Sangaji Sulaiman Tu'u Wi'ina RUMA
11
Sangaji Sulaiman mecina mboto siwe lai rasa. Arimai (selasi) ana siwe sangaji Mesir, sangaji Sulaiman nika rauna lab̄o dou-dou siwe Het, Moab, Amon, Edom ro Sidon. 2 Sapodakaina RUMA wa'ura parentakaina b̄a one dou Israil wati loa nika campo lab̄o bangsa-bangsa ede, b̄a one siad̄oho peade nakamaiku dou Israil nemba ilah-ilah makalai. Kone wa'ura parenta ndede, sangaji Sulaiman ngge'e mpa nikana lab̄o dou-dou siwe lai rasa. 3 Wara 700 dou siwe ana rato ra ruma ra nika lab̄o b̄a sangaji Sulaiman, ro wara rau 300 dou weina makalai. Wei-weina edeku makamaina sangaji Sulaiman tu'u wi'ina Allah Ta'ala, 4 ndad̄ina d̄i wakatu sia wa'ura tua siad̄oho wa'una siwi sia sampe ngawana nemba ilah-ilah makalai. La Daud ama sangaji Sulaiman, nato'a d̄i RUMA, Allah Ta'ala, pala la Sulaiman wati b̄une amana. 5 La Sulaiman nembana Asytoret, dewi d̄i nemba b̄a dou Sidon, ro Molokh dewa ma d̄ini'ikai ade ma d̄inemba b̄a dou/bangsa Amon. 6 Ndedeku la Sulaiman karawina dosa d̄i RUMA. La Daud, ama b̄a la Sulaiman mab̄atu/mato'a d̄i RUMA kai sab̄ini b̄a adena (more adena), pala la Sulaiman wati b̄une ede. 7 Ta ese wawo doro wela ele Yerusalem, sia tu'una hid̄i sambea ro ibadakai (toho ro d̄orekai) d̄i ru'u Kamos, dewa nemba b̄a dou Moab, ro d̄i ru'u Molokh, dewa nemba b̄a dou Amon -- d̄ua mbua dewa ede sama mpa d̄ini'ikai ade. 8 Sangaji Sulaiman tu'u rau hid̄i-hid̄i d̄i ru'u wei-weina ma bangsa makalai (lai rasa) loa d̄ika'akai d̄upa, ro loa d̄onggo ro mbei soji (koroba) d̄i ru'u dewa-dewa ndai siad̄oho. 9-10 Wa'ura d̄ua kali RUMA, Allah Ta'ala dou Israil , katadana weki d̄i la Sulaiman ro ngoa ro kawarana sia b̄a one sia wati loana nemba ilah-ilah ma kalai, pala la Sulaiman wati ngawana kade'e (to'ana) nggahi RUMA. Sia natu'u wi'iku RUMA, ndad̄ina RUMA mbani d̄i sia. 11 Edempara nggahira RUMA, <<B̄ara kai sangaja nggomi sapa sakemu lab̄o Nahu ro wati to'akaimu d̄i parenta-parenta Nahu, ndad̄i Nahu d̄imawehana kerajaan ede ra d̄i nggomi, ro Nahu d̄imambeina d̄i pagawemu. 12 Kone ndedena, bara amamu la Daud, Nahu wati d̄imakalampa, lampa rawi ede salama nggomi mbuipu mori. d̄i wakatu/jaman parentakai b̄a ana monemu, ede ampo kalampa b̄a Nahu rawi ede. 13 Pala wati sara'a kerajaan ede d̄i weha b̄a Nahu ra d̄i sia. B̄ara ada Nahu la Daud, ro b̄a d̄i ru'u Yerusalem ra wa'u kandad̄i b̄a Nahu Kota Nahu ede, ndad̄i Nahu d̄imawi'ina sab̄ua suku d̄i ru'u ana monemu ede.>> 28 La Yerobeam rau nakarawi d̄ihid̄i ede. Wakatu eda b̄a la Sulaiman b̄a one la Yerobeam natupa ro na caha, ndad̄i sia mbei b̄a la Sulaiman d̄isu'u ro tundu d̄imandad̄i mando karawi paksa d̄i dana ro rasa dou-dou suku Manasye lab̄o Efraim.29 D̄i sab̄ua ainaina la Yerobeam tu'u wi'ina Yerusalem. D̄i ade lampa ro laokaina ede sia mai raka b̄a Nabi Ahia ra d̄i (dou) Silo ma wakatu ede kanina jumba ma b̄ou. 30 Edempara Nabi Ahia runcuna jumbana ede, ro sipa-sipa b̄a sia ndad̄i sampuru d̄ua dompo. 31 Sawa'u b̄a ede nggahira sia d̄i la Yerobeam, <<Wehapu sampuru dompo ra d̄i jumba ra sipa-sipa ede d̄i ru'u nggomi, b̄a one RUMA, Allah Ta'ala dou Israil , manggahi ndake d̄i nggomi, <Nahu d̄imaweha kerajaan ake ra d̄i la Sulaiman ro sampuru suku d̄imbei d̄i nggomi. 32 Pala sab̄ua suku ngge'e mpa d̄i ru'u la Sulaiman, b̄a d̄i ru'u ada-Ku la Daud, ro d̄i ru'u Yerusalem, ra wa'u kad̄ale b̄a Nahu ra d̄i sara'a dana ro rasa Israil mandad̄i kota Nahu. 33 Nahu d̄imakarawina lampa rawi ede b̄ara la Sulaiman wa'ura tu'u wi'ina Nahu ro nembana dewa-dewa eded̄u: Asytoret, dewi bangsa Sidon; Kamos, dewa bangsa Moab; lab̄o Milkon, dewa bangsa Amon. Ro la Sulaiman wati b̄atuna au ra kane'ekai b̄a Nahu. Sia wati b̄une amana, la Daud ma to'a d̄i Nahu ro makalampa parenta-parenta Nahu. 34 Kone ade ndedekaina, Nahu wati d̄imaweha sara'a kerajaan ede d̄i sia. Sia d̄ico'o b̄a Nahu ntau kuasa (ndad̄i sangaji) salama (santoi) morina. Lampa rawi ede karawi b̄a Nahu b̄a d̄i ru'u ada-Ku la Daud, ra wa'u kad̄ale b̄a Nahu ro mato'akai d̄i hukum-hukum Nahu ro parenta-parenta Nahu. 35 Pala karajaan ede Nahu d̄imaweha d̄i ana mone la Sulaiman ro sampuru suku Nahu Dimambei d̄i nggomi. 36 Ro sab̄ua suku mbei b̄a Nahu d̄i sia, loakud̄u wara ncau sab̄ua dou ade weki londo ro mai ada-Ku la Daud ma parenta d̄i ru'u Nahu d̄i Yerusalem, kota ra wa'u kad̄ale b̄a Nahu mandad̄i hid̄i sambea ro ibadakai d̄i Nahu. 37 Ndad̄i nggomi, Yerobeam, kandad̄i b̄a Nahu sangaji Israil ro Nahu makau parenta nggomi sara'a dana ro rasa ma d̄ine'e b̄a nggomi. 38 Nggara nggomi, b̄une ada Nahu la Daud, ma poda-poda to'amu d̄i Nahu kai kalampa sara'amu au ra parentakai b̄a Nahu d̄i nggomi, ndad̄i Nahu d̄imalab̄o ncauna nggomi. Nahu makandad̄i nggomi sangaji d̄i Israil . Nahu masake b̄a one londo ro maimu d̄imandad̄i sangaji Israil macepena nggomi, sama b̄une ra wa'u karawi b̄a Nahu d̄i ru'u la Daud. 39 B̄ara la Sulaiman karawina dosa, Nahu d̄imahukum londo ro mai la Daud, pala hukuman ede wati ru'u santoi-ntoina.>>
40 Wakatu haba ede rongga d̄i la Sulaiman, sia usahana hade la Yerobeam. Pala la Yerobeam lao rai horuna weki aka sangaji Sisak d̄i Mesir, ro la Yerobeam ngge'ena aka Mesir sampe made la Sulaiman.
Madena Sangaji Sulaiman
41 Carita makalai mab̄oha la Sulaiman, eded̄u mab̄oha sara'a ra wa'u karawi b̄a sia ro mab̄oha loa ro b̄ade sia, wa'ura tunti ade buku Riwayat mori la Sulaiman. 42 Upa mpuru mba'a ntoina la Sulaiman maparenta (mandad̄i sangaji) d̄i Yerusalem d̄i sara'a dana ro rasa Israil . 43 Sawa'u b̄a ede sia made ro umbu b̄a dou d̄i Kota Daud. Edempara la Rehabeam ana mone la Sulaiman ede mandad̄i sangaji ma cepena sia.