La Kabil Ro La Habil
4
La Adam maru campo lab̄ona la Hawa weina, edempara weina ede na'e lokona. Sia ngganana sab̄ua dou ana mone ro nggahina, <<Kai bantu b̄a RUMA nahu wa'ura rakaku ana mone.>> Ndad̄i tangarakai b̄a sia anana ede la Kabil.n 2 Sawa'u b̄a ede, la Hawa nggana walina ana mone, ngarana la Habil, la Habil ndad̄i dou ma'ompukai jimba, pala la Kabil ndad̄i dou makanggihi. 3 Wakatu oru wehakai hasi, la Kabil wehana sarunde d̄i hasi kanggihina, edempara d̄onggo ro mbeina d̄i RUMA. 4 La Habil rau wehana ana jimba, ra nggana masarambakaina, sambele ro d̄onggo ro mbeina hi'i ro apana ma wancu taho d̄i ru'u b̄a RUMA. RUMA sana adena ro tarimana d̄onggo ro mbei la Habil, 5 pala RUMA wati tarimana d̄onggo ro mbei la Kabil, ndad̄ina la Kabil nawancuku fa'a adena ro na'ipiku mbanina ro na'ipiku iha pahuna. 6 Edempara nggahira RUMA d̄i la Kabil, <<B̄ab̄auku nggomi fa'akai ademu ro ihakai pahumu? 7 Nggara makarawisi ma taho, tantu nggomi d̄imasarome; pala nggara nggomi makarawisi ma wati taho, ndad̄i dosa nawa'ura ngena d̄imalu'u d̄ei ademu. Dosa nane'eku kuasakai nggomi, pala nggomi pab̄uapu kakoamu dosa ede.>>o 8 D̄i sab̄ua ainaina nggahi la Kabil d̄i la Habil, arina, <<Mai ndai talaoku aka oma.>>p Wakatu siad̄oho ronggana aka oma, la Kabil b̄oe sadekana ro hadena la Habil, arina.9 RUMA sod̄ina d̄i la Kabil, <<Ta b̄eku la Habil, arimu?>>
Cambe b̄a la Kabil, <<Mada wati b̄adeku. Sab̄ua pab̄uaku mada d̄imajaga ro sandaka ariku?>> 10 Nggahira RUMA d̄i la Kabil, <<B̄ab̄auku nggomi karawikaimu lampa rawi ma samangikai ade ede? Ra'a arimu ma mboho d̄i dana, kanggica ouna Nahu, sia rahona cola cepe au ra karawi b̄a nggomi. 11 Ihara nggomi ro b̄ara ndedena nggomi wati loa walimu raka hasi d̄i dana ede. Dana ede wa'ura nonona ra'a arimu. 12 Nggara nggomi manggud̄a ro conggesi, dana ede wati d̄imambei hasi au-au; nggomi d̄imandad̄i dou ma ngge'e rero ro wati ntaumu hid̄i ngge'ekai d̄i dunia.>>
13 Edempara nggahi la Kabil d̄i RUMA, <<Hukuman ede nawancuku tanina d̄i ru'u b̄a mada. 14 Ita katesata mada ra d̄i dana ake, d̄o'o d̄i tando Ita. Mada d̄imandad̄i dou mangge'e rero ma wati ntau hid̄i ngge'ekai d̄i dunia. Mada kadahuku hade b̄a dou ma eda angi lab̄o mada.>>
15 Pala nggahira RUMA d̄i la Kabil, <<Wati. Nggara nahadesi b̄a dou nggomi, ndad̄i d̄imacola cepena nggomi eded̄u pidu kali ncewi mbotona lab̄o dou ma rahade nggomi ede d̄ihade rau.>> Edempara RUMA tohona tanda d̄i la Kabil loakud̄u cou-cou ma rumpa lab̄o sia, dou ede wati d̄imahade sia. 16 Edempara la Kabil lao kad̄o'ona weki d̄i tando RUMA ro ngge'ena d̄i dana ma ngara, <<Dana Nod>>aona, dana ma wati loa d̄ingge'e impikai, hid̄ina ta wela ele b̄a Nggaro Eden.
Londo Ro Mai La Kabil
17 Edempara wei la Kabil ngganana ana mone ro tangarakaina la Henokh. Sawa'u b̄a ede, la Kabil katu'una sab̄ua kota ro tangarakaina kota ede b̄une ngara anana ede. 18 La Henokh nantau ana ma ngara la Irad. La Irad nantau ana ma ngara la Mehuyael. La Mehuyael nantau ana ma ngara la Matusael, ro la Matusael eded̄u ama b̄a la Lamekh 19 La Lamekh nantau d̄ua dou weina, la Ada lab̄o la Zila 20 La Ada ngganana la Yabal, ro londo ro mai la Yabal edeku bangsa ma ntadi binata ro nangge'e ade kema. 21 Ari la Yabal ngarana la Yubal ro, londo ro mai la Yubal eded̄u ma loa kob̄i gambo ro ufi jalitu. 22 La Zila ngganana la Tubal-Kabil ro, londo ro maina ma ndad̄i pandeq b̄esi ro romba. Ari siwe la Tubal-Kab̄il ngarana la Naama.
23 Nggahi la Lamekh d̄i d̄ua dou weina ede,
<<Ada, Zila, kade'epu!
Nahu wa'ura hadeku sab̄ua dou sampela mone b̄ara sia b̄oena nahu.
24 Nggara pidu dou d̄ihade b̄ara hadena la Kabil,
ndad̄i pidu mpuru pidu dou d̄ihade nggara nahadesi b̄a dou nahu.>>
La Set Ro La Enos
25 La Adam maru campona lab̄o la Hawa weina, edempara weina ede na'e lokona. Sia ngganana sab̄ua dou ana mone ro nggahina <<Allah Ta'ala wa'ura mbeina nahu ana mone ma cepena la Habil, ra hade b̄a la Kabil.>> B̄ara ndedena la Hawa tangarakaina anana ede la Set.r 26 La Set nantau ana mone ngarana la Enos. D̄i jaman edeku dou tampu'una pehe ngara RUMA nggara nanembasi RUMA.