La Yosia Sangaji Yehuda
(2Taw. 34:1-2)
22
La Yosia umuna waru mba'a wakatu sia ndad̄i sangaji Yehuda, ro sia maparenta d̄i Yerusalem tolu mpuru samba'a ntoina. Ina la Yosia ngarana la Yedida ana la Adaya, ra d̄i Bozkat. 2 La Yosia nakarawiku au makasana wea ade RUMA. Sia nab̄atuku au rakarawi b̄a sangaji Daud wa'i ro warona ede, ro nakalampa (to'akai) sara'aku hukum Allah.Buku (Kitab) hukum RUMA ra eda mbali
(2Taw. 34:8-28)
3-4 Sangaji Yosia nantau sab̄ua dou sekretaris negara ngara dou ede la Safan ana la Azalya, ompu b̄a Mesulam. D̄i mba'ana makasampuru warukaina ade parentakai sangaji Yosia, sangaji mbeina parenta ake d̄i sekretarisna ede, <<Laopu aka Imam Agung Hilkia d̄i Uma RUMA, ro rahopu d̄i sia mbei laporan mab̄oha mbotona piti ra wa'u kab̄oro b̄a imam-imam ma ntau taki d̄i tad̄a lu'ukai d̄i Uma RUMA. 5 Kaupu sia mbei piti ede d̄i dou-dou rahanta d̄imajaga karawi ro kataho Uma RUMA, loakud̄u siad̄oho kanina piti ede d̄i colakai gaji 6 dou-dou ma panggita haju (tukang kayu), dou-dou ma tu'u uma, ro dou-dou ma pa'a wadu lab̄o d̄i welikai haju ro wadu ma d̄i paralu. 7 Dou-dou ra hanta d̄imajaga karawi ede na wancuku rombona, ndad̄i wati mpori raho laporan mab̄oha piti ede d̄i siad̄oho.>> 8 La Safan karonggana parenta sangaji d̄i la Hilkia, edempara la Hilkia caritana d̄i la Safan b̄a one sia wa'ura edana (rumpana) buku (kitab) hukum-hukum RUMA d̄i Uma RUMA. Ndad̄i la Hilkia mbeina buku (kitab) ede d̄i la Safan, ro la Safan bacana buku (kitab) ede. 9 Sawa'u b̄a ede la Safan lao mbalina aka sangaji ro lapona b̄a one piti ra wi'i d̄i Uma RUMA wa'ura weha ro d̄onggo d̄i ada-ada sangaji eded̄u dou-dou ra hanta d̄imajaga (tonggu) karawi ro kataho Uma RUMA. 10 Edempara nggahi la Safan, <<Imam Hilkia mbeina buku (kitab) ake d̄i mada.>> Ndad̄i la Safan baca weana buku ede d̄i ru'u sangaji.
11 Ndede ringana isi buku (kitab) ede, sangaji sipa-sipana kani ro lombona b̄ara ncoki adena. 12 Edempara sangaji mbeina parenta ake d̄i Imam Hilkia, Ahikam ana la Safan, la Akhbor ana la Mikha, la Safan sekretaris negara, lab̄o la Asaya ada sangaji: 13 <<Laopu raho weapu ngoa ro tei b̄a RUMA d̄i ru'u b̄a nahu ro d̄i ru'u b̄a ela ro dou Yehuda mab̄oha isi buku (kitab) ake. RUMA mambani d̄i ndaita b̄ara rawi wa'i ro waro ndai ma wati kalampa parenta-parenta ma wara ade buku (kitab) ake.>>
14 Ndad̄i laora imam Hilkia, Ahikam, Safan lab̄o la Asaya raho ngoa ro tei d̄i sab̄ua dou siwe ma ngara la Hulda. Dou siwe ede, eded̄u sab̄ua dou nabi ma ngge'e d̄i kampo ro mporo b̄ou (rasa b̄ou) d̄i Yerusalem. Rahi nabi ede ngarana la Salum ana la Tikwa, ompu b̄a la Harhas; sia dou ma uru/kab̄ua kani ro lombo ibadakai d̄i Uma RUMA. Sawa'u b̄a ringa b̄a la Hulda nggahi siad̄oho, 15 ndad̄i sia kauna siad̄oho/doud̄oho ede dula mbali aka sangaji ro karongga 16 nggahi RUMA ake: <<Nahu d̄imahukum Yerusalem lab̄o sara'a ela ro douna b̄une ra tunti ade buku/kitab ma b̄ou ra baca b̄a sangaji. 17 Siad̄oho wa'ura tu'u wi'ina Nahu ro d̄onggo ro mbeina koroba d̄i dewa-dewa. Sara'a ra karawi b̄a siad̄oho nakamaiku mbani Nahu. Nahu fa'a adeku/kambani d̄i Yerusalem, ro mbani Nahu wati wa'u d̄i tapa/d̄i kadengga. 18 Pala mab̄oha sangaji Yosia, ake nggahi Nahu, RUMA Allah Ta'ala b̄a Israil , <Sawa'u ringa b̄a nggomi au ra tunti ade buku/kitab ede, 19 nggomi sinci ademu ro ka'awamu weki d̄i tando Nahu. Nahu wa'ura nggahi kadahuku d̄imahukum Yerusalem lab̄o ela ro douna. Nahu d̄imakandad̄ina kota ede d̄i ntanda d̄isamangikai ade, ro ngara Yerusalem d̄ikandad̄i b̄a Nahu ngara rab̄a'a (ngara b̄a'akai). Pala wakatu nggomi nggomi ringamu mab̄oha nggahi kadahu b̄a Nahu ede, nggomi nangimu ro sipa-sipamu kani ro lombomu tanda ncoki ade. Nahu wa'ura ringaku do'a nggomi, 20 b̄ara ndedena hukuman d̄i ru'u Yerusalem wati d̄ikalampa b̄a Nahu santoi nggomi mbuipu morimu. nggomi d̄imamade kai taho sana.> >> Ndad̄i dula mbalira dou-dou ra kakai ede d̄i sangaji ro karonggana nggahi ede d̄i sangaji.