Barontana Dou Suku-Suku ma Wara ta Wela D̄a
12
La Rehabeam lao aka Sikhem, b̄ara sara'a ela ro dou Israil ma wara (mangge'e) ta wela d̄a nawa'ura kab̄oro weki ta aka d̄ituha ro lantikaina sia ndad̄i sangaji. 2 D̄iwakatu ede la Yerobeam ana la Nebat mbuipu warana d̄i Mesir b̄ara lao rai horuna weki ra d̄i (dahuna), d̄i sangaji Sulaiman. Wakatu ringana haba mab̄oha la Rehabeam sia dula mbali aka Israil . 3 Ela ro dou Israil mangge'e ta wela d̄a undana la Yerobeam, edempara doud̄oho ede lab̄o sia lao santabe la Rehabeam, nggahi siad̄oho, 4 <<Sangaji Sulaiman ama Ita ruma sangaji wa'ura mbeina ru'u ma tani d̄i madad̄oho. Ake nggara Ita ruma sangaji makaneo weasi tani ru'u ede ro makakuraweasi susa ro ncoki madad̄oho, ndad̄i madad̄oho d̄imakarawi ro to'a d̄i Ita ruma sangaji.>>5 Pala cambe b̄a la Rehabeam, <<Nahu makananu wa'u. Mai mbalipu tolu nai wali.>> Ndad̄i dula doud̄oho ede.
6 Edempara la Rehabeam rahona ngoa ro tei mataho d̄i dou-dou matua ma ra wa'u ndad̄i dou mangoa ro tei kataho la Sulaiman, ama la Rehabeam. <<B̄uneku pab̄ua d̄icambekai b̄a mada d̄i doud̄oho ma ramai ede?>> sodi b̄a la Rehabeam, <<Auku ngoa ro tei ma taho ra d̄i itad̄oho?>>
7 Cambe b̄a siad̄oho, <<Nggara Ita ruma sangaji poda-podasi ne'e karawi d̄i ru'u ela ro dou, tarimapu au ra raho b̄a siad̄oho, ndad̄i siad̄oho d̄imakarawi ro to'a d̄i Ita ruma sangaji santoi-ntoina.>>
8 Pala au ra ngoa tei b̄a dou-dou matua ede wati kandad̄i au b̄a la Rehabeam, sia nalaoku d̄i dou-dou sampela (ma mbuipu to'i umu) ma sama umu lab̄o sia ro ma wakatu ake mabantu sia. 9 D̄i siad̄oho ede sod̄i kai b̄a sia, <<Au ngoa ro tei mataho ra d̄i nggomid̄oho d̄i ru'u nahu d̄icambekai ela ro dou ma raho loakud̄u nahu kaneo wea tani ru'u siad̄oho ra mbei b̄a ama nahu?>>
10 Cambe b̄a dou-dou sampela ede, <<Ndakeku d̄ipab̄ua nggahi b̄a Ita ruma sangaji, d̄i siad̄oho, <<Samapu-mapuna nahu, nahu mbuipu ncewi tenggo ntewikaisi amaku!>n 11 Ama nahu mbeina ru'u ma tani d̄i nggomid̄oho, pala nahu d̄imambei ma ncewi tani wali. Ro sia b̄oena nggomid̄oho kai cambo, pala nahu d̄imab̄oe nggomid̄oho kai cambo marui b̄esi!>>
12 Tolu nai sawa'u b̄a ede, la Yerobeam lab̄o sara'a dou ede mai mbali satando sangaji Rehabeam, b̄une ra wa'u parentakai b̄a sia. 13 Wati samana lab̄o ngoa ro tei mataho b̄a dou-dou matua ede, ela ro dou ma mai satando sangaji ede, nuntu lab̄o b̄a sia kai toku ro kasa. 14 B̄une ra ngoa ro tei kataho b̄a dou-dou sampela, sia nggahina, <<Amaku mbeina d̄i nggomid̄oho ru'u matani, pala nahu d̄imandawi ru'umu ma ncewi tani wali. Sia b̄oena nggomid̄oho kai cambo, pala nahu d̄imab̄oe nggomid̄oho kai cambo ma rui b̄esi!>> 15 Au ra raho b̄a ela ro dou Israil ede wati kandad̄i au b̄a sia. Pala ede romo kane'ekai b̄a RUMA. Au ra nggahi b̄a RUMA kai ncai Nabi Ahia ra d̄i Silo mab̄oha la Yerobeam ana la Nebat pab̄uaku ndad̄ina.
16 Wakatu ela ro dou edana b̄a one sangaji wati ngawana kandad̄i au (kade'e) au ra raho b̄a siad̄oho, ndad̄i kanggica siad̄oho, <<D̄i aukai kawarata la Daud lab̄o londo ro maina! Siad̄oho wati parna karawina au-au d̄i ru'u ndaita. Ela ro dou Israil , mai ndai tadula! Co'o mpa la Rehabeam ede uruna weki ndaina!>>
Ndad̄i dulara ela ro dou Israil , 17 ro la Rehabeam ndad̄i sangaji d̄i dana ro rasa Yehuda mpa. 18 Kone ade ndedekaina, sangaji Rehabeam mbui raupu kauna la Adoniram, sab̄ua dou mana'ekai karawi rodi, weha wea ade (siwi) ela ro dou loakud̄u aina ngangona. Pala sia tob̄a b̄a dou kai wadu sampe madena. Edana lampa rawi ede la Rehabeam roci rai ne'ena ese karetana, edempara lao rai horuna weki aka Yerusalem. 19 Tampu'u wakatu ede ela ro dou Israil ma ngge'e ta wela d̄a karajaan Israil nabaronta ncau d̄i sangaji-sangaji londo ro mai la Daud.
20 D̄i wakatu sara'a ela ro dou Israil ringana haba b̄a one la Yerobeam wa'ura mai mbali ra d̄i Mesir, ndad̄i siad̄oho undana sia d̄i sab̄ua mbolokai edempara hantana (tuha ro lantina) la Yerobeam ndad̄i sangaji Israil . Ela ro dou suku Yehuda mpa ma ngge'e mpa to'ana d̄i londo ro mai la Daud.
Sarori Nabi Semaya
(2 Taw. 11:1-4)
21 Wakatu sangaji Rehabeam rongga d̄i Yerusalem, sia kab̄orona 180.000 dou tentara ma tenggo ro ngau ra d̄i dou-dou suku Yehuda lab̄o suku Benyamin d̄imalewa lab̄o Israil ro katenggo mbali kuasakaina d̄i suku-suku ma wara ta wela d̄a Israil . 22 Pala nggahira Allah Ta'ala d̄i Nabi Semaya 23 karonggapu haba ake d̄i la Rehabeam, ro d̄i sara'a dou suku Yehuda lab̄o suku Benyamin, 24 <<Aina lewamu lab̄o cina ro angi ndaimu dou Israil . Dulara! Au ma wa'ura ndad̄i ede kane'ekai b̄a Nahu.>> Ndad̄i siad̄oho sara'a b̄atuna parenta RUMA, edempara siad̄oho lao dula aka cua-cua uma ndaina.
La Yerobeam Tu'u Wi'ina RUMA
25 Sawa'u b̄a ndad̄ina sangaji Israil , la Yerobeam lao katenggona (dou) kota Sikhem d̄i dana ro rasa doro-doro Efraim, edempara nge'ena ta aka wati ntoina. Edempara sia lao walina tu'u wi'i dana ro rasa ede ro lao katenggo walina (dou) kota Pnuel. 26-27 Ndad̄i nggahi la Yerobeam d̄i adena, <<Nggara ela ro dou Israil ngge'e mpa laona aka Yerusalem d̄i d̄onggo ro mbeikaina koroba d̄i Uma RUMA, b̄une ra karawi b̄a siad̄oho wakatu ake, tantu siad̄oho d̄imambali bantu la Rehabeam, sangaji Yehuda ede, edempara nahadeku nahu.>>
28 Sawa'u b̄a timba ro lemba (kananu kab̄ae) b̄a sia, lampa rawi ede, ndad̄i sia ndawina d̄ua mbua patung capi masa, edempara nggahina d̄i ela ro dou Israil , <<Oe Bangsa Israil ! Wa'ura ntoi poda nggomid̄oho laomu aka Yerusalem d̄i ru'u sambea ro ibadakaimu. Wakatu ake, akeku ilah-ilahmu (dewa-dewamu) ma wa'ura wa'a kalosa nggomid̄oho d̄i Mesir!>> 29 Edempara la Yerobeam toho wi'ina sab̄ua patung capi masa ede d̄i Betel ro ma kalaina toho wi'i b̄a sia d̄i Dan. 30 Ndad̄i ela ro dou Israil karawina dosa, b̄ara siad̄oho lao sambea ro ibadakaina aka Betel lab̄o aka Dan. 31 Ro la Yerobeam tu'u rauna hid̄i-hid̄i sambea ro ibadakai (kuil-kuil) makalai d̄i wawo-wawo doro, ro sia hantana imam-imam d̄i ade iwa ro weki ma laina dou suku Lewi.
RUMA B̄a'ana Sambea ro Ibada d̄i Betel
32-33 Sawa'u b̄a ede, la Yerobeam wi'ina imam-imam ede d̄i Betel d̄imakalampa takina d̄i hid̄i ede ro ndai sia mad̄onggo ro mbei koroba d̄i ru'u capi-capi masa ra ndawina ede.
Edempara la Yerobeam katantuna tanggal lima belas (ainaina kasampuru limakaina) ade wura waru ndad̄i ainaina aruraja d̄i ru'u dou Israil , sama lab̄o ainaina aruraja d̄i Yehuda. d̄i ainaina ede la Yerobeam lao aka Betel ro donggo ro mbeina koroba d̄i ru'u kandihakai ainaina aruraja ra wa'u katantukaina ede.