Sangaji Hizkia Supu ro Lao Kataho Wea
20
D̄i wakatu-wakatu ede sangaji Hizkia nasupu na'e (supu mposo ma tani) ro ne'e mpara made. Nabi Yesaya ana la Amos mai lambana sia ro nggahina, <<Nggahi RUMA, Ita sangaji kanggoripu sara'a urusan (karawi), b̄a one Ita sangaji wati d̄imataho suputa. Wati ntoi walina Ita d̄imamade.>>2 Edempara sangaji Hizkia satandona pahu d̄i d̄id̄i ro do'ana, 3 <<Io RUMA, takawara to'ipu b̄a one mada ake wa'ura karawi d̄i ru'u Ita RUMA kai to'a ro rina ade. Mada ka usaha ncau b̄atu au ra kane'ekai b̄a Ita.>> Edempara sangaji Hizkia nangi lalai adena.
4 Nabi Yesaya tu'u wi'ina sangaji Hizkia, pala sawatipu b̄a sia losa arimai b̄a sarei woha asi sangaji, RUMA kauna sia 5 dula mbali d̄i la Hizkia, sangaji b̄a ela RUMA, ro karonggana nggahi ake, <<Nahu, RUMA, Allah Ta'ala ra nemba b̄a la Daud wa'i ro waro b̄a nggomi, wa'ura ringana do'a nggomi ro wa'ura edana mboho oi madamu. Nahu d̄imakatahona supu nggomi, d̄id̄isi (d̄ua nai wali) nggomi d̄imalao aka Uma Nahu. 6 Nahu d̄imasala'i umu nggomi sampuru lima mba'a wali. Nggomi lab̄o kota Yerusalem d̄ihorikalosa b̄a Nahu d̄ikuasakai b̄a sangaji Asyur. Kota ake d̄i jaga ro sandaka b̄a Nahu d̄i ru'u b̄a lia ro horomakai ndai Nahu ro d̄i ru'u b̄a au ra sake Nahu lab̄o ada-Ku la Daud.>>
7 Edempara nabi Yesaya kauna dou nggiru kakub̄i wua ara ro borekaina d̄i mposo sangaji loakud̄u sia tahona (taho supuna).x 8 Sod̄i b̄a sangaji Hizkia, <<Au ku tandana b̄a one RUMA d̄imakataho supu nahu ro b̄a one d̄id̄isi (d̄ua nai wali) nahu d̄imaloa lao aka Uma RUMA wali?>>
9 Ro cambe b̄a nabi Yesaya, <<RUMA d̄imambei tanda d̄i Ita sangaji b̄a one RUMA d̄imakarawi au ra wa'u sake-Na. Ake, ma b̄eku d̄ine'e b̄a Ita: ninu ma wara d̄i tanda jam mada liro ra ndawi sangaji Ahas lampa lao dei tando sampuru gari (kopa) atau suru sampuru gari (kopa).
10 Ndad̄i nggahi sangaji Hizkia, <<Ru'u ndawi ninu ede lampa lao dei sampuru gari (kopa) namod̄a mpa. B̄ara ndedena ndawipu ninu ede suru sampuru gari (kopa).>>
11 Nabi Yesaya do'ana d̄i RUMA, edempara ndawina ninu ede suru sampuru gari (sampuru kopa) d̄i jam mada liro ra ndawi ede.
Dou-dou rakakai ma ramai ra d̄i Babel
(Yes. 39:1-8)
12 D̄i wakatu ede sangaji Babel, eded̄u Merodakh-Baladan ana la Baladan, ringana haba b̄a one sangaji Hizkia b̄oupu taho b̄ara supuna. Ndad̄i sia kakaina dou lao wa'a sura lab̄o hadia aka sangaji Hizkia. 13 Sangaji Hizkia tarima aona dou ma mai ede kai sana ade, edempara tei katadana sara'a ntau ro warana, eded̄u masa ro salaka, marakani lo'i ro mina mengi, ro sara'a d̄aha ro d̄ano tentarana. Wati wara kone sab̄ua rau au-au ma wara d̄i asi ro d̄i sara'a karajaan sia ma wati ra tei katadana d̄i doud̄oho ma mai ede. 14 Edempara nabi Yesaya mai satandona sangaji Hizkia ro sod̄ina, <<Dou ta b̄e siad̄oho ede? Au nggahi siad̄oho?>>
Cambe b̄a sangaji Hizkia, <<Siad̄oho ra d̄i Babel (dou Babel), d̄i dana ro rasa ma d̄o'o.>>
15 <<Au ku tio siad̄oho d̄i asi?>> sod̄i b̄a nabi Yesaya wali.
Edempara cambe sangaji Hizkia, <<Siad̄oho tio sara'ana au-au ma wara! Wati wara kone sab̄ua rau d̄i ade uma hid̄i wi'ikai ntau ro wara asi ra wati tei katada b̄a nahu d̄i siad̄oho.>>
16 Edempara nggahi nabi Yesaya d̄i sangaji Hizkia, <<Nggahi RUMA, b̄a one 17 d̄imaraka wakatuna sara'a ntau ro wara ma wara ade asimu ake ra wa'u kab̄oro b̄a wa'i ro waromu sampe ainaina ake, d̄i lao wa'a aka Babel. Wati wara kone sato'i d̄i wi'i. 18 Ra d̄i ana ro ompu nggomi wara d̄iweha ro d̄ikandad̄i pagawe d̄i asi d̄imakarawi wea sangaji Babel.>>
19 Nggahi sangaji Hizkia, <<Nataho rau nggahi RUMA ra karongga b̄a nggomi d̄i Nahu.>>Cambe kandedekaina b̄ara kananu b̄a sia: <<Sura kerajaan nahu taho ro sana ro wati wara ngango ro ngora santoi mori nahu.>>
Nggorikai parenta b̄a sangaji Hizkia
(2Taw. 32:32-33)
20 Carita makalai mab̄oha sangaji Hizkia, mab̄oha jasa-jasana ro d̄isana ade lewa ro laka, ro karawi b̄a sia ndawina kolam (diwu) ro lapa oi d̄i ru'u kalampakai oi aka kota, sara'ana wara ratunti ade buku sajara sangaji-sangaji Yehuda. 21 Sawa'u b̄a made sangaji Hizkia, edempara la Manasye ana sangaji Hizkia mandad̄i sangaji ma cepe amana.