Nabi Elia lab̄o La Obaja
18
Ntoi sawa'u b̄a ede, ade mba'ana katolukaina oru pana (mango) ede, nggahira RUMA d̄i nabi Elia, <<Lao satandopu sangaji Ahab, wati ntoi walina Nahu d̄imakalondo ura.>> 2 Ndad̄i laora la Elia.Wakatu ede bala hid̄o nawa'u ipi d̄i Samaria. 3 B̄ara ndedena, sangaji Ahab ouna la Obaja d̄imamai satando sia. La Obaja eded̄u dou mana'ekai uma ro salaja asi sangaji. La Obaja eded̄u dou ma poda-poda sambea ro ibada d̄i RUMA. 4 D̄i wakatu la Izebel hadena nabi-nabi RUMA, la Obaja akeku ma rabantuna 100 dou nabi kai cilina siad̄oho ede d̄i ade karombo --, 50 dou ede sab̄ua karombo -- ro mbeina ngaha ro nono doud̄oho ede. 5 Nggahi sangaji Ahab d̄i la Obaja, <<Mai ndai ta lampa kalilikuo d̄isara'a dana ro rasa ake ro tangupaku mada oi atao sori. Kombisi ndai d̄imarumpa mpori d̄i ru'u ngaha jara ro bagal ndai, loakud̄i ndai wati paralu sambeleta kone sab̄ua rau ade binata ntadi ndaita.>> 6 Sawa'u b̄a cenggana dana ro rasa ma d̄ilampa kalili menakaina ede, edempara siad̄oho laona. Sangaji Ahab ma lao d̄i wela masab̄ua ro la Obaja malao d̄i wela ma kalai.
7 D̄i woha ncai la Obaja eda angina lab̄o nabi Elia. Sawa'u b̄a pata angina lab̄o nabi Elia, la Obaja suju lia ro horomakaina sia, edempara sod̄i b̄a la Obaja, <<Sab̄ua poda ita ake nabi Elia?>>
8 Cambe b̄a nabi Elia, <<Poda, nahu nabi Elia, ake laora ngoapu d̄i sangajimu b̄a one nahu wara ara ake.>>
9 Ndad̄i nggahi la Obaja, <<Auku ncara mada, ndad̄ina ita ne'e kai ta d̄onggo mada d̄i sangaji Ahab loakud̄u hadena mada? 10 Kai ngara RUMA, ma mori, Allah ma d̄inemba b̄a ita, mada ma nggahi (mangoa) b̄a one sangaji wa'ura kauna mada ngupa ita ta b̄e-b̄e. Nggara d̄i sab̄ua dana ro rasa nggahisi dou mana'ekai dana ro rasa ede b̄a one ita wati warana d̄i hid̄i ede, ndad̄i sangaji Ahab nakau pab̄uaku sumpa dou mana'ekai dana ro rasa ede, b̄a one ita wata eda romo d̄i hid̄i ede. 11 Ro ake ne'e b̄a ita, mada malao ngoa sia b̄a one ita wara d̄i hid̄i ake? 12 Nggara mada lao tu'u wi'i hid̄i ake, kombisi Ruh RUMA d̄imawa'a ita aka hid̄i ma wati b̄ade b̄a mada! Ro nggara ngoasi b̄a mada d̄i sangaji Ahab b̄a one ita wara ara ake, edempara sia wati rakana eda ita, tantu sia d̄imahade mada. D̄ib̄adekai b̄a ita, mada ake kapda-poda sambea ro ibada d̄i RUMA aipu to'i wa'uku! 13 Sab̄ua ita watipu ringata haba, b̄a one wakatu la Izebel hadena nabi-nabi RUMA, mada ake ma racilina saratu dou ade weki siad̄oho ede ade karombo -- lima mpuru dou ade sab̄ua karombo -- ro mada ma mbeina ngaha ro nono siad̄oho. 14 Ro ake, b̄ab̄auku ita kaukaita mada lao ngoa d̄i sangaji b̄a one ita wara ara ake ? Sangaji ede tantu d̄imahade mada!>> 15 Pala cambe b̄a nabi Elia, <<Kai ngara RUMA Ma Wancuna'e Kuasa ra karawi wea b̄a nahu, ro nahu masake b̄a one nahu d̄imamai ndaiku satando sangaji ainaina ake lalo.>>
Nabi Elia eda angi lab̄o sangaji Ahab
16 Edempara laora la Obaja ngoa d̄i sangaji, ro sangaji Ahab rau tu'u lao ne'e eda angi lab̄o nabi Elia. 17 D̄i wakatu la Ahab edana la Elia, nggahi la Ahab, << Akeku dou ma'kaiha Israil !>>
18 Ro cambe b̄a la Elia, <<Mada laina dou makaiha Israil , pala ndai ita ruma sangaji. Ita lab̄o iwa ro weki ita makaihana Israil , kai nembamu dewa-dewa Baal, Ita ruma sangaji wa'ura sapata parenta-parenta RUMA. 19 Ndad̄i, ake taparentapu sara'a ela ro dou Israil d̄imaeda angi lab̄o mada d̄i Doro Karmel. Ta wa'a raupu 450 dou nabi Baal lab̄o 400 dou nabi Dewi Asyera ede; ra paha b̄a ruma siwe Izebel!>>
20 Ndad̄i sangaji Ahab kau sara'ana ela ro dou Israil lab̄o nabi-Nabi Baal ede lao aka Doro Karmel. 21 Edempara nabi Elia mai rakana ela ro dou ede ro nggahina, <<Sampe b̄uneaiku nggomid̄oho ne'emu ngge'e mpa ncangga ademu ademu? Nggara RUMA ede, eded̄u Allah Ta'ala, nembapu RUMA! Pala nggara Baal ede, eded̄u Allah Ta'ala, nembapu Baal!>> Ndad̄i ela ro dou makab̄oro weki d̄i hid̄i ede wati ntauna nggahi. 22 Edempara nggahi nabi Elia, <<D̄i ade weki nabi-nabi RUMA d̄i nahu mpoa mpa ma mbuipu mori, padahal d̄i hid̄i ake wara 450 dou nabi Baal. 23 Ake wa'apu ara ake d̄ua mbua capi rangga. Kaupu nabi-nabi Baal ede weha sab̄ua ro sampelepu edempara dompo-dompopu ro tohopu ese wawo haju ka'a. Pala siad̄oho wati loana kana'e afi d̄i hid̄i ede. Ro capi masab̄ua wali nahu d̄imaka'ambina b̄une ede rau. Nahu d̄imasambelena capi masab̄ua ede ro madompo-dompona edempara toho ese wawo haju ka'a. Pala nahu rau wati d̄imakana'e afi d̄i hid̄i ede. 24 Co'o mpa nabi-nabi Baal ede do'ana d̄i dewa siad̄oho, ro nahu rau d̄imado'a d̄i RUMA. B̄e ma cambe kai nggaduna/kalondona afi, Sia edeku Allah Ta'ala.>>
Sara'a ela ro dou ma cambe menana kai eli ma na'e, <<Io taho b̄une ede!>>
25 Edempara nggahi nabi Elia d̄i nabi-nabi Baal ede, <<B̄ara weki nggomid̄oho ma mboto, santab̄e nggomid̄oho makad̄ale ulu capina ro ma ka'ambi ulu/kab̄ua ulu, pala aina kana'e afi d̄i haju ka'a ede. Sawa'u b̄a ede do'apu d̄i dewamu.>>
26 Ndad̄i nabi-nabi Baal ede kad̄alena sab̄ua capi ro ka'ambina b̄une nggahi ede, edempara siad̄oho do'ana d̄i Baal tampu'u aimasid̄i sampe aimarai kangica salahona, <<Cambe weapu do'a nami (madad̄oho), Baal!>> Siad̄oho karawina ede kai tari (joge) ncau-ncau heko mezbah siad̄oho. Pala wati wara tanda-tanda cambekai b̄a Baal kone sato'i.
27 D̄i wakatu aimarai ede nabi Elia tampu'ura kampa'a-mpa'akaina (kasungge-sunggena) siad̄oho. Nggahi sia, <<Do'apu ncewi kana'e wali! Sab̄ua sia laina ruma? Kombisi sia wunga doho kalao adena, atao lao aka wc. Loa ndad̄i rau sia wunga wara laokaina! Atao kombisi sia wunga maruna, ro nggomid̄oho pab̄uapu rod̄u kau b̄ola sia!>> 28 Ndad̄i nabi-nabi ede do'ana ncewi na'e wali. Ro siad̄oho karawina b̄unera nginakaina, siad̄oho tosi-tosina sarumbuna kai peda ro b̄uja sampe losa-losa ra'ana.
29 Ndedeku rawi siad̄oho wati dengga-denggana sampe aimambia b̄une dou lu'ukai b̄a b̄onto ro b̄olo. Pala wati wara ma cambe, wati wara tanda maringa ro kade'e.
30 Edempara nggahi nabi Elia d̄i sara'a ela ro dou Israil ede, <<Mai d̄eni menapu!>> Ndad̄i siad̄oho mai kab̄oro weki maheko sia, edempara sia tampu'u laku katahona mezbah RUMA ma wa'ura ndumba. 31 Weha b̄a sia sampuru d̄ua mbua wadu, b̄atu mboto weki suku londo ro mai la Yakub. La Yakub ake, dou ra tangarakai b̄a RUMA la Israil . 32 Kai wadu-wadu ede nabi Elia tu'u mbalina mezbah hid̄i sambea ro ibadakai d̄i RUMA. Ma heko mezbah ede ngari b̄a sia lapa na'e ndad̄ina loa lu'u kai oi ncewi kura sampuru lima lite. 33 Nabi Elia lakuna haju ka'a d̄i wawo mezbah ede, edempara capi sab̄ua ede dompo-dompo b̄a sia ro tohona ede wawo haju ka'a ede. Sawa'u b̄a ede nggahi sia, <<Taupu oi ade upa mbua roa (muja) sampe b̄inina, edempara luapu oi ede ese wawo d̄onggo ro mbei koroba ro hajuna.>> Sawa'u b̄a nggori siad̄oho karawina ede, 34 nggahi sia, <<Sakali wali,>> edempara siad̄oho karawina au rakaukai ede. <<Sakali wali,>> nggahi nabi Elia, ro siad̄oho karawi walina. 35 Ndad̄i raira oi ma ma heko mezbah ede ndad̄ina lapa ede b̄ini b̄a oi.
36 Rakara wakatuna d̄i d̄onggo ro mbeikai koroba aimambia, Nabi Elia mai d̄enina d̄i mezbah ede edempara do'ana, <<Io, RUMA, Allah Ta'ala ma d̄inemba b̄a la Ibrahim, Ishak ro la Yakub, takatada to'ipu wakatu ake, b̄a one Itaku Allah Ta'ala d̄i Israil , ro mada ake ada Ita. Takatada to'i raupu b̄a one sara'a au ra karawi b̄a mada ake eded̄u kai parenta b̄a Ita RUMA. 37 Ta cambe (ta mbei) to'ipu RUMA, ta cambe (ta mbei) to'ipu au ra raho mada, RUMA, loakud̄u ela ro dou ake bad̄ena b̄a one Ita, Io RUMA, eded̄u Allah Ta'ala, ro b̄a one Itaku ma ndawina siad̄oho mai mbali d̄i Ita, RUMA.>>
38 Edempara RUMA kalondona ari ese langi ro ka'a kampangina koroba ede lab̄o haju ka'ana, wadu-waduna ro danana ro oi ma wara ade lapa ede mpoi mango (kara). 39 D̄i wakatu ela ro dou edana lampa rawi mandad̄i ede, siad̄oho sujuna awa dana ro nggahina, <<RUMA ede Allah Ta'ala! Poda RUMA ede Allah Ta'ala!>>
40 Ndad̄i nggahira nabi Elia, <<Wa'upu nabi-nabi Baal ede! aina wara kone sab̄ua dou ma loa rai hori weki!>> Edempara dou-dou wa'una nabi-nabi Baal ede, sawa'u b̄a ede nabi Elia lao wa'ana nabi-nabi Baal ede aka Sori Kison ro hade sara'ana siad̄oho d̄i hid̄i ede.
Nggorira Mpana Ai
41 Sawa'u b̄a ede nggahira nabi Elia d̄i sangaji Ahab, <<Wakatu ake natahopu Ita ruma sangaji talao tando (talao katenggo weki) wa'u! Samporo wali namaira ura, b̄ara wa'ura raka ringa elina.>> 42 Edempara sangaji Ahab lao ngahana, ro nabi Elia lao tekana Doro Karmel. Ese wawo doro sia sujuna awa dana d̄i hela d̄ua tatu'una. 43 Nggahi sia d̄i adana, <<Tekapu ese wawo doro ro ntadapu aka ao moti.>>
Adana ede lao tekana doro, edempara londo mbali ro nggahina, <<Mada wati edaku au-au.>> Sampe pidu kali nabi Elia kauna adana teka londo doro d̄i tio kaina au ma ndad̄i. 44 D̄i makapidukalikaina adana ede mai mbali ro nggahina, <<Mada wara edaku ta'i bara (apu) b̄une na'e koha rima ma mai ta ao moti.>>
Ndad̄i nggahi nabi Elia d̄i adana, <<Laopu aka sangaji Ahab, kaupu sia ne'e ese karetana ro dula sawatipu sia tapa b̄a ura.>>
45 Ade saped̄a mada mpa langi ndad̄i had̄i ai, ro angi ma kente ma mai ro ura na'e tampu'ura londona. Sangaji Ahab ne'e ese karetana edempara dula aka Yizreel. 46 Wakatu ede nabi Elia rakana tenggo ro wale d̄i RUMA. Woku ca ese b̄a siajumbana ro d̄iki b̄a sia d̄i rokana, edempara rai kalalona sangaji Ahab sanaru ncai sampe (saraka) aka tad̄a na'e lawa kota Yizreel.