La Manasye Sangaji Yehuda
(2Taw. 33:1-20)
21
La Manasye umuna sampuru d̄ua mba'a wakatu sia ndad̄ina sangaji Yehuda, ro sia maparenta d̄i Yerusalem lima mpuru lima mba'a ntoina. Ina sia ngarana la Hefzibah. 2 La Manasye wa'ura dosa d̄i RUMA, b̄ara b̄atuna rawi-rawi dab̄ae bangsa-bangsa ra katesa kalosa b̄a RUMA d̄i Kanaan d̄i wakatu dou Israil lu'u kai dana ro rasa ede. 3 Hid̄i-hid̄i nembakai dewa ra wa'u ka'ihaleli b̄a sangaji Hizkia ama b̄a sia, tu'u mbali b̄a sia. La Manasye tu'una mezbah-mezbah d̄i ru'u nembakai Baal, ro ndawina patung Dewi Asyera, b̄une ra wa'u karawi b̄a la Ahab sangaji Israil . La Manasye nanemba rau ntara-ntara. 4 RUMA wa'ura nggahina b̄a one Yerusalem eded̄u hid̄i wara maikai RUMA ro hid̄i d̄i sambea ro ibadakai d̄i Sia. Pala d̄i Uma RUMA ede, la Manasye wa'ura tu'una mezbah-mezbah d̄i ru'u dewa-dewa. 5 D̄i d̄ua mbua sarei Uma RUMA, la Manasye tu'una mezbah-mezbah d̄i ru'u nembakai ntara-ntara. 6 Ro ana rauna d̄onggo ro mbei b̄a sia ndad̄i koroba ka'a. La Manasye kalampa rauna ndad̄i sando, ndad̄i dou ma moke, ilmu sanggili, ro na raho ngoa ro tei d̄i ruh-ruh. Sia na'ipiku na'e dosana d̄i RUMA ndad̄i nakamaiku mbani RUMA. 7 Tanda Dewi Asyera toho wi'i b̄a sia ade Uma RUMA, sapodakaina ma b̄oha hid̄i ede RUMA wa'ura nggahina d̄i sangaji Daud lab̄o d̄i ana monena ma ngara la Sulaiman, Uma Nahu lab̄o kota Yerusalem ake, ra wa'u kad̄ale b̄a Nahu d̄i ade sara'a dana ro rasa sampuru d̄ua suku (londo ro mai) Israil , sambea ro ibadakai d̄i Nahu. 8 Ro nggara ela ro dou Israil to'a sara'akaina parenta Nahu, ro kalampana hukum-hukum ra mbei b̄a Nabi Musa ada Nahu ede, d̄i siad̄oho, ndad̄i Nahu wati d̄imaco'o siad̄oho ra d̄i dana ro rasa ra wa'u mbei b̄a Nahu d̄i wa'i ro waro siad̄oho.>> 9 Pala dou Yehuda wati to'ana d̄i RUMA, ro la Manasye ma kamaina siad̄oho karawi dosa-dosa ma ncewi d̄ab̄ae (na'e) ra d̄i dosa ra karawi b̄a bangsa-bangsa ra katesa kalosa b̄a RUMA d̄i dana ro rasa Kanaan aipu wakatu ela ro dou Israil lu'ukaina dana ro rasa ede.10 B̄ara ndedena, kai ncai nabi-nabi, ada-ada RUMA, RUMA manggahi, 11 <<Sangaji Manasye na ipiku dab̄aena. Ruku ro rawina ncewi dab̄ae ntewikaisi ruku ri rawi dou Kanaan. Kai berhala-berhala ra ndawina, sia nakamaiku dosa dou Yehuda. 12 B̄ara ndedena, Nahu, RUMA Allah Ta'ala ra nemba b̄a ela ro dou Israil , d̄imakamaina bala ma ipi na'e d̄i Yerusalem ro d̄i Yehuda, ndad̄ina sanikina dou ma ringa mab̄oha lampa rawi ede d̄imawed̄i ro wento. 13 Ndad̄i Yerusalem Nahu d̄imahukum b̄une hukum b̄a Nahu Samaria lab̄o la Ahab sangaji Israil lab̄o londo ro maina. Yerusalem d̄i cafi karaso b̄a Nahu b̄une pingga ra wa'u alo ro ra wi'i sanggob̄o. 14 Ela ro douna ma mbuipu mori (wara) d̄ico'o wi'i b̄a Nahu d̄ikuasakai b̄a musu-musuna, ro d̄imaweha rampa kampoi isi dana ro rasa siad̄oho. 15 Samenana ede d̄ikarawi b̄a Nahu d̄i ela-Ku b̄ara siad̄oho nawa'ur dosa d̄i Nahu ro makamaina mbani Nahu tampu'u aipu wa'i ro waro siad̄oho losa d̄i Mesir sampe d̄i ainaina ake.>>
16 Selasi ndawina dou Yehuda karawi dosa d̄i RUMA kai nembana berhala (dewa-dewa), la Manasye hade rauna mboto dou ma wati wara ncara ndad̄ina ra'a na mbere d̄i sara'a dana ro rasa Yerusalem.
17 Carita makalai mab̄oha sangaji Manasye ro mab̄oha dosa-dosa karawi b̄a sia, wara ratunti ade buku sejarah sangaji-sangaji Yehuda. 18 Sangaji Manasye made, ro ra umbu d̄i nggaro asi, eded̄u nggaro Uza. Edempara la Amon ana b̄a sia mandad̄i sangaji macepena sia.
La Amon Sangaji Yehuda
(2Taw. 33:21-25)
19 La Amon umuna d̄ua mpuru d̄ua mba'a wakatu sia ndad̄ina sangaji Yehuda ro sia maparenta d̄i Yerusalem d̄ua mba'a ntoina. Ina la Amon ngarana la Mesulemet ana b̄a la Harus, dou Yotba. 20 B̄une amana, sia rau karawina dosa d̄i RUMA. 21 Sia nab̄atuku karawi amana, ro nanemba dewa-dewa ra nemba b̄a amana. 22 Sia wati mori b̄atu au ra kane'ekai b̄a RUMA, pala natu'u wi'iku RUMA, Allah Ta'ala ra nemba b̄a wa'i ro warona.
23 Pagawe-pagawe sangaji Amon nakasab̄ua weki d̄i aokaina sia ro hadena sia d̄i asina. 24 Pala ela ro dou Yehuda hadena dou-dou ma rahade sangaji Amon ede, edempara hantana la Yosia ana sangaji Amon, mandad̄i sangaji macepena sia.