La Yakub Lao Dula Mbalina Aka Betel
35
D̄i sab̄ua ainaina, nggahira Allah Ta'ala d̄i la Yakub, <<Nahu ake, Allah Ta'ala ma katada weki d̄i nggomi aipu nggomi rai pesomu weki ra d̄i sa'emu la Esau. Ake lao rocipu aka Betel. Ngge'epu ta aka ro tu'upu sab̄ua Mezbah d̄i ru'u b̄a Nahu.>>2-3 Edempara nggahi la Yakub d̄i iwa ro wekina ro d̄i sara'a dou ma wara sama-sama lab̄o sia, <<Ndai tatu'u wi'iku hid̄i ake ro talaoku aka Betel. Ta aka nahu d̄imatu'u mezbah d̄i ru'u b̄a Allah Ta'ala ma wa'ura bantu nahu wakatu nahu susa ro ncokiku ro ma wa'ura jaga ro sandaka nahu ta b̄era laokai nahu. Ndad̄i pakipu berhala-berhala ma wara d̄i nggomid̄oho; karasopu wekimu ro kanipu kani ro lombo ma raso.>> 4 Edempara d̄onggo b̄a siad̄oho d̄i la Yakub sara'a patung dewa ma wara d̄i siad̄oho ro kariro-kariro siad̄oho rau. Sara'ana ede did̄i b̄a la Yakub d̄i wombo fu'u haju na'e d̄eni lab̄o kota Sikhem.
5 Wakatu la Yakub ro iwa ro wekina wunga lampa ro laona, Allah Ta'ala kandad̄ina dahu dou-dou kota, ndad̄ina dou-dou ede wati coco b̄atuna ana-ana mone la Yakub. 6 Edempara ronggara siad̄oho d̄i dana Kanaan d̄i kota Betel, ntoina kota ake ngarana Lus. 7 Ta ede la Yakub tu'una Mezbah ro tangarakaina hid̄i ede <<El-Betel.>> B̄a one Allah Ta'ala wa'ura katadana weki d̄i sia ta ede wakatu sia rai pesona weki d̄i sa'ena. 8 D̄i Betel rau, la Debora ina loru la Ribka madena, edempara umbuna d̄i wombo fu'u haju na'e ta wela d̄o b̄a kota Betel. B̄ara ndedena fu'u haju ede tangarakai <<Fu'u haju Nangi>>.
Allah Ta'ala Barekana La Yakub D̄i Betel
9 Sawa'u b̄a la Yakub pokuna ra d̄i Mesopotamia, Allah Ta'ala katada walina weki d̄i sia ro barekana sia. 10 Nggahi Allah Ta'ala d̄i sia, <<Ngara nggomi laina la Yakub wali, pala la Israil.>> Ndedeku Allah Ta'ala tangarakaina sia kai la Israil. 11 Edempara nggahi wali Allah Ta'ala, <<Nahu ake, Allah Ta'ala Ma Wancu Kuasa. Pab̄uaku nggomi ntau ana ro ompu ma mboto! Londo ro mai nggomi d̄imandad̄i bangsa-bangsa ro nggomi ma ndad̄i ama b̄a wa'i ro waro b̄a sangaji-sangaji. 12 Dana ro rasa ake wa'ura mbei b̄a Nahu d̄i la Ibrahim lab̄o la Ishak ro Nahu d̄imambeina d̄i nggomi ro d̄i londo ro maimu.>> 13 Sawa'u b̄a ede, Allah Ta'ala tu'u wi'ina la Yakub. 14 D̄i hid̄i nuntukai Allah Ta'ala lab̄o la Yakub, la Yakub pendena sab̄ua wadu d̄imandad̄i wadu tanda kawarakai. Sawa'u b̄a ede, d̄i wad̄u ede sia d̄onggo ro mbeina koroba d̄i Allah Ta'ala kai luana oi anggo ro mina zaitun ta ese wawona. 15 Hid̄i ede tangarakaina <<Betel.>>
Rawarakai La Benyamin Ro Madena La Rahel
16 Sawa'u b̄a ede, la Yakub lab̄o iwa ro wekina tu'u wi'ina Betel. Wakatu siad̄oho nad̄enira lab̄o Efrata, rakara wakatuna la Rahel ngganakaina. Pala anana nanggonggiku losana. 17 Wakatu nantukira pili ngganakaina, nggahira sando nggana d̄i sia, <<Katenggopu ademu, anamu mone wali.>> 18 Pala la Rahel nane'era made ro wakatu sia nane'era hinti nawa cumpukaina tangarakai b̄a sia anana ede <<La Ben-Oni>>.e Pala amana tangarakaina anana ede <<La Benyamin>>.f
19 Sawa'u b̄a made la Rahel, sia umbu b̄a dou d̄i kengge ncai ma lao aka Efrata, ake ngarana Betlehem. 20 La Yakub pendena sab̄ua wadu tanda ese wawo rade la Rahel, edeku tandana rade la Rahel saraka ake. 21 Sawa'u b̄a ede, la Yakub lampa ro lao walina, edempara tu'una kemana d̄i sab̄ua hid̄i, sawa'u b̄a kalalona menara Eder. 22 Wakatu siad̄oho wara d̄i hid̄i ede la Ruben maru campo lab̄ona la Bilha, wei kento amana. Wakatu ringa b̄a la Yakub lampa rawi ede, sia nawancuku mbanina.g
Ana-Ana La Yakub
<1Taw. 2:1-2>
La Yakub nantau sampuru d̄ua dou ana mone. 23 Ana-ana la Lea eded̄u la Ruben <ana sasa'e la Yakub>, la Simeon, Lewi, Yehuda, Isakhar ro la Zebulon. 24 Ana-ana la Rahel eded̄u la Yusuf lab̄o la Benyamin. 25 Ana-ana la Bilha ada la Rahel eded̄u la Dan lab̄o la Naftali. 26 Ana-ana la Zilpa, ada la Lea eded̄u la Gad lab̄o la Asyer. Rawarakai ana-anana ede aka Mesopotamia.
La Ishak Madena