24
Wakatu sangaji Yoyakim ma parenta d̄i Yehuda, Nebukadnezar sangaji Babel lao dei ro kuasakaina Yehuda. Tolu mba'a ntoina sangaji Yoyakim kuasakai b̄a Nebukadnezar, pala sawa'u b̄a ede sia barontana. 2 RUMA nggaduna kalompo-kalompo ma kani d̄aha ro d̄ano ra d̄i bangsa Babel, Siria, Moab lab̄o bangsa Amon d̄ima'ao sangaji Yoyakim ro kaihaleli Yehuda, b̄une ra wa'u nggahi b̄a RUMA kai ncai nabi-nabi ada-ada-Na ede. 3 Lampa rawi ede pab̄uaku ndad̄i romona, b̄ara RUMA wa'ura nggahina b̄a one bangsa Yahuda d̄i wa'a paki ra d̄i dana ro rasa ra mbei b̄a RUMA d̄i siad̄oho. Siad̄oho d̄i wa'a paki b̄ara sara'a dosa ra karawi b̄a sangaji Manasye; 4 ma ipi poda b̄ara rawi sia sara'a hadena dou ma wati wara ncara. RUMA wati ngawana kangampu wea dosa sangaji Manasye b̄ara rawi-rawina ede.5-7 Sara'a dana ro rasa tampu'u d̄i sori Efrat saraka/sampe/salalo aka watas Mesir ta wela d̄a lu'u ade wilaya parentakai sangaji Mesir, kuasakai b̄a sangaji Babel. Bara ndedena sangaji Mesir watid̄u losa walina ra d̄i dana ro rasana d̄i ru'u lao losa ro lakakaina.
Carita makalai mab̄oha sangaji Yoyakim wara ratunti ade buku sejarah sangaji-sangaji Yehuda. Sawa'u b̄a made sangaji Yoyakim, ana mone sia mangara la Yoyakhin mandad̄i sangaji macepena sia.
Yoyakim Sangaji Yehuda
8 La Yoyakhin umuna sampuru waru mba'a, wakatu sia ndad̄ina sangaji Yehuda, ri sia parentana d̄i Yerusalem tolu wura ntoina. Ina la Yoyakhin ngarana la Nehusta ana b̄a la Elnatan ra d̄i Yerusalem. 9 B̄une amana, la Yoyakhin rau nakarawi dosa d̄i RUMA.
10 Ade wakatu parentakai la Yoyakhin, tentara-tentara lewa Babel mana'ekai b̄a perwira-perwira Nebukadnezar, lao deina Yerusalem, ro dei hekona kota ede. 11 Wunga dei heko b̄a tentara kota ede, ndai Nebukadnezar mamai aka Yerusalem, 12 edempara sangaji Yoyakhin lab̄o inana, anad̄ohona, perwira-perwirana, ro pagawe-pagawe asina mangaku koa d̄i Nebukadnezar. Edempara sangaji Yoyakhin bui b̄a dou. Lampa rawi ede ndad̄ina d̄i mba'ana kawarukai ade parentakai Nebukadnezar. 13 Sara'a tau ro tui masa ra ndawi b̄a sangaji Sulaiman d̄i ru'u Uma RUMA, ka'iha b̄a Nebukadnezar. Edempara sara'a barang-barang (tau ro tu'i) ma nggali co'i ma wara d̄i Uma RUMA ede ro ma wara ade asi lao wa'ana aka Babel, Sara'a ma ndad̄i ede sama lab̄o au ra wa'u nggahi b̄a RUMA.
14-16 Sangaji Yoyakhin, ina na, wei-weina, pagawe-pagawe, ro dou-dou mana'ekai Yehuda -- sara'ana 7.000 dou -- siad̄oho ra bui ro lao wa'a aka Babel.
Dou-dou ma ahli karawi rau ro pande (dou manded̄e) b̄esi 1.000 dou mbotona, sara'ana ede, eded̄u dou-dou matenggo (ngau) ro disa d̄imalewa. Dou-dou londo ro mai sangaji. ro dou-dou matuakai (mana'ekai) rau ra lao wa'a aka hid̄i pakikai -- sara'a dou ede wara 10.000 dou. Ne'e mpara sara'a ela ro dou Yerusalem ra lao wa'a; ndad̄i mangge'e (ra wi'i) eded̄u ela ro dou ma ipi ncoki mori mpa.
17 Sawa'u b̄a ede sangaji Nebukadnezar hantana la Matanya, amanto'i b̄a sangaji Yoyakhin, mandad̄i sangaji Yehuda, ro cepena ngara la Matanya ndad̄i la Zedekia.
La Zedekia Sangaji Yehuda
18 La Zedekia umuna d̄ua mpuru samba'a wakatu sia ndad̄ina sangaji Yehuda. Sia parentana d̄i Yerusalem sampuru samba'a ntoina. Ina sangaji Zedekia ngarana la Hamutual, ana b̄a la Yeremia ra d̄i kota Libna. 19 B̄une sangaji Yoyakhin, sangaji Zedekia rau karawina dosa d̄i RUMA.
20 Ndad̄i RUMA na'ipiku mbanina d̄i ela ro dou Yerusalem ro d̄i dou Yehuda ndad̄ina RUMA watid̄u lab̄o walina siad̄oho.