La Elia d̄i Kengge Sori Kerit (17:1-6) La Elia ro Oru Mpana ma Ipi
17
Waraku sab̄ua dou nabi, ngarana la Elia. Sia dou Tisbe, Tisbe eded̄u sab̄ua kota d̄i dana Gilead. D̄i sab̄ua ainaina, sia maina d̄i sangaji Ahad ro nggahi la Elia, <<Kai ngara RUMA ma mori, Allah Ta'ala ma d̄i nemba b̄a dou Israil ro ma d̄ikarawi wea b̄a mada (nahu), mada mangoa d̄i Ita ruma sangaji, b̄a one salama d̄ua mba'a atao tolu mba'a makento ake wati d̄imawara oi sena atao ura kone sato'i, selasi nggara nggahisi b̄a mada.>> 2 Sawa'u b̄a ede nggahira RUMA d̄i la Elia, 3 <<Tu'u wi'ipu hid̄i ake, laopu aka wela ele aka ipa b̄ae b̄a sori Yordan ro cilipu wekimu ta aka d̄eni lab̄o ncangga sori kerit. 4 Ro nggomi loa nono d̄i Sori ede, ro nasi garaha d̄ikau b̄a Nahu ma wa'a wea ngaha ro nono d̄i ru'u nggomi.>>
5 La Elia b̄atuna au ra parentakai b̄a RUMA ede, ro sia lao aka ncangga sori Kerit edempara ngge'ena d̄i kengge sori ede. 6 Sia nonona d̄i sori ede, ro ngaha roti lab̄o hi'i ra wa'a wea b̄a nasi garaha d̄isanikina aimasid̄i lab̄o aimambia. 7 Wati ntoina sawa'u b̄a ede, sori ede rau ndad̄i mango b̄ara wati wara ura.
La Elia lab̄o Dou Siwe Mbaru Mboha d̄i Sarfat
8 Edempara nggahira RUMA d̄i la Elia, 9 <<Ake nggomi pab̄uapu lao aka kota Sarfat, d̄eni lab̄o Sidon ro ngge'epu ta'aka (d̄i hid̄i ede). Nahu wa'ura kauku sab̄ua dou siwe mbaru mboha ta aka, d̄imambei ngaha d̄i nggomi.>> 10 Ndad̄i lao ra la Elia aka Sarfat, wakatu sia ronggana d̄itad̄a lawa kota ede, la Elia edana sab̄ua dou siwe mbaru mboha ma wunga b̄oro (kab̄oro) haju ka'a. Edempara nggahi la Elia d̄i dou siwe mbaru mboha ede, <<Ina, bantu to'i weha wea sato'i oi nono d̄i ru'u mada.>> 11 Wakatu dou siwe ede wunga lampa d̄iwehakaina oinono ede, nggahi wali la Elia, <<Ina, wa'a wea rau sato'i roti.>>
12 Pala cambe b̄a dou siwe mbaru mboha ede, <<Kai ngara RUMA ma mori, Allah Ta'ala ra nemba b̄a Ita ama, mada kasumpa b̄a one mada wati ntauku roti. Mada ntauku sakimi/sakampa mub̄u tarigu mpa ade roaku, lab̄o sato'i mina zaitun ade boto, mada wunga b̄oroku haju ka'a d̄ikamamikaiku osu sato'i ede, loakud̄u mada lab̄o anaku loa ngaha. Edeku ngaha ro nono madad̄oho ma cumpukai; sawa'u b̄a ede madad̄oho d̄ikade'e made mpa.>>
13 Edempara nggahi nabi Elia, <<Aina darura, ina!>> santab̄e ita ndawipu ngaha ro nono d̄i ru'u ita lab̄o anata. Pala sawatipu ede, tandawi wa'upu sab̄ua roti to'i kai mub̄u lab̄o mina ede ro tawa'apu ara ake. 14 B̄a one RUMA, Allah Ta'ala ma d̄inemba b̄a dou Israil , manggahi b̄a one roa ita ede d̄imab̄ini ncau b̄a mub̄u, ro boto minata ede d̄imawara ncau mina sampe d̄i ainaina (wakatu) RUMA kalondona ura d̄i dunia.>>
15 Edempara laora dou siwe mbaru mboha ede, karawina au ra kaukai b̄a nabi Elia. Ndad̄i siad̄oho tolu nantau osu ma ncihi ru'u pila-pila (wakatu) mantoi. 16 Ro b̄une ra wa'u nggahi b̄a RUMA d̄i (kaincai) nabi Elia, roa dou siwe ede na wara ncau isi b̄a mub̄u, ro boto rauna isi ncau b̄a mina.
17 Wati ntoi sawa'u b̄a ede, ana dou siwe ede rongga supuna. Naha ntoi supu ede naha ipi (tani) ndad̄ina ana dou siwe ede made. 18 Edempara nggahi dou siwe ede d̄i nabi Elia, <<Io ada Allah Ta'ala, b̄ab̄auku ita karawikaimu lamparawi ake d̄i ru'u mada? Sab̄ua mai ita ake d̄imakamaina, Allah Ta'ala kawarana d̄i dosa mada, ndad̄ina ana mada pab̄uaku madena wakatu ake?>>
19 Pala cambe b̄a nabi Elia, <<Wa'apu anata ede ta ake.>> Edempara nabi Elia wehana ana dou mone ede d̄i inana, ro lao wa'a b̄a nabi Elia ese b̄ili ma ese, ade b̄ili marukai nabi Elia. Nabi Elia karuna ana dou mone ede ese wawo marukai, 20 edempara sia do'ana kai eli ma na'e, <<Io RUMA, Allah Ta'alaku, b̄ab̄auku Ita kamaita iha ake d̄i ru'u dou siwe ake? Dou siwe ake nawa'ura mbei (tarimana) mada ngge'e d̄iumana ro ake Ita RUMA, hadeta anana!>> 21 Sawa'u b̄a do'ana ede nabi Elia tolu kali sanggob̄ona sarumbu sia d̄i wawo ana dou mone ede, ro do'ana, <<Io RUMA, Allah Ta'alaku, takamori mbali to'ipu ana dou mone ake!>> 22 RUMA ringa ro cambena do'a nabi Elia; ana dou mone ede sasinawana ro mori mbalina.
23 Edempara nabi Elia londo ra d̄i b̄ilina ro wa'ana ana dou mone ede d̄i inana, ro nggahi sia, << Ina, ake anata! Sia nawa'ura mori mbali!>>
24 Cambe b̄a dou siwe ede, <<Ake mada kab̄adera b̄a one Ita eded̄u ada Allah Ta'ala, ro nggahi ro eli Ita poda romo ramaina ta RUMA!>>