Peti Sake RUMA Lao Wa'a aka Uma RUMA
8
Sawa'u b̄a ede sangaji Sulaiman kauna sara'a suku ro londo ro mai bangsa Israil mai raka sia d̄i Yerusalem d̄imalao wa'a peso Peti Sake RUMA ra d̄i Sion, Kota Daud, lao aka Uma RUMA. 2 Ndad̄i maira siad̄oho sara'a d̄i Ainaina Ndiha Salaja Ro'o Haju (Aruraja Salaja Ro'o Haju) ade wura Etanim. 3 Sawa'u b̄a kab̄oro sara'a weki dou-dou mana'ekaina ede, imam-imam mahanta Peti Sake ede, 4 ro lao wa'ana aka Uma RUMA. Kemah RUMA lab̄o sara'a tau ro tuina lao wa'a rau aka Uma RUMA b̄a imam-imam ro dou Lewi. 5 Sangaji Sulaiman lab̄o sara'a dou Israil kab̄oro weki d̄i tando Peti Sake ede edempara d̄onggo ro mbeina d̄i ru'u RUMA, jimba ro capi ma wati wa'u d̄i reke mbotona. 6 Sawa'u b̄a imam-imam wa'a kalu'una Peti Sake ede ade Uma RUMA ro toho wi'ina awa mai b̄a patung-patung kerub (mala'eka to'i) d̄i ade B̄ili Mawancuraso. 7 Kalete patung-patung ede wiraweki nab̄ontoku peti ede ro haju-haju kaleikai. 8 Haju-haju kaleikai ede naipiku naruna, ndad̄ina sumpu-sumpu haju ede loa d̄i eda ra d̄i tando B̄ili Mawancuraso, sampe/saraka ainaina ake haju-haju ede mbuipu d̄i hid̄i ede.9 D̄i ade Peti Sake ede wati wara au-au rau selasi d̄ua lompe wadu ra tuntukai Sake RUMA. D̄ua lompe wadu ede wa'ura tau ade Peti b̄a la Musa d̄i Doro Sinai, wakatu RUMA ndawina sake lab̄o dou (bangsa) Israil d̄i wakatu siad̄oho ade lampa ro laona losa ra d̄i Mesir lao aka dana ro rasa Kanana. 10 D̄i wakatu imam-imam losana ra d̄i Uma RUMA ede wed̄i lalompa uma ede b̄uni b̄a apu. 11 Apu ede cahaya kancilo b̄a d̄ese ro ntasa wara maina RUMA, ndad̄ina imam-imam ede wati loana lu'u mbali d̄ikalampakai taki siad̄oho. 12 Ndad̄i do'ara sangaji Sulaiman, nggahina,
Itaku ma ratohona liro ese langi, io RUMA.
Pala Ita ncewi ca'uta ngge'e ade rindi ncaki apu.
13 Ake mada tu'u weaku d̄i ru'u Ita Uma (gedung) ma wancu ntika,
d̄i ru'u hid̄i ngge'ekai Ita santoi-ntoina.
Padato Sangaji Sulaiman d̄i Ela ro Douna
14 Sawa'u b̄a nggori do'ana, sangaji Sulaiman tambari satandona d̄i sara'a ela ro dou ma wunga kid̄i d̄i hid̄i ede, edempara rahona bareka Allah Ta'ala d̄i ru'u b̄a siad̄oho. 27 Pala, io Allah Ta'ala, sab̄ua poda-poda Ita ngawa ta ngge'e d̄i dunia ake? Sara'a langi rau wati ncihi pajana d̄i ru'u Ita RUMA, au walipu Uma Ibadah ra tu'u b̄a mada ake!
Kasaha Uma RUMA
62 Sawa'u b̄a ede, sangaji Sulaiman lab̄o sara'a dou ma kab̄oro weki d̄i hid̄i ede d̄onggo ro mbeina koroba d̄i ru'u RUMA. 63 D̄i ru'u koroba damekai (kangampukai dosa) sangaji Sulaiman d̄onggo ro mbeina 22.000 mbua capi lab̄o 120.000 mbua jimba. Ndedeku sangaji lab̄o sara'a ela ro dou kalampana upacara kasahakai Uma RUMA.