Sangaji Sulaiman Tu'una Uma RUMA
6
Sangaji Sulaiman tampu'una tu'u Uma RUMA d̄i wura Ziw, eded̄u wura kad̄uakaina, ade mba'ana kaupakaina wakatu parentakai sia, 480 mba'a sawa'u b̄a bangsa Israil tu'u wi'ina dana ro rasa Mesir. 7-10 D̄i ru'u haju-haju balo ede rakani haju aras (cemara Libanon).Tad̄a ncai malao aka b̄ili-b̄ili ra tu'u sala'i (tu'u wali) d̄i tingka ma awana wara ta wela d̄ona, ro d̄i ru'u lao kai aka tingka d̄ua lab̄o tingka tolu wara a'u ma nteko-nteko. Sawa'u b̄a ede sangaji Sulaiman kinana (ndawina) taja uma ede. D̄i ru'u taja ede sia kanina nggore-nggore haju lab̄o kapenta kai haju aras (cemara Libanon).
Salama (santoi) tu'u Uma RUMA ede, wati warana kone sakali d̄iringamu eli sambore, ponggo atau marakani b̄esi, b̄a one wadu-wadu ma d̄i kani d̄itu'ukai Uma RUMA ede, wa'ura ka'ambi ulu wa'u wakatu mbuipu aka hid̄i b̄i'akai wadu. Ndedeku sangaji Sulaiman tu'una Uma RUMA ede sampe nggorina.
11 Ndad̄i nggahira RUMA d̄i sangaji Sulaiman, 12 <<Nggara nggomi mato'asi d̄isara'a hukum ro parenta Nahu, Nahu d̄imakarawina d̄i ru'u nggomi au ra wa'u sakekai b̄a Nahu d̄i amamu la Daud. 13 Nahu d̄imangge'e ade uma ratu'u b̄a nggomi ake d̄i woha ela Nahu (dou) Israil . Ro Nahu wati d̄imatu'u wi'i siad̄oho.>>