Ngoa Wi'i Cumpukai b̄a La Daud d̄i ru'u La Sulaiman
2
Wakatu wa'ura d̄eni ajalna (madena), la Daud ouna la Sulaiman, ana monena ede, ro ngoa wi'ina ma cumpukai. Nggahi la Daud, 2 <<Wa'ura raka wakatu nahu madekai (tu'u wi'i dunia). Pab̄uapu nggomi imbi poda ro disamu. 3 Karawipu au ra parentakai b̄a RUMA, Allah Ta'alamu d̄i nggomi. To'apu d̄i hukum-hukum ro parenta-parenta-Na ma wara (ra tunti) ade Kitab Taurat, loakud̄u ta b̄e-b̄e rau laokai nggomi, nggomi d̄imawara hasi ade samenana usahamu. 4 Nggara nggomi mato'asi d̄i RUMA, Sia d̄imambei au ra wa'u sake-Na b̄a one londo ro mai nahu d̄imaparenta Israil , sura siad̄oho kai sab̄ini b̄a ade, ro sab̄ini b̄a nawa ro sarumbu na to'a ncau d̄i parenta-parenta-Na.5 Wara wali sab̄ua lampa rawi! Nggomi tantu makawaraku au ra wa'u karawi b̄a la Yoab d̄i nahu kai hadena d̄ua dou perwira Israil , eded̄u la Abner ana la Ner, lab̄o la Amasa ana la Yeter. Sia hadena siad̄oho d̄ua d̄i wakatu wati wara lewa, b̄ara d̄i cola cepekaina hade dou ra karawi b̄a siad̄oho wakatu ade lewa ro laka. Sia hadena dou ma wati wara ncara, pala ake nahuku d̄imapab̄ua su'u ro tunduna au ra wa'u karawi b̄a siad̄oho ro nahuku ma iu susa ro ncoki.b 6 Ndad̄i, anaku, nggomi pab̄uapu karawi d̄i ru'u sia au ra nggahi b̄a nggomi taho; Pala aina co'omu sia made ntiri (b̄une dou ma kalai). 7 Pala d̄i ru'u ana-ana mone la Barzilai ra d̄i Gelead ede, pab̄uapu nggomi karawimu mataho. Nggomi pab̄uapu tanggu (mbeimu) au ra d̄iparalu b̄a siad̄oho sanai-nai, b̄a one siad̄ono na wa'ura karawi mataho d̄i nahu, wakatu nahu laorai peso weki ra d̄i sa'e monemu, la Absalom.
8 Ma b̄oha la Simei ana la Gera ra d̄i kota Bahurim d̄i dana ro rasa Benyamin, wara rau d̄ingoa wi'i b̄a nahu d̄i nggomi. Ade lampa ro lao nahu lao aka Mahanaim, la Simei ede ntoina sumpa kaihana nahu kai toku ro kasa. Pala sawa'u b̄a ede, wakatu sia mai weha aona nahu d̄i sori Yordan, nahu wa'ura sumpaku d̄i sia kai ngara RUMA b̄a one nahu wati d̄imahade sia. 9 Pala akeku, ngoa wi'i b̄a nahu d̄i nggomi; aina co'omu sis hori weki ra d̄i hukuman. B̄a one nahu kab̄ade nggomi ma loa timba ro lemba; ndad̄i, konena sia nawa'ura tua, usahapu loa kai sia d̄ihukum made.>>
Madekai La Daud
10 Sawa'u b̄a ede la Daud madena, ro ra'umbukai d̄i kota Daud. 11 Sia ndad̄ina sangaji Israil 40 mba'a ntoina: 7 mba'a hid̄i parentakaina d̄i Hebron, ro 33 mba'a d̄i Yerusalem. 12 Sawa'u b̄a ede la Sulaiman mandad̄i sangaji ma cepena la Daud, amana ede. Kuasakai la Sulaiman kai sangaji kaina nawancuku tenggona.
Madekai La Adonia
13 D̄i sab̄ua ainaina, la Adonia laona aka la Batsyeba d̄i la Adonia, <<Sab̄ua maimu ake, kai niamu ma taho?>>
<<Iyo,>> cambe b̄a la Adonia. 14 Edempara sia nuntu walina, <<Wara sab̄ua d̄ine'e raho b̄a mada d̄i ita ina.>>
<<Au d̄ine'emu raho?>> sod̄i b̄a la Batsyeba. 15 Edemp douara cambe b̄a la Adonia, <<Ita ina mab̄adeku b̄a one madaku ma sapodakaina mandad̄i sangaji; ede wa'u raho pamao b̄a sara'a dou Israil . Pala ma ndad̄i eded̄u na wa'ura wari wekina, ari mada ma ndad̄i sangaji, b̄ara kane'ekai b̄a RUMA b̄une ede. 16 Ndad̄i ake wara sab̄ua d̄i raho b̄a mada, raho to'i mpa ita ina aina tula weamu au ra raho b̄a mada ake.>>
17 Sod̄i b̄a la Batsyeba, <<Auku raho b̄a nggomi?>> cambe b̄a la Adonia, <<Mada ma raho nemba (poda-poda) d̄i ita ina ngawa to'i ita raho wea d̄i sangaji Sulaiman loakud̄u sia kauna mada nika lab̄o la Abisag, dou siwe sampela ra d̄i Sunem ede. Mada ka'imbi poda b̄a one la Sulaiman wati d̄imatula au ra raho b̄a ita ina.>>
18 Cambe b̄a la Batsyeba, <<Io, taho mpa, nahu d̄imanuntuna lampa rawi ede lab̄o sangaji d̄i ru'u nggomi.>>
19 Ndad̄i laora la Batsyeba d̄i sangaji kai ne'ena nuntu wea lampa rawi ede d̄i ru'u la Adonia. Sangaji tu'u kid̄i weha aona inana ro suju d̄i inana, edempara doho wali ese wawo kadera sangaji kaina. Sawa'u b̄a ede sia kauna dou ka'ambi kadera d̄i dohokai inana ta sab̄ae wana sia. 20 Sawa'u b̄a dohona, nggahira la Batsyeba, <<Nahu wara ne'eku raho sab̄ua ma to'i mpa ra d̄i nggomi. Raho b̄a nahu, nggomi wati d̄imatulawea au ra raho nahu ede.>>
Sod̄i b̄a la Sulaiman, <<Auku raho b̄a ita ede, ina? Mada wati d̄imatulana.>>
21 Cambe b̄a la Batsyeba, <<Takaupu la Adonia, sa'e monemu ede nika lab̄o la Abisag.>>
22 Sod̄i b̄a la Sulaiman, <<Bab̄auku ita ina d̄i rahokaimu lampa rawi ede d̄i mada? Ede sama mpa lab̄o rahota loakud̄u mada mambei kadera sangaji kai ake d̄i ru'u sia. Sab̄ua sia laina sa'e mone mada? Ro Imam Abyatar lab̄o la Yoab rau wara malab̄o sia!>> 23 Sawa'u b̄a nggahi ndedena sumpara la Sulaiman kai ngara RUMA, <<Co'opu mada b̄oha b̄a b̄a'a b̄a RUMA, nggara mada watisi hukum madeku la Adonia b̄ara au ra rahona ede! 24 RUMA wa'ura kesahana dohokai (parentakai) ake d̄i mada ro d̄i londo ro mai mada. B̄ara ndedena mada ma sumpa kai ngara RUMA ma mori b̄a one la Adonia d̄imamade ainaina ake lalo!>>
25 Ndad̄i sangaji Sulaiman parentana la Benaya, edempara la Benaya lao hadena la Adonia.
La Abyatar Kancarawea B̄orana ro Madekai La Yoab
26 Edempara nggahira sangaji Sulaiman d̄i Imam Abyatar, <<Laopu aka kampo ro mporo ndaimu d̄i Anatot. Nggomi patu d̄i hukum made, pala ainaina ake nahu wati d̄imahade nggomi, b̄ara wakatu nggomi mbuipu sama-sama lab̄o ama nahu, nggomi b̄atu iu sara'a susa ro ncokina. Ro nggomi rau ma uruna Peti Sake RUMA.>> 27 Edempara sangaji Sulaiman kancara/kadengga weana b̄ora Imam la Abyatar. Kai karawi sangaji Sulaiman ede, au ra wa'u nggahi b̄a RUMA d̄i Silo mab̄oha londo ro mai Imam Eli wa'ura ndad̄i tada.
28 Ndad̄i la Yoab ringana haba mab̄oha sara'a ma wa'ura ndad̄i ede. Sia ndad̄i dahu b̄ara sia lu'u anggota la Adonia. Pala, ntoina sia wati lu'una anggota la Absalom. Ndad̄i sia lao rai lu'u ade Kemah RUMA ro nentina sumpu-sumpu mezbah.c 29 Haba ake rongga d̄i sangaji Sulaiman. Ndad̄i sangaji kauna la Benaya hade la Yoab. 30 Edempara la Benaya lao aka Kemah RUMA, ro nggahina d̄i la Yoab, <<Kau b̄a sangaji, nggomi losa ra d̄i hid̄i ede!>>
Cambe b̄a la Yoab, <<Wati, mada kane'e made ade hid̄i ake.>>
Edempara la Benaya lao mbali ro lapona lampa rawi ede d̄i sangaji.
31 Ringgana laporan (nggahi) ede, nggahira sangaji, <<Laora ro kalampapu au ra wa'u nggahi b̄a sia ede. Hadepu sia ro umbupu sia, loakud̄u nahu lab̄o sara'a londo ro mai amaku wati ntauna su'u ro tundu wali d̄i hade dou ra karawi b̄a la Yoab d̄i dou ma wati wara ncara. 32 RUMA d̄imahukum sia b̄ara hade dou ra wa'u karawi b̄a sia kai wati b̄ade b̄a amaku. B̄a one la Abner perwira tentara Israil , ro la Amasa perwira tentara Yehuda, d̄ua dou ade wati wara ncarana. Siad̄oho ncewi taho ra d̄i ndai la Yoab, pala sia hadena siad̄oho. 33 Hukuman b̄ara made perwira d̄uana ede d̄itanggu (d̄isu'u ro tundu) b̄a la Yoab, lab̄o londo ro maina ru'u santoi-ntoina. Pala sara'a londo ro mai amaku ma ndad̄i sangaji, d̄ibareka ncau b̄a RUMA -- siad̄oho d̄imaraka laba.>>
34 Ndad̄i laora la Benaya aka Kemah RUMA, ro hadena la Yoab d̄i hid̄i ede. Edempara la Yoab ra'umbu d̄i umana ari mai b̄a kota. 35 Sawa'u b̄a ede sangaji hantana la Benaya mandad̄i panglima tentara macepe la Yoab, ro la Zadok rahanta mandad̄i imam macepe la Abyatar.
Madekai La Simei
36 Sawa'u b̄a ede sangaji ouna la Simei edempara nggahina d̄i sia, <<Tu'upu uma d̄i ru'u ndaimu d̄i Yerusalem ake. Ngge'epu d̄ihid̄i ede ro aina losa ra d̄i kota. 37 Nggara nggomi madisasi losa ro lao sapa kalalo ncangga sori Kidron, nggomi pab̄ua d̄i hade; ro ndai nggomiku ma tanggu (ma su'u ro tunduna) rawi ncara ede.>>
38 Edempara cambe b̄a la Simei, <<Io, taho mpa, sangaji Ma D̄ese ro ntasa. Mada d̄imab̄atu parenta Ita sangaji.>> Ndad̄i ngge'era la Simei d̄i Yerusalem pila-pila wakatu ntoina. 39 Sawa'u b̄a tolu mba'a wara mandad̄i lampa rawi b̄une awa ake: D̄ua dou ada la Simei lao rai aka Gat, d̄i sangaji Akhis ana mone la Maakha. Wakatu la Simei ngoa b̄a dou mab̄oha lampa rawi ede, sia 40 kinana sela d̄i wawo kontu keledaina, edempara laona aka sangaji Akhis aka (d̄i) Gat d̄ilao ngupakaina adana d̄uana ede (atao d̄ua dou adana ede). Sia rumpana siad̄oho ro wa'a dulana siad̄oho. 41 Wakatu sangaji Sulaimana ringana haba au ra wa'u karawi b̄a la Simei, 42 Sia kauna dou ou la Simei edempara nggahina, <<Nahu wa'ura ndawiku nggomi sake kai ngara RUMA b̄a one nggomi wati d̄imatu'u wi'i Yerusalem. Ro nahu rau wa'ura ngoa ro kawaraku nggomi b̄a one nggara nggomi d̄imato'akai d̄i parenta nahu ede. 43 Pala ake b̄ab̄auku nggomi wati mangakumu au ra wa'u sakemu ede ro nggomi sapamu parenta nahu? 44 Nggomi mab̄ade podaku sara'a karawimu madab̄ae d̄i ama nahu. D̄i ru'u ede RUMA d̄imahukum nggomi, 45 pala nahu d̄ibareka b̄a RUMA ro kerajaan (dana ro rasa) parenta b̄a amaku b̄a sia sampe santoi-ntoina.>>
46 Sawa'u b̄a nggahi ndedena, sangaji parentana la Benaya, edempara laora la Benaya hade la Simei. Ndad̄i ake sangaji Sulaiman nantau kuasa ma b̄ini d̄i ade kerajaan sia.