Manusia Sapana Parenta RUMA, Allah Ta'ala
3
Sawa eded̄u binata ma ipi mboto aka ade samenana binata ra kandad̄i b̄a RUMA, Allah Ta'ala. Sawa sod̄ina d̄i dou siwe ede, <<Sab̄ua napoda, RUMA, Allah Ta'ala kantana nggomid̄oho ngaha samenana wua haju ma wara ade nggaro ake?>>2 Cambe b̄a dou siwe ede, <<Wati ndedena, nami maloa ngaha wua ra d̄i samenana fu'u haju ma wara ade nggaro ake, 3 pala wua haju ma wara d̄i woha nggaro ake. Allah Ta'ala kantana nami ngaha wua haju ede, au walipu d̄ingaha, kone d̄itudu rau wati loa; nggara ngaha atao tudusi b̄a nami, nami dimamade d̄i ainaina ede wa'u.>>
4 Pala cambe b̄a sawa ede, <<Ede wati podana; nggomid̄oho tantu wati d̄imamade. 5 Allah Ta'ala nggahi ndedekaina, b̄a one Sia nab̄adeku nggara ngahasi b̄a nggomid̄oho wua haju ede, nggomid̄oho d̄imab̄ade ro d̄imandad̄i b̄une Allah Ta'ala; i ro mab̄adeku au ma taho ro au ma iha.>>j
6 Dou siwe ede edana b̄a one fu'u haju ede ntika ro wuana d̄i'edana nacaru d̄ingaha. Kananu b̄a sia nawancuku tahona nggara sia naloasi timba ro lemba. B̄ara ndedena dou siwe ede pokena wua haju ede, edempara ngahana ro mbei rauna d̄i rahina ma wara sama-sama lab̄o sia d̄i hid̄i ede ro ngaha rau b̄a rahina. 7 Sawa'u b̄a ngahana wua haju ede, siad̄oho kawara lalona weki ro nab̄adeku b̄a one siad̄oho saronda. B̄ara ndedena siad̄oho b̄ontona sarumbuna kai ro'o ara ra d̄apo-d̄apona.
8 Wakatu aimambia ede siad̄oho ringana eli langga RUMA, Allah Ta'ala malampa ade nggaro ede, edempara siad̄oho cilina weki d̄i hela fu'u-fu'u haju loakud̄u wati eda b̄a RUMA. 9 Pala RUMA, Allah Ta'ala ouna dou mone ede, <<Ta b̄eku nggomi?>>
10 Cambe b̄a dou mone ede, <<Mada ringaku eli langga Ita ma wunga lampa ade nggaro; mada kadahu, ndad̄i mada ciliku weki b̄a one mada saronda.>>
11 Sodi b̄a Allah Ta'ala <<Cou ma rangoamu b̄a one nggomi saronda? Sab̄ua nggomi wa'ura ngahamu wua haju ra kantakai b̄a Nahu ede?>>
12 Cambe b̄a dou mone ede, <<Dou siwe ra mbei b̄a Ita d̄imalab̄ona mada ede, sia ma rambeina wua haju ede d̄i mada, ndad̄i ngaha b̄a mada.>>
13 RUMA, Allah Ta'ala sod̄ina d̄i dou siwe ede, <<B̄ab̄auku karawi ndedekaimu?>>
Cambe b̄a dou siwe ede, <<Mada rakeko b̄a sawa, ndad̄ina mada ngahaku wua haju ede.>>
Allah Ta'ala B̄ab̄una Hukuman
14 Sawa'u b̄a ede, nggahira RUMA, Allah Ta'ala d̄i sawa ede, <<Nggomi d̄ihukum b̄ara rawimu ede; ra d̄i samenana binata nggomi mpa ma pab̄uana tanggu b̄a'a ake: Tampu'u ake nggomi d̄imarama kai lokomu ro d̄ingahamu eded̄u kalub̄u dana sa'umu morimu. 15 Nggomi ro dou siwe ede d̄imacua musu angi. Londo ro maina ro londo ro mai nggomi d̄imacua musu angi; londo ro maina d̄imakaleli tuta nggomi ro londo ro mai nggomi d̄imanotona tini siad̄oho.>>
16 Edempara nggahira RUMA d̄i dou siwe ede, <<Nggomi d̄imancoki iu wakatu na'e lokomu ro pili ma ipi poda wakatu ngganamu. Pala kone ade ndedekaina, nggomi ngge'e mpa mai ademu d̄i rahimu ro sia d̄imakuasakaina nggomi.>>
17 Edempara nggahira RUMA d̄i dou mone ede, <<B̄a one nggomi kade'emu nggahi weimu ro ngahamu wua haju ra kantakai b̄a Nahu, b̄ara rawimu ede, ihara dana. Nggomi pab̄uapu karawi kapodamu ade sa'umu morimu loakud̄u dana ake d̄imambeina hasi ma ncihi d̄ingaha ro nonomu. 18 Rompa ro mpori rui d̄imandad̄i hasi dana ake d̄i ru'u b̄a nggomi. Ro nggud̄a ro congge d̄i oma d̄imandad̄i ngaha ro nonomu. 19 Kai maki ro hompa ro mboho howimu, nggomi d̄imakarawi dana ake d̄iloakaina wara hasi, sampe nggomi mbalimu ndad̄i dana, b̄ara nggomi randawi kai dana ro d̄imambali ndad̄i dana.>>
20 La Adamk tangarakaina weina ede la Hawa,l b̄a one dou siwe ede ma ndad̄i ina b̄a sara'a manusia. 21 Ndad̄i RUMA, Allah Ta'ala ndawi weana kani ro lombo kai huri binata d̄i ru'u b̄a la Adam ro weina, sawa'u b̄a ede kakanina d̄i siad̄oho.
La Adam Ro La Hawa Katesa Kalosa B̄a RUMA Ra D̄i Ade Nggaro Eden
22 Nggahira RUMA, Allah Ta'ala, <<Ake manusia wa'ura ndad̄i b̄une Ndaita ro nab̄adera mab̄oha au ma taho ro au ma iha. Ndad̄i Ndai pab̄uaku tapa siad̄oho ngaha wua haju ma mbei mori, loakud̄u siad̄oho aina mori santoi-ntoina.>> 23 Ndad̄i RUMA, Allah Ta'ala katesa kalosana manusia ede ra d̄i nggaro Firdaus ro kauna karawi dana, b̄a one siad̄oho randawi kai dana ede. 24 Sawa'u b̄a ede, ta sab̄ae ele b̄a nggaro Eden, RUMA, Allah Ta'ala kauna jaga mala'eka-mala'eka-Na ro salona peda ma kalea b̄une afi ma kalibiri d̄i sara'a welana, d̄imajaga ncai ma lao aka fu'u haju ma mbei mori ede.