La Dina Ro La Sikhem
34
D̄i sab̄ua ainaina, la Dina lao lambana pila-pila dou siwe Kanaan. La Dina ede ana siwe la Yakub lab̄o weina La Lea. 2 Wakatu la Sikhem, ana la Hemor, dou Hewi ma ndad̄i sangaji d̄i dana ro rasa ede, edana la Dina, edempara wa'a raina siwe sampela ede ro ka'iha weana sampelana. 3 La Sikhem nawancuku ne'ena d̄i la Dina, ndad̄i sia mab̄u adena d̄i la Dina ro sia rau na'usahaku loakud̄u la Dina rau mab̄u adena d̄i sia edeku d̄i ne'e b̄a sia.d 4 Nggahi la Sikhem d̄i amana, <<Ama, lao lampakaipu ana dou siwe sampela ede, d̄i ru'u b̄a mada. Mada kane'e nika lab̄o sia.>>5 La Yakub wa'ura ringana haba b̄a one anana wa'ura ka'iha wea b̄a dou sampelana, pala ana moned̄ohona wunga tonggu menana binata ntadina d̄i so mpori, ndad̄i sia wi'ina d̄ei adena lampa rawi ede sampe dula anad̄ohona.
6 La Hemor lab̄o anana la Sikhem, mai rakana la Yakub nane'e mafaka lab̄o la Yakub. 7 Wakatu ede ana-ana la Yakub b̄oupura dulana d̄i so ro sera. Ndede ringana au ma wa'ura ndad̄i ede, siad̄oho wed̄i ro nawancuku mbanina b̄ara ka'iha weana sampela amancawana, b̄a one la Sikhem wa'ura kab̄awa ro katunana sara'a dou Israil b̄a wa'ura ka'iha weana sampela ana siwe la Yakub. 8 Nggahi la Hemor d̄i la Yakub, <<Ana nahu la Sikhem wa'ura mab̄u adena d̄i ana nggomi; raho b̄a nahu d̄i nggomi ta ngawa to'ipu kanika anamu lab̄o ana nahu. 9 Mai ndai takasab̄uaku nggahi b̄a one bangsa nggomi lab̄o bangsa nami d̄imanika campo. 10 Ndad̄i nggomid̄oho loa ngge'e sama ro nami d̄i dana ro rasa ake; ta b̄era ne'ekai b̄a nggomid̄oho. Nggomid̄oho loa daga ro uli ro maloaku ntau dana ndaimu ta ake.>>
11 Edempara la Sikhem nggahina d̄i ama la Dina ro d̄i amaniad̄ohona, <<Tambei to'ipu au ra raho b̄a mada ake, ndad̄i mada d̄imambei au-au ra ne'e b̄a itad̄oho. 12 Tanggahipu hadia auku d̄ine'e b̄a itad̄oho ro katantupu co'i masa nikana. Mada d̄imambei au ra raho b̄a itad̄oho, sura itad̄oho ngawata kanika mada lab̄o la Dina.>>
13 B̄ara la Sikhem wa'ura ka'iha weana sampela amancawa siad̄oho la Dina, ana-ana la Yakub ngoa cowana d̄i la Sikhem ro d̄i la Hemor amana. 14 Nggahi siad̄oho d̄i dou d̄uana ede, <<Madad̄oho maja ademu kau ari madad̄oho nika lab̄o dou ma wati rasuna. 15 Madad̄oho mangawa kanika la Sikhem lab̄o la Dina b̄une ra kane'ekai b̄a itad̄oho ede, pala kai sab̄ua sara ro rawi, eded̄u sura itad̄oho ngawata suna b̄une madad̄oho, aona sara'a dou mone d̄i weki itad̄oho pab̄uaku d̄isuna. 16 Sawa'u b̄a ede, madad̄oho ampo mangawa nika campo lab̄o itad̄oho b̄une ra kane'eta ede. Madad̄oho d̄imangge'e impi d̄i woha itad̄oho ro ndad̄i sab̄ua bangsa lab̄o itad̄oho. 17 Pala nggara itad̄oho watisi ngawata tarima sara ro rawi ra raho b̄a madad̄oho, madad̄oho d̄imaweha mbalina la Dina ro lao peso weki d̄i dana ro rasa ake.>>
18 La Hemor ro la Sikhem nangawa tarima sara ro rawi ede, 19 ro la Sikhem nangawa suna, b̄ara sia na'ipiku ne'ena d̄i la Dina. D̄i ade weki sara'a londo ro maina, la Sikhemku ma ipi d̄ilia ro horoma b̄a dou.
20 Edempara la Hemor ro la Sikhem laona aka hid̄i edakai angi d̄i tad̄a na'e kota ro ngoana dou-dou d̄i kota ede b̄une ake, 21 <<Dou-dou Israil ede soba ndai. Ndad̄i co'opu siad̄oho ngge'e samana lab̄o ndai d̄i dana ro rasa ndai ro siad̄oho naloa lao ta b̄era ne'ena d̄i dana ro rasa ake. Dana ro rasa ake nancihi d̄i ru'u b̄a siad̄oho rau. Ndai taloa nika campo lab̄o dou-dou siwe sampela siad̄oho ro siad̄oho rau naloa nika campo lab̄o dou-dou siwe sampela ndai. 22 Pala dou-dou ede nangawa ngge'e sama lab̄o ndai ro ndai ndad̄i sab̄ua bangsa lab̄o siad̄oho kai sab̄ua sara ro rawi eded̄u: Sara'a dou mone d̄i weki ndai pab̄uaku d̄isuna b̄une siad̄oho. 23 Peade sara'a binata siad̄oho ro sara'a ntau ro wara siad̄oho ndad̄i ntau ndai. Ndad̄i maira ndai tangawaku b̄atu au ra kane'ekai b̄a siad̄oho loakud̄u siad̄oho nangawa ngge'e sama lab̄o ndai.>> 24 Sara'a dou ade kota ma kab̄oro weki ede nangawa b̄atu au ra raho b̄a la Hemor ro la Sikhem, edempara sara'a dou mone ma na'e d̄i kota ede d̄isuna.
25 Tolu nai sawa'u b̄a ede, wakatu dou-dou mone ede mbuipu duha b̄ara sunana, d̄ua dou ana la Yakub eded̄u sa'e mone la Dina ma ngara la Simeon ro la Lewi, siad̄oho wehana peda, edempara lu'una ade kota ro hade sara'ana dou mone ta ede. 26 La Hemor ro la Sikhem hade rau b̄a siad̄oho. Edempara siad̄oho wehana la Dina d̄i uma la Sikhem ro laona. 27 Sawa'u b̄a hade sara'ana dou ede, ana-ana la Yakub ma kalai rampona barang-barang d̄i kota ede d̄icola cepekaina b̄ara ari siad̄oho wa'ura ka'iha wea sampelana b̄a la Sikhem. 28 Siad̄oho wehana mbe'e ro jimba, capi, keledai ro sara'a ma wara d̄i ade kota ro d̄i so ro sera. 29 Siad̄oho weha sara'ana au-au ma nggali co'i, wa'a rauna sara'a dou siwe ro d̄ambe-d̄ambe to'i ro rampa sara'ana isi uma-uma d̄i kota ede.
30 La Yakub nggahina d̄i la Simeon ro d̄i la Lewi, <<Nggomid̄oho makasusaku nahu. Ake dou Kanaan ro dou Feris ro sara'a dou dana ro rasa ake d̄ima'iha ade d̄i nahu. Dou-dou ndai wati mbotona; nggara sara'a dou ede nakasamasi wekina d̄i'aokaina ndai ro deina nahu, sara'a iwa ro weki ndai d̄imaleli.>>
31 Pala cambe b̄a siad̄oho, <<Sab̄ua pab̄uaku co'o b̄a madad̄oho rawi dab̄ae la Sikhem d̄i amancawa madad̄oho b̄une dou masunda?>>