2
Ndad̄i nggorira Allah Ta'ala kandad̄ina langi ro dana lab̄o isina. 2 D̄i ainaina kapidukaina Allah Ta'ala wa'ura kanggori karawi-Na ede ro Sia sanawana. 3 Edempara Allah Ta'ala barekana ainaina kapidukaina ede ro kandad̄ina ainaina kapidukaina ede ainaina d̄i ru'u b̄a Sia mpa, b̄ara ainaina ede Allah Ta'ala sanawana sawa'u b̄a kanggori karawi-Na. 4 Ndedeku lao caritana Allah Ta'ala kandad̄ina langi ro dana lab̄o isina.Manusia Ma Sarambakaina D̄i Nggaro Firdaus D̄i Eden
Wakatu RUMA, Allah Ta'ala kandad̄ina langi ro dana lab̄o isina, 5 watipu wara au-au ma woko ro watipu wara ngguda ro congge d̄i dunia, b̄a one RUMA, Allah Ta'ala watipu kalondona ura ro watipu wara dou d̄imakarawina dana ede. 6 Pala oi tampu'ura wontuna ro b̄ecana wawo dana.
7 Edempara RUMA, Allah Ta'ala wehana dana ro ndawina sab̄ua manusia,e sawa'u b̄a ede, ufi tauna nawa mori ade iluna d̄iloakaina mori; ndedeku manusia ede ndad̄i mahluk ma mori.
8 Sawa'u b̄a ede, RUMA, Allah Ta'ala ndawina nggaro d̄i Eden, ta wela ele-na ro RUMA, Allah Ta'ala wi'ina manusia ra ndawi-Na ede. 9 Edempara RUMA, Allah Ta'ala kawokona sanikina pahu fu'u haju ma ntika-ntika ro mantau wua ma taho d̄ingaha. Ro d̄i woha nggaro ede, wara woko fu'u haju ma loa mbei mori ro fu'u haju ma mbei loa ro b̄ade mab̄oha ma taho ro ma iha.f
10 Wara sab̄ua sori d̄i Eden ma b̄ecana nggaro ede; ro ta ari mai b̄a nggaro ede, sori ede nancangga upa. 11 Ncanggana, ma sarambakaina ngarana Sori Pison; sori ede mab̄eca ro maka'oina dana ro rasa Hawila. 12 Ta ede wara masa ngganga; ro fu'u haju damar, nanana ma mengi nggonggi d̄iraka ro wara wadu-wadu permata. 13 Ncanggana ma kad̄uakaina ngarana Sori Gihon; oi sori ake mab̄eca ro maka'oina dana ro rasa Kus.g 14 Ncanggana, makatolukaina ngarana Sori Tigris ro naraiku ta wela ele b̄a dana ro rasa Asyur. Ncanggana ma ka'upakaina ngarana Sori Efrat.
15 Sawa'u b̄a ede, RUMA, Allah Ta'ala wi'ina manusia ede d̄i nggaro Eden d̄imakab̄ua ro d̄imakatahona nggaro ede. 16 Nggahira RUMA d̄i manusia ede, <<Nggomi maloa ngaha samenana wua haju ma wara ade nggaro ake, 17 pala wua haju ma loa mbei loa ro b̄ade mab̄oha ma taho ro ma iha, wuana wati loa d̄ingaha b̄a nggomi; nggara ngahasi b̄a nggomi, nggomi tantu d̄imamade d̄i ainaina ede wa'u.>>
18 Edempara RUMA, Allah Ta'ala nggahi walina, <<Wati tahona manusia mori kesena. Nahu d̄imandawina lengana ma ncihi ncao ro d̄imabantuna sia.>> 19 Ndad̄i RUMA, Allah Ta'ala wehana dana ro ndawina sanikina pahu binata ma mori d̄i dana ro binata ma ngemo. Sara'ana ede wa'a b̄a RUMA, Allah Ta'ala d̄i manusia ede d̄ib̄adekai-Na ngara auku d̄i mbei b̄a manusia d̄i binata-binata ede. Edeku tampu'u tamponana sara'a binata rakakaina ngara cua-cua ndaina. 20 Ndad̄i ndedeku manusia ede mbeina ngara d̄i samenana binata ma mori d̄i dana ro d̄i binata-binata ma ngemo. Pala wati wara kone sab̄ua rau ade sara'a binata ede ma loa ndad̄i lenga ma ncihi ncao d̄imabantuna manusia ede.
21 Sawa'u b̄a ede, RUMA, Allah Ta'ala kamaru nefana manusia ede ro wunga ade maruna, RUMA, Allah Ta'ala weha kalosana satako peke sanggere d̄i sarumbu manusia ede, edempara b̄onto mbalina hid̄i ra wehakai peke ede kai hi'i ndaina. 22 Kai peke sanggerena ede, RUMA ndawina sab̄ua dou siwe, edempara wa'ana d̄i manusia ede. 23 Ndad̄i nggahira manusia ede,
<<Akeku sia, dou ma sama lab̄o nahu--,
pekena raweha d̄i peke nahu ro hi'ina raweha d̄i hi'i nahu.
Sia d̄i tangarakai dou siwe, b̄ara sia raweha d̄i sarumbu dou mone.>>h
24 B̄ara ndedena dou mone d̄imatu'u wi'i ama ro inana ro ndad̄i sab̄ua lab̄o weina, edempara d̄uana ede ndad̄i sab̄ua.
25 Siad̄oho d̄uana ede saronda, pala siad̄oho wati majana.