KEJADIAN
Allah Ta'ala Kandad̄ina Langi Ro Dana Lab̄o Isina
1
Aipu sarambakaina, wakatu Allah Ta'ala tampu'u kandad̄ina langi ro dana lab̄o isina,a 2 dunia watipu ntauna pahu, ro mbuipu ntaruna. Ro rindi ncaki ma b̄onto moti na'e ro samenana ma wara, pala Roh Allah maruku rero ese wawo oi.b 3 Nggahira Allah Ta'ala, <<Ndad̄ira taroa!>> Edempara ndad̄ira taroa ede. 4 Allah Ta'ala sana edana lampa rawi ede. Edempara Allah Ta'ala cenggakalaina taroa ede lab̄o ma rindi, 5 ro Allah Ta'ala tangarakaina taroa ede <<Aimarai>> ro rindi ede <<Aimangad̄i.>> Aimangad̄i wa'ura kalalo, ro ndad̄ira aimasid̄i. Edeku ainaina ma sarambakaina.6-7 Edempara nggahira Allah Ta'ala, <<Ndad̄ira sab̄ua kuba d̄imacengga d̄ua oi ade d̄ua mbua hid̄i.>> Ro lampa rawi ede ndad̄ina. Ndedeku Allah Ta'ala ndawina kuba d̄imakahampana oi ma wara ta awa mai b̄a kuba ro oi ma wara ese mai b̄a kuba ede. 8 Kuba ede tangarakai-Na <<Langi.>> Aimangad̄i wa'ura kalalo ro wontura aimasid̄i. Edeku ainaina ma kad̄uakaina.
9 Edempara nggahira Allah Ta'ala, <<Pab̄uaku oi ma wara awa mai b̄a langi rai kab̄oro aka sab̄ua hid̄i, ndad̄ina dana d̄imatada.>> Ro lampa rawi ede ndad̄ina. 10 Allah Ta'ala tangarakaina dana ma tada ede, eded̄u <<Dana mango>>, ro kab̄orokai oi ede tangarakai-Na <<Moti>>. Ro Allah Ta'ala sana edana lampa rawi ede. 11 Allah Ta'ala nggahi walina, <<Pab̄uaku dana kawokona samenana pahu mawoko, eded̄u samenana pahu mawoko ma ntau isi, ro fu'u haju ma ntau wua ro isi.>> Edempara lampa rawi ede ndad̄ina. 12 Ndedeku dana kawokona samenana pahu mawoko. Ro Allah Ta'ala sana edana lampa rawi ede. 13 Aimangad̄i wa'ura kalalo ro wontura aimasid̄i. Edeku ainaina ma katolukaina.
14-15 Nggahira Allah Ta'ala, <<Pab̄uaku warana mataroa d̄i langi d̄imakataroana dunia, d̄imacenggakalaina aimarai lab̄o aimangad̄i, ro d̄ib̄adekai wakatu tampu'ukai ainaina, mba'ana, ro ainaina aruraja.>>c Edempara lampa rawi ede ndad̄ina. 16 Ndedeku Allah Ta'ala kandad̄ina d̄ua mbua pahu mataroa ma na'e, eded̄u liro d̄imakuasakaina aimarai, ro wura d̄imakuasakaina aimangad̄i; ro kandad̄i rauna ntara-ntara. 17 Allah Ta'ala tohona mataroa ede d̄i langi d̄imakataroana dunia, 18 d̄imakuasakaina aimarai ro aimangad̄i, ro d̄imacenggakalaina ma taroa lab̄o ma rindi. Allah Ta'ala sana edana lampa rawi ede. 19 Aimangad̄i wa'ura kalalo, ro wontura aimasid̄i. Edeku ainaina ma ka'upakaina.
20 Edempara nggahira Allah Ta'ala, <<Pab̄uaku d̄i ade oi wara uta ro binata ma kalai ma mori, ro ese woha ai mboto pahu nasi ma ngemo rero.>> 21 Edempara Allah Ta'ala kandad̄ina binata-binata ma na'e-na'e poda ade moti, ro samenana pahu ma mori d̄i ade oi, ro sanikina pahu nasi. Allah Ta'ala sana edana lampa rawi ede. 22 Allah Ta'ala barekana samenana ede ro nggahi-Na, <<Nggana ro ngginapu ro kab̄inipu moti, ro pab̄uaku nasi-nasi nanaha mboto.>> 23 Aimangad̄i wa'ura kalalo ro wontura aimasid̄i. Edeku ainaina ma kalimakaina.
24 Nggahira Allah Ta'ala, <<Pab̄uaku d̄i dana wara samenana pahu binata ta ari mangokaina, ma mau ro ma daro, ma na'e ro ma to'i.>> Edempara lampa rawi ede ndad̄ina. 25 Ndedeku Allah Ta'ala kandad̄ina samenana ede ro Sia sana edana lampa rawi ede.
26 Sawa'u b̄a ede, nggahira Allah Ta'ala, <<Ake, Ndai takandad̄iku manusia d̄imandad̄i b̄une Ndai ro sapahu b̄une Ndai. Siad̄oho d̄imakab̄ua ro d̄imasandakana uta-uta, nasi-nasi, sara'a binata ntadi ro sara'a binata madaro, ma maud nataho ma na'e ro ma to'i.>> 27 Ndedeku Allah Ta'ala kandad̄ina manusia, ro kandad̄ina siad̄oho ma sapahu b̄une weki ndai-Na. Allah Ta'ala kandad̄ina siad̄oho mone ro siwe. 28 Sawa'u b̄a ede, Allah Ta'ala barekana siad̄oho kai rentana, <<Ngganapu ana ro ompu ma mboto, loakud̄u londo ro maimu d̄imangge'e kab̄inina dunia ro d̄imakuasakaina. Nggomid̄oho d̄imakab̄ua ro d̄imasandaka uta-uta, nasi-nasi, ro sara'a binata ma daro. 29 D̄ingaha ro nonomu, Nahu d̄imambeimu sara'a pahu ma woko ma ntau isi ro samenana fu'u haju ma ntau wua ro isina. 30 Pala d̄i ru'u ba sara'a nasi ro binata daro makalaina, Nahu mambei mpori ro fu'u haju ma ntau ro'o d̄ingahana.>> Ndad̄i lampa rawi ede ndad̄ina. 31 Allah Ta'ala ntanda sara'ana au-au ra wa'u kandad̄i-Na ede, ro sara'ana ede nawancuku ntikana. Aimangad̄i wa'ura kalalo ro wontura aimasid̄i. Edeku ainaina ma ka'inikaina.