KEJADIAN
ISI-ISINA MA PENTI ADE KITAB AKE
Kitab Kejadian nacaritaku rakandad̄ikai langi ro dana lab̄o isina, tampu'u tampona ndad̄ina manusia, tampu'u maikai dosa ro susa ro ncoki d̄i dunia, ro b̄uneku lao caritana hubungan Allah Ta'ala lab̄o manusia. Kitab Kejadian loa d̄icengga ade d̄ua mbua kalompo carita ma penti:
1. Fasal 1-11. Rakandad̄ikai langi ro dana lab̄o isina ro tampu'u tampona ndad̄ina manusia. Ade carita ake, nacarita rauku mab̄oha la Adam ro la Hawa, la Kain ro la Habel, la Nuh ro mbere lino, ro Menara Babel.
2.Fasal 12-50. Tampu'u tamponakaina wa'i ro waro bangsa Israil. Wa'i ro waro ma sarambakaina eded̄u la Ibrahim. Sia nawancuku mbou ngarana b̄ara imbi ro to'ana d̄i Allah Ta'ala. Sawa'u b̄a ede, b̄atu b̄a sajara la Ishak ana la Ibrahim, ro la Yakub ana la Ishak, la Yakub d̄ipehe rau kai la Israil. Ro sajara sampuru d̄ua ana mone la Yakub. Siad̄oho eded̄u dou-dou ma saramba-rambakaina ma katu'u sampuru d̄ua suku Israil. Dou ma tunti Kitab ake, nakapenti podaku ana la Yakub ma ngara la Yusuf ro lampa rawi-lampa rawi ma ndad̄i, ro cumpukaina la Yakub ro anad̄ohona ro iwa ro weki siad̄oho lao ngge'ena aka Mesir.
Konena ade Kitab ake nacaritaku mab̄oha dou-dou d̄i jaman ma sarambana, pala d̄ikapenti poda eded̄u sajara mab̄oha au ra karawi b̄a Allah Ta'ala. Kitab ake ratampu'u kai ngoa kapoda b̄a one Allah Ta'ala wa'ura kandad̄ina langi ro dana lab̄o isina, ro kanggori kai sake b̄a one Allah Ta'ala ngge'e mpa d̄imajaga ro sandaka ela-Na. Ma nenti rawi ma penti poda ade sara'a isi Kitab ake eded̄u Allah Ta'ala ma ndad̄i hakim ro ma hukumna cou-cou rau ma ncara rawi. Sia rau ma d̄anda ro wa'a ro ma bantu ela-Na ro ma ndawi sajara siad̄oho. Kitab ma ntoi ake ratunti mab̄oha carita imbi sab̄ua bangsa ro d̄imabantu loakud̄u imbi siad̄oho ngge'e mpa tenggona.
Isi
Tampu'u rakandad̄ikai langi ro dana lab̄o isina ro manusia 1:1--2:25
Tampu'u maikai dosa lab̄o susa ro ncoki 3:1-24
Tampu'u la Adam sampe la Nuh 4:1-5:32
La Nuh ro mbere lino 6:1--10:32
Menara Babel 11:1-9
Tampu'u d̄i la Sem sampe la Abram 11:10-32
Dou-dou ma na'ekai iwa ro weki eded̄u: la Ibrahim, Ishak ro la Yakub 12:1--35:29
Londo ro mai la Esau 36:1-43
La Yusuf ro ari lab̄o sa'ed̄ohona 37:1--45:28
Dou Israil d̄i Mesir 46:1--50:26