Nabi Elia aka Doro Sinai
19
Wakatu sangaji Ahab ngoana d̄i weina la Izebel, sara'a ra wa'u karawi b̄a nabi Elia, ro b̄uneku nabi Elia mahade sara'ana nabi-nabi Baal. 2 Ndad̄i la Izebel nggaduna nggahi ake d̄i nabi Elia, <<Raho-raho to'i mpa dewa-dewa mahukum, ro mahade nahu, nggara naisi d̄iwakatu b̄une ake nahu watisi karawiku d̄i nggomi b̄une nggomi wa'ura karawimu d̄i nabi-nabi Baal ede.>> 3 Ndad̄i dahura nabi Elia, edempara sia lao rai horuna weki loakud̄u wati hade b̄a dou. Sia laona lab̄o adana aka Bersyeba d̄i Yehuda Pala d̄i Bersyeba sia tu' wi'ina adana ede, 4 edempara sia lao lampa ed̄i aka So sarae sanai ntuki, ro sia sanawana d̄i wombo sab̄ua fu'u haju ma nggari. D̄i hid̄i ede sia d̄ohona ro sia na ne'e made mpa. Nggahi sia d̄i RUMA, <<Mada watid̄u wa'uku sia iu wali, RUMA, ta wehara nawa mada. B̄a one mada wati ncewi taho ntewikaisi wa'i ro waro mada!>> 5 Edempara sia ndorena d̄i wombo fu'u haju arar ede ro maru nefana. Sia wunga maruna ede wed̄i lalompa sab̄ua mala'ekat mad̄ama sia ro nggahi mala'eka ede, <<Tu'u Elia, ngahara!>> 6 La Elia b̄olana ro tio hekona, edempara edana d̄i kompe tutana satob̄e roti puru lab̄o gandi ma isina oi. Ndad̄i la Elia ngaha ro nonona, edempara maru mbalina. 7 Pala mala'eka RUMA mai kad̄ua kali kaina, d̄amana sia ro nggahina, <<Tu'u, Elia, ngahara, loakud̄u nggomi ma wa'u lampa ma d̄o'o.>> 8 Ndad̄i tu'u nabi Elia, edempara ngaha ro nonona. Ro sia ndad̄i tenggo ro wa'una lampa ro lao upa mpuru nai ntoina lao aka Doro Sinai.p d̄i hid̄i katadakai weki Allah Ta'ala. 9 Ta aka nabi Elia maruna d̄i ade karombo.Edempara nggahira RUMA d̄i sia, <<Elia, au rawi nggomi ta ake?
10 Cambe b̄a nabi Elia, <<Io RUMA, Allah Ta'ala Ma Wancud̄ese Ro Ntasa, mada karawi ncau d̄i ru'u b̄a ndai Ita mpa RUMA. Pala ela ro dou Israil nasapaku au ra sake siad̄oho lab̄o Ita. Siad̄oho d̄umbana mezbah-mezbah Ita ro hadena nabi-nabi Ita RUMA. D̄i mada kese mpa ma mori, ro ake siad̄oho nane'eku hade mada!>>
11 Nggahira RUMA d̄i sia, <<Losapu d̄i karombo ede, ro mai kid̄i satandopu Nahu ese doro.>> Edempara RUMA lampa kalalona hid̄i ede, mai ulu angi ma ipi kente ndad̄ina dore-dore ta ede hangga na'e ro doro-doro wadu nambi'a. Pala RUMA wati katadana weki ade angi ma ipi na'e ro kente ede. Sawa'u b̄a dengga angi ede, mai wali epu, pala ade epu ede rau RUMA wati katadana weki. 12 Ro sawa'u b̄a epu ede maira afi. Pala RUMA wati wara rauna ade afi ede. Sawa'u b̄a afi ede maira eli angi ma kasiso colu.
13 Wakatu nabi Elia ringana eli ede, sia b̄ontona pahuna kai jumbana, edempara losa kid̄inina d̄i asa karombo ede. Ndad̄i ringara b̄a sia eli ma nggahi, << Elia au rawi nggomi ta ake?>>
14 Cambe b̄a nabi Elia, <<Io RUMA, Allah Ta'ala Ma Wancuna'ekuasa, mada karawi ncau d̄i ru'u b̄a Ita mpa RUMA. Pala ela ro dou Israil nasapaku au ra sake siad̄oho lab̄o Ita RUMA. Siad̄oho d̄umbana mezbah-mezbah Ita, ro ma hadena nabi-nabi Ita. D̄i mada kese mpa ma mbuipu mori, ro wakatu ake siad̄oho na ne'e hade mada!>>
15 Nggahira RUMA, <<Lao mbalipu aka so sarae d̄eni lab̄o Damsyik! Edempara laopu aka kota ro luapu kai mina ese wawo tuta la Hazael d̄imandad̄i tanda hanta kasaha sia mandad̄i sangaji Siria. 16 Ro karawi kandede raupu d̄i la Yehu ana la Nimsi, loakud̄u sia d̄imandadi sangaji Israil , ro d̄i la Elisa ana b̄a la Safat ra d̄i (dou) Abel-Mahola, loakud̄u sia ndad̄i nabi macepena nggomi. 17 Cou-cou ma watipu ra hade b̄a la Hazael, d̄ihade b̄a la Yehu, ro siad̄oho ma mbuipu loa rai hori weki ra d̄i la Yehu d̄i hade b̄a la Elisa. 18 Pala 7.000 dou d̄i Israil d̄i kasalama b̄a Nahu, eded̄u dou-dou ma ngge'e mpa to'a d̄i Nahu ro wati suju ro nembana patung Baal atao ma ngilu patung ede.>>
La Elisa kad̄ale b̄a RUMA
19 Sawa'u b̄a nabi Elia tu'u wi'ina hid̄i ede, sia eda angina lab̄o la Elisa ana la Safat ma wunga rawi dana kainggala. Wara sampuru d̄ua oka capi d̄i tando sia, ro ndai la Elisa ma rawi kai capi ra oka ma cumpukai. Wakatu nabi Elia lampa saina d̄i kompe la Elisa, nabi Elia runcuna jumbana ro wirana (ampena) d̄i d̄inca la Elisa. 20 Ndad̄i la Elisa tu'u wi'ina capi-capina ro rai b̄atuna nabi Elia, nggahi sia, <<Takau to'ipu mada raho weki wa'u d̄i do matua mada, sawa'u b̄a ede mada d̄imalao b̄atu ita.>> Cambe b̄a nabi Elia , << Laora , nahu wati kantaku nggomi .>>”q 21 Edempara la Elisa lao mbali aka omana ro sambelena capi-capina ede. Haju nggalana kani b̄a sia ndad̄i haju ka'a d̄i kamamikaina hi'i capi-capi ede. Edempara sia cengga-cenggana hi'i capi ra wa'u kamamina ede d̄i ana morina ro siad̄oho ngahana. sawa'u b̄a ede la Elisa lao b̄atuna nabi Elia ro ndad̄i dou ma karawi inga nabi Elia.