i ro waro b̄a suku-suku ma wara ta awa ake eded̄u suku Nahat, Zerah, Syama ro suku Miza. Siad̄oho sara'ana ede londo ro mai la Basmat, wei la Esau.
18 Suku-suku ma wara ta awa ake eded̄u londo ro mai la Esau lab̄o weina ma ngara la Oholibama ana la Ana eded̄u Yeus, Yaelam, la Korah. 19 Sara'a suku ede londo ro mai la Esau.
Londo Ro Mai La Seir
<1Taw. 1:38-42>
20-21 Dou-dou asali dana ro rasa Edom racengga ndad̄i suku-suku londo ro mai la Seir, dou Hori. Suku-suku ede eded̄u suku Lotan, Syobal, Zibeon, Ana, Disyon, Ezer ro suku Disyan.
22 La Lotan eded̄u wa'i ro waro londo ro mai la Hori lab̄o la Heman. <La Lotan nantau amancawa, ma ngara la Timna>.
23 La Syobal eded̄u wa'i ro waro b̄a londo ro mai: la Alwan, Manahat, Ebal, Syefo ro la Onam.
24 La Zibeon nantau d̄ua dou ana mone, eded̄u la Aya lab̄o la Ana. <La Ana akeku ma ra rumpana mada oi pana d̄i so sarae, wakatu sia wunga jaga ro sandakana keledai-keledai ntau amana>. 25-26 La Ana eded̄u ama la Disyon ro la Disyon wa'i ro waro b̄a londo ro mai: la Hemdan, Esyban, Yitran ro la Keran. La Ana rau nantau sab̄ua dou ana siwe, ngarana la Oholibama.
27 La Ezer wa'i ro waro b̄a londo ro mai la Bilhan, Za'awan, ro la Akan.
28 La Disyan wa'i ro waro b̄a londo ro mai la Us lab̄o la Aran.
29-30 Akeku suku-suku dou Hori d̄i dana ro rasa Edom eded̄u suku Lotan, Syobal, Zibeon, Ana, Disyon, Ezer ro suku Disyan.
Sangaji-Sangaji Edom
<1Taw. 1:43-54>
31-39 Sawatipu b̄a wara sangaji ma parenta d̄i Israil, sangaji-sangaji ma wara ta awa ake ma parenta d̄i dana ro rasa Edom kai ndundu ro ndaka.
La Bela ana la Beor dou Dinhaba.
La Yobab ana la Zera dou Bozra.
La Husyam dou dana ro rasa T'eman.
La Hadad ana la Bedad dou Awit
<Siaku ma rakakoana dou Midian ade lewa ro laka d̄i dana ro rasa Moab>.
La Samla dou Masreka.
La Saul dou Rehobot d̄i kengge sori.
La Baal-Hanan ana la Akhbor.
La Hadar dou Pahu <Weina ngarana la Mehetabeel, ana la Matret ompu b̄a la Mezahab>.
40-43 La Esau eded̄u wa'i ro waro b̄a suku-suku Edom ma wara ta awa ake eded̄u suku Timna, Alwa, Yetet, Oholibama, Ela, Pinon, Kenas, T'eman, Mibzar, Magdiel ro suku Iram. Sanikina suku tangarakaina rasa ro dana ngge'ekaina ede b̄une ngara ndai siad̄oho.