Sangaji Sulaiman D̄o'ana Raho Hikmat
3
Sangaji Sulaiman kandad̄ina Mesir kasab̄ua weki lab̄o sia kai nikana lab̄o ana siwe sangaji Mesir. Ina ka'u (ana siwe sangaji) ede lao wa'a b̄a la Sulaiman aka kota Daud d̄ingge'ekaina sampe nggori tu'u asi sangaji lab̄o uma RUMA ro b̄ente ma heko Yerusalem. 2 B̄ara uma RUMA watipu ratu'u d̄i wakatu ede, ela ro dou mbuipu d̄onggo ro mbeina koroba d̄i saniki (mboto) hid̄i. 3 Sangaji Sulaiman nameci ro ca'uku d̄i RUMA ro nab̄atuku au-au ra tei kai b̄a amana, pala sia mbuipu sambelena ro d̄onggo ro mbeina binata d̄i mboto hid̄i.4 Hid̄i sambea ro ibadakai ma ipi mbou wara d̄i Gibeon. Ndad̄i la Sulaiman ntuwu d̄onggo ro mbeina koroba d̄i hid̄i aka. D̄i sab̄ua ainaina, b̄une ranginakai, sia laona ta hid̄i aka wali. 5 Aimangad̄i ede RUMA katadana weki d̄i sia, ade nifi ro nggahina, <<Sulaiman, rahopu au ma d̄ine'e b̄a nggomi, Nahu d̄imambeina ede d̄i nggomi!>>
6 Cambe b̄a sangaji Sulaiman, <<Io, RUMA, Ita wa'ura tei katadata b̄a one Ita wancuku meci ro ca'uta ama mada la Daud, ada Ita ede. Sia nataho, na rombo ro nato'a d̄i Ita. Ro tanda d̄inenti b̄a one ru'u santoina Ita ngge'e mpa meci ro ca'umu sia, Ita mbeimu d̄i sia sab̄ua dou ana mone ma wakatu ake maparenta macepena sia. 7 Io RUMA, Allah Ta'ala b̄a mada, Ita hantata mada mandad̄i sangaji macepena ama mada, konena mada mbuipu to'i poda ro watipu b̄adeku b̄uneku carana mbei parenta. 8 Mada wara ade woha bangsa ra wa'u kad̄ale b̄a Ita ndad̄i ela ro dou (umat) ndai Ita. 9 B̄a one ndedena, Io RUMA, tambei to'ipu d̄i mada loa timba ro lemba ma d̄i paralu b̄a mada d̄iparentakai ela Ita ake kai adil ro d̄iloakai pata cengga b̄e mataho ro b̄e maiha (dab̄ae). Nggara watisi ndedena, wati lu'u b̄a aka mada loaku parenta ela Ita ma na'e ake?>>
10 RUMA sana adena d̄i au ra raho b̄a la Sulaiman ede, 11 ro nggahina d̄i sia , <<B̄a one nggomi rahomu loa timba ro lemba d̄i ru'u parentakaimu ma adil, ro laina d̄ondo umu, atao ntau ro wara d̄i ru'u weki ndaimu atao rau d̄imadekai musu-musumu, 12 ndad̄i au ra rahomu ede Nahu d̄imambeina. Nahu d̄imakandad̄i nggomi ncewi loa timba ro lemba ro ncewi ntau loa ro b̄ade ra d̄i cou-cou rau, nataho d̄i jaman ma ulu ro d̄i jaman ma mai kento. 13 Kone au ra wati raho b̄a nggomi rau, Nahu d̄imambei rauna d̄i nggomi: santoi morimu nggomi d̄imantau ro wara ro d̄ilia ro horoma b̄a dou ese mai b̄a sangaji makalai. 14 Ro nggara nggomi, b̄une amamu la Daud, mato'akai d̄i Nahu ri d̄i hukum-hukum Nahu, Nahu d̄imambei d̄i nggomi umu ma d̄ondo.>> 15 Sawa'u b̄a tu'una, la Sulaiman kawara weki b̄a one Allah Ta'ala wa'ura nuntu lab̄o sia d̄i ade nifi. Ndad̄i lao mbalira sia aka Yerusalem, edempara kid̄ina d̄i tando Peti Sake RUMA ro d̄onggo ro mbeina koroba ka'a lab̄o koroba damekai (kangampukai dosa). Sawa'u b̄a ede, sia katu'una ndiha d̄i ru'u sara'a pagawena.
Sangaji Sulaiman Paresana Ncihi ro Ncara sab̄ua Parakara
16 D̄i sab̄ua ainaina, d̄ua dou siwe masunda mai satando sangaji Sulaiman. 17-18 Sab̄ua dou d̄i weki dou siwe d̄uana ede ma nggahi, <<Sangaji Ma D̄ese ro ntasa, mada lab̄o dou siwe ake midi ade sab̄ua uma. Wati wara dou makalai ma midi sama lab̄o madad̄oho. Wati ntoina sawatipu b̄a ake, mada ngganaku sab̄ua dou ana mone. D̄ua nai sawa'u b̄a ede, dou siwe ake ngganana sab̄ua dou ana mone rau. 19 D̄i sab̄ua aimangad̄i wakatu madad̄oho maru, dou siwe ake wati sangajana pita anakeana ede sampe madena. 20 Samana'e aimangad̄i mada wunga maruku, sia tu'u ro wehana anakea mada ra d̄i kompe mada. Ana mada ede wi'i b̄a sia d̄ihid̄i marukai sia, edempara ana sia ma wa'ura made ede wi'i b̄a sia d̄ihid̄i marukai mada. 21 Naisid̄isi, wakatu mada tu'uku ro ne'e mbei susu ana mada ede, mada edaku anakea ede nawa'ura made. Sawa'u b̄a tio-tio kab̄ae b̄a mada, palasi sia laina ana mada.>>
22 <<Cowa!>> nggahi dou siwe makalaina ede, <<Ma mori ake ana nahu, ma made ede ana nggomi!>>
<<Wati>!> cambe dou siwe ma sarambana ede. <<Ma made ake ana nggomi, ro ma mori ede ana nahu!>>
Ndedeku cence ncihi siad̄oho d̄i tando sangaji.
23 Edempara nggahi sangaji Sulaiman, <<Nggomid̄oho cua-cua mangaku b̄a one ana dou to'i ma mori ake ana ndaimu ro laina ma made ede.>> 24 Sawa'u b̄a nggahi ndedena sangaji kauna dou weha peda. 25 Edempara parenta b̄a sangaji, <<Dompo d̄uapu ana dou to'i ma mori ede ro mbeipu mangga sadompona d̄i cua dou siwe ede.>>
26 Ringana parenta ede, ina masapodakaina ra d̄i ana dou to'i ede manggahi, <<Takangampu, ruma sangaji, aina hadeta ana dou to'i ede, ta mbei mpa d̄i sia.>> Ina ede nggahi ndedekaina b̄ara sia na ipiku mecina anana. Pala dou siwe makalai ede manggahi, <<Io, dompo mpa, co'opu kone sab̄ua dou rau ra d̄i madad̄oho wati wara ma rakana ana dou to'i ede!>> 27 Ndad̄i nggahira sangaji Sulaiman, <<Aina hade ana dou to'i ede! D̄onggopu d̄i dou siwe ma sarambana ede -- siaku inana.>> 28 Wakatu bangsa (dou-dou) Israil ringana mab̄oha nggahi ra weha b̄a sangaji Sulaiman ade parenta ede, siad̄oho wancuku mbora akana ro nalia ro horomaku sia. B̄a one, natadapoda Allah Ta'ala wa'ura mbeina d̄i sia hikmah d̄i kalampakai ma adil.